Bakaanelabu 22 - Jola-Kasa

¹ — Kutuyom li situubawom, muñeˈe jijanten wahawu wan emmuu li ilobuul min icahenoolo.

² Nan kujamumuu Fool li alob li elobayi yooliil, yammuu yata Kusuwifaku, li kuhaŋ maluukoo. Muñeˈe Fool li alaañen aaniil:

³ — Injé Asuwif leem, abuki li ésukayi yata Taalus yammuu li etaamayi yata Silisi. Bale taate Yeelusalem lanke, min Gameliyel alako no anahaanawu úmbaam, aliikenommuu jak eluwaayi yata situubawolaal sihaan. Ban lisensen buloŋom feh Ateemit loon bukuluul foofuul feh jikanumuu síyaat.

⁴ Litiikentiiken bukanabuku kanabumuu li bútinabu bata Amaaŋenawu yok kuket. Li ijok káyine li kanaale ikul̥.

⁵ Alámbaawu áamakawu li huhaanaahu feh hata ésukayi, ibil iseniil kutek.

Fool li akitten buu láyinenummuu li Amaaŋenawu

⁶ — Nan ilakomuu ejowayi boot Damaas, ijow ilehen ésukayi tinak bayitene, mawuŋe majaaŋe ŋáa’, li múfulumul li emitayi mubil muhiitenom múwooñen.

⁷ Li ilo teetaam, ban li ijam hulim li hoonom: «Sóol, Sóol, wáa újiye li oono li jálaatenom?»

⁸ Li igel̥l̥en een: «Awu ommuu ayi, Amaaŋen?» Hulimahu li hulaañen hoonom: «Injé emmuu Yéesu ata Nasalet an úlaatenemuu li akila.»

⁹ Bukanabuku kan jinaboomuu li kujuk mawuŋaamu, bale kujamut hulimahu hata anawu alobumuu lí ínje.

¹⁰ Muñeˈe li igel̥l̥en een: «Muñeˈe boot min ikaan buu, Amaaŋen?» Amaaŋenawu li aanom: «Uyito ujow boot Damaas, úliiŋ bomuu fan kukitteni wahawu feh wan Ateemit afañumuu min ukaan.»

¹¹ Bale emmuu kaleñaku kata mawuŋaamu ummu, kuyansaan kukaanom ífuum, kufaalom li kútukom li kaŋen min kújowetumom boot Damaas.

¹² «Li baj li ésukayi inyu ánayine akee an koone Ananiyaas. Ananiyaas li akaan an áyinene ŋáa’, ban li anab li eluwaayi feh kata Damaas li kunaak kulob majake bale kuya li akila.

¹³ Li abil ajukom ban li aanom: “Atuyom Sóol, ulaañen ujuk!” Li iyaan ijuk yaan no unnu, ban li ijukool jak.

¹⁴ Muñeˈe Ananiyaas li alaañen aanom: “Ateemit ata situubawolaal sihaan lal̥usil̥us akat to boot min uhaas húnongumahu hoola, li ujuk Yéesu acolumuu, ban li újamum li butumool hulimahu hoola.

¹⁵ Mata fan ulob boot li okila hákil bukanabuku feh. Fan ulobiil wahawu feh wan ujukumuu li wan ujamumuu.

¹⁶ Muñeˈe kama waa lukobe li wo? Uyito úbatiiseyi min uhoofoolawu wooli ufosi awu bahooñe kajawaku kata Amaaŋenawu.”»

Fool li alob buu Ateemit aboñoomuu kawaale kaletumuu kusuwif

¹⁷ Fool li afamen aan: — Fúlum tó, li ilaañ boot Yeelusalem. Muñeˈe li ilako kal̥aw li eluufayi yata Ateemit, li ijuk li kahimmo Amaaŋenawu,

¹⁸ li aanom: «Usommen úfu’ li ésukayi yata Yeelusalem, mata bukanabuku kakin dómuu let kufañ min kúyinen kulimaku kan ommuu ulobiil múmbaam.»

¹⁹ Li eenool: «Amaaŋen, bukanabuku kuhaase koon ínje linaanaak ijow li siluufasu sata kal̥awaku sata Kusuwifaku, jajok bukanabuku káyinenumuu li awu ikul̥, iban li itekiil.

²⁰ Ban nan kumukumuu alokaawu ooli Ecen, to foof lilakowe. Alóli jijamoole li bukanabuku kalakowoolumuu jamukaju, mín ínje ítukiil wañawu wooliil.»

²¹ Muñeˈe Amaaŋenawu li aanom: «Ujow, mata boot min iboñi lóyi, bata bukanabuku kákaanumutumuu li Ateemit balewool.»

Fool li aan akila an ata Lom

²² Búsukabu li bujanten kale Fool min alob boot yok nan alobumuu kulimaku unku. Muñeˈe li kunaak kulob butiya koon: — Anáyinaawu ummu laate aniileni li etaamaye! Aatut aloŋ!

²³ Li kul̥ol̥l̥okoo butiya, ban li kúhalafen wañawu wooliil, ban li kufotten.

²⁴ Anahaanawu ata esollaaliyayi yata Lom li alob min kukaan Fool anoken li hukinahu hata kusollaaliyaku, min kuŋa’ kukaluwaas min kutekool min kugel̥l̥enoolool mantee kay li álobul, min ahaas wahawu wájimuu búsukabu li bunaak bulob kulimaku unku butiya buya li akila.

²⁵ Bale, nan kukokoolumuu kuban boot min kutekool, Fool li agel̥l̥en anahaanawu ata esollaaliyayi alako tomuu aanool: — Mantee jibaje kakaañen min jitek an ata Lom akila batiiboluti?

²⁶ Nan anahaanawu ummu ajamumuu kulimaku unku, li ajow áhebul anahaanawu oola aanool: — Bale awu luhaase wahawu wan ulakomuu li ukaan? Anáyinaawu ummu an ata Lom!

²⁷ Anahaanawu ata esollaaliyayi li abil boot tan Fool alakomuu min agel̥l̥enool aanool: — Uhebom mantee mal̥egen awu an ata Lom? Fool li aanool: — Eéhe’.

²⁸ Anahaanawu ata esollaaliyayi li aan Fool: — Injé licancaam sídalam sáamak ítowum ilako an ata Lom. Fool li aanool: — Injé nan ibukimuu léemi an ata Lom.

²⁹ Bukanabuku kaateenumuu kutek Fool min álobul, li kuyaan kuyiisoo kukatool to. Anahaanawu humumool ata esollaaliyayi li ákoli, nan ahaasumuu aan Fool an alobumuu min kujenkool, kama an ata Lom.

Fool hákil hujojahu háamakahu hata Kusuwifaku

³⁰ Anahaanawu ata esollaaliyayi li afañeen min ahaas jak wáa újimuu Kusuwifaku li kul̥oof Fool. Muñeˈe li líiŋ hunak hukaten, li alob min kúl̥el̥ul Fool, ban li ahooñ bajoj kunahaanaku kata élambaayi li hujojahu háamakahu hata Kusuwifaku, aban li áŋalul Fool abil akaan hákiliil.