Bakaanelabu 24 - Jola-Kasa

Kusuwifaku li kul̥oof Fool

¹ Nan bajumuu kunak hutok, álambaawu áamakawu Ananiyaas li ajow boot Sesaale okila li kunahaan kukee, li akooŋena akee an koone Teelitulus. Kúliiŋ, li kújowetum elobayi yan kubajumuu li Fool boot bata Agúubelunaalawu Féeliis.

² Muñeˈe li kúhooñul Fool áliiŋul, Teelitulus li átoŋ alob kulimaku unke aya li akila: — Ahaanawu Féeliis, bújallowabu buya, li wahawu feh uwunkulawu wan ukaanumuu boot li bukanabuku, wó újimuu kásuumaay káamak li kubaj li ésukayi inye.

³ Uhaas oon nanoonan li banooban, jiyabe majakaamu ummu feh man ukaanumuu boot li áloli, ban jisali ŋáa’.

⁴ Bale ifañut min ijoki taate fiyo, mó mújimuu li il̥awi min ubonket újantenoli jakee.

⁵ Jijuujuk joon ánayinaawu ummu busik. Lájiji Kusuwifaku feh kammuu tanootan li adunaayi li kúguul̥oo, akila ammuu anahaanawu ata hujojahu hata Kunasaleyeŋaku.

⁶ Lajoweene boot kahuusul máñeyiyaamu mata eluufayi yata Ateemit, li jijokool. [Li jifañeen min jitiibool loon eluwaayi yóololi elobumuu,

⁷ bale anahaanawu ata esollaaliyayi an koonemuu Lisiyaas li abil abotool li kúŋenoli li sembe.

⁸ Ban Lisiyaas li aan bukanabuku kal̥oofoolumuu, kubiletum elobayi boot booli Féeliis, awu ammuu águubelunaalawu.] Ubanumuu li ugel̥l̥en anawu ummu, fan uhaas jak awu humumi oon wahawu wan jilobumuu jiya li akila, mal̥egen.

⁹ Kusuwifaku li kuyaan kukooŋen Teelitulus, min koon wahawu wan alobumuu mal̥egen.

Fool li acahenoolo hákil águubelunaalawu Féeliis

¹⁰ Muñeˈe águubelunaalawu li áyiit Fool kaŋen min aanool álobul. Fool li aan: — Lihaase een muñeˈe baje simit nan óomi atiibaawu ata etaamayi inye. Mó mújimuu, li kákangumaku kan ibajumuu li awu, léetummuu ilob kulimaku unke min icahenoolo.

¹¹ Bajolut kunak kuŋen li kúl̥uba nan ijowumuu boot Yeelusalem kamanen Ateemit. Awu humumi luyilo uŋes min uhaas mantee mal̥egen.

¹² Kutookutom li búwonnoo li akee li eluufayi yata Ateemit, mantee ínje li kákiŋul búsukabu li siluufasu sata kal̥awaku, mantee foof tikee li ésukayi.

¹³ Ban bukanabuku umbuku kuyilaat kúhiisi col kaanaku wahawu wan kúmalumuu kul̥oofom muñeˈe, mal̥egen.

¹⁴ Bale boot eeni wahawu unwe wo mal̥egen: li bútinabu buwunkulabu ban kujokumuu loon bulet mal̥egen, linabe. Ban li eeno li bulok boot li Ateemit ata situubawolaal sihaan. Líyinenyinen li wahawu feh wakiicimuu li éliibalayi yata Eluwaayi.

¹⁵ Liyaakaayaakaal li Ateemit loon buko foof kuyaakaalumuu li Ateemit kaanaku anoowan, acol, acolut, aketumuu fan abil ayitowumul li eketayi.

¹⁶ Mó mújimuu, li eeno nanoonan li kahanken min ikaan buyinumom jak hákil Ateemit li hákil bukanabuku.

¹⁷ «Muñeˈe nan ífu’muu Yeelusalem jow baj simit, lí ílaañul boot bo li sídalam ló sata kalamben ésukom, li boot kasen bujuuñak Ateemit.

¹⁸ Wahawu unwu lilakomuu kakaanaku li kútookulom li eluufayi yata Ateemit, ínje bágiileneyi iban. Ban no unnu bajut búsuk báguutom, ésukayi foof éguul̥oolut.

¹⁹ Bale Kusuwif kukee kata etaamayi yata Aasi to kulakowe, ban buko kooteenumuu kubil kuyito hákili min kul̥oofom, nokoomuu loon babbaj wah wajakut wan ikaane wan kóomi li kulob kuya lí ínje.

²⁰ Mantee foof bukanabuku umbuke kammee taate, li kulob wahawu wan ínje ífetummuu li buko nan icahenoolomuu hákil Hujojahu háamakahu.

²¹ Mantee yo yommuu hulimahu unhe bale, han ilobumuu butiya mayitowe hákiliil een: “Mata min íyinenumuu kaanaku kaketumuu fan kuyitowul li eketayi, mó mújimuu li eeno li itiibi síyaat hákiluul.”»

²² Muñeˈe águubelunaalawu Féeliis, agel̥l̥enumuu min ahaas jak mata «Bútinabu bata Amaaŋenawu», li ayinnen batiibabu bata Fool min aaniil: — Nan Lisiyaas, anahaanawu áamakawu ata esollaaliyayi ammuu li abil, li itiib elobayi yooluul.

²³ Muñeˈe Féeliis li alob anahaanawu ata kusollaali téemeel, min akat Fool li hukul̥ahu ban jakum kujenkool, ban li kukat bukanool min kulambenool li wah wan afañe.

Fool li ásuumen li Féeliis li aseekool Dúlisil

²⁴ Muñeˈe li baj kunak, Féeliis buko li aseekool Dúlisil ammuu asuwif.

²⁵ Bale nan Fool ajeˈe alobumuu mata buloŋ bacole, mata hujokoo, li mata batiibabu bammuu li bubil, Féeliis li ákoli min aanool: — Muñeˈe luyilo ujow. Nan emmuu li ibajo, li íhooñuli.

²⁶ Féeliis lanaanaak foof ayinoo li aan Fool fan asenool sídalam, mó mújimuu li anaak áhooñulool ñameeŋe kúsuumen.

²⁷ Li jow baj simit síl̥uba, Fólisiyis Fésitiis li alako águubelunaal min aŋa’ kaŋenaku kata Féeliis. Emmuu Féeliis lafanfañ min akaan Kusuwifaku súumiil, li akat Fool li hukul̥ahu.