Bakaanelabu 20 - Jola-Kasa

Fool li ajow kañaahoo li etaamayi yata Maseduwaan li yata Gilees

¹ Nan búgugguloolabu bukatumuu, Fool li awoogen káyinenumuu li Yéesu min awankuleniil fiyo ŋáa’, ban li akatiil to min ajow boot Maseduwaan.

² Li ájowum halaabahu unhu, min anaak awaale bo ñameeŋe káyinenumuu min awankuleniil. Fúlum tó, li ajow boot Gilees,

³ ajow alako bo kul̥eeñ kúhaaji. Muñeˈe Fool li alako li ájufo li ébato min ajow boot Siili, li ajam kaanaku Kusuwifaku kúsonoosonoo boot min kumukool. Muñeˈe li ajok min álaañumum Maseduwaan.

⁴ Sofateel ammuu añiilawu ata Fíilus, akinumuu li ésukayi yata Beele, li Alisitaak buko li Sókondus kata ésukayi yata Tesalonik, Gáyiyis ata ésukayi yata Delubi, li Tímote buko li Tisik, li Tolofim káfulumulomuu li etaamayi yata Aasi, li kútiŋen Fool.

⁵ Buko umbuku li kujow ló kúyaboli hákil, kujow kúkoboli Tulowaas.

⁶ Alóli húmumoli li jíjufowum li ébato li ésukayi yata Fílib, kagaanaku kata kúmbuuluwaku kakaanutimuu élebiil ko babane. Li baj kunak hutok, li jinabeniil Tulowaas min jilako to esimen.

Fool li ayiten an akete li ésukayi yata Tulowaas

⁷ Li líiŋ li hunakahu hútinaalahu hata esimenayi, li jiwoogoo boot kamunculoo húmbuuluwahu. Fool li alako elob li bukanabuku káyinenumuu. Emmuu hunak hukaten láami li ajow, li awaale kale hukahu hujow hulit ŋáa’.

⁸ Babbaj sihiitum sameeŋe ŋáa’ li káfitaku kata haatiya eluufayi dán jiwoogumuu.

⁹ Muñeˈe li baj añiil áyine akee an koone Atíkus abahe li kayiiwaku kata ejangeelayi yata káfitaku. Li ámooli, li ánafen mata Fool lawaalewaale fiyo ŋáa’. Emmuu lámoolimooli ánafen ŋáa’, li álowumul haatiya eluufayi éhaajutayi boot teetaam. Nan kúl̥aaluloomuu, li kujuk koon lakeeket.

¹⁰ Fool li áwalowul áliiŋul, li ásiten min ajuke Atíkus aban, li atebool ban li aan: — Sákoluul! Lalonloŋ!

¹¹ Fúlum tó, Fool li alaañ aŋito ajow amuncul húmbuuluwahu atokoñ. Li alaañen awaale to fiyo jow banakabu buyitowul, aban li ajow.

¹² Li kújowetum añiilawu áyinaawu bóot maloŋe. Bukanabuku feh li súumiil ŋáa’.

Fool li ájowum Tulowaas boot Milet

¹³ Muñeˈe li jijow jiyinno bo hákil, boot min jijow jíjufo li ébatowayi yammuu li éjowetumoli boot ésukayi yan koonemuu Asos, tan jommuu li jíŋalum Fool li ébatowayi. Wahawu unwu Fool afimmuu min anonge, mata lafanfañ min ajow koot boot bo.

¹⁴ Nan ájowubenolimuu Asos áliiŋ, li jíjufool li ébatowayi min jijow boot li ésukayi yan koonemuu Mitilen.

¹⁵ Li jíjowum tó Mitilen li ébato, jijow jíliiŋ Kíyo hunak hukaten. Li hunakahu húl̥ubutahu, li jiŋej Samos, min jihaaŋ hunakahu húhaajutahu boot Milet.

¹⁶ Fool, li ajok li mal̥egen min ájowum Efées, ban let ayiten to, jakum bil afiyo li etaamayi yata Aasi. Li alako esommen mantee li ayiliyeen, li áliiŋ Yeelusalem li hunakahu hata kagaanaku kata Fantokot.

Fool li awankulen kunahaanaku kata Efées

¹⁷ Fool li alako Milet min aboñ kujow koon kunahaanaku kata Ejanguwayi yata Efées, kubil.

¹⁸ Nan kúŋejulumuu boola, li aaniil: — Jihaase buu liloŋumuu li bukuluul taŋayi feh yan ikaanumuu li bukuluul, kítum li hunakahu hútinaalahu nan ibilumuu li etaamayi yata Aasi.

¹⁹ Liloolok boot li Amaaŋenawu.

²⁰ Jihaase joon iyoloolutuul wahoowah waate uyili ulambenuul. Liwaalewuuwaale ban li iliikenuul wahawu feh hákil ésukayi feh, li híndo siluufasu sooluul.

²¹ Lilollob li mal̥egen Kusuwifaku li kata Gilees min kútiiwowul kunab li Ateemit, ban li kúyinen li Amaaŋenawu oololaal Yéesu.

²² Bale muñeˈe, boot min ijow boot Yeelusalem loon Buyinumabu Banabaabu butuuŋommuu ikaan, bahaasut waa wóomi li ubajom bo.

²³ Wahawu wan ihaasumuu bale, wo wommuu li ésuk yanooyan, Buyinumabu Banabaabu búhiisewonhiis kaanaku hukul̥ li sílaam sóomi li kakobom.

²⁴ Bale lenseen buloŋabu búmbaam, bubajut jáliŋ boot lí ínje. Samin iyili ihabel kúboñaku kúmbaam ikaan, li bulokabu ban Amaaŋenawu Yéesu asenommuu kakaan, bammuu: kawaale Hulimahu Hásuumaahu hata kájiyaku kata Ateemit.

²⁵ «Libiibil boot booluul foofuul feh min iwaalewuul Jáyiiyaju jata Ateemit, bale muñeˈe, lihaase jak kaanaku, anoowan li bukuluul let alaañen ajukom buul.

²⁶ Mó mújimuu, boot min eenuul síyaat: an li bukuluul abilimuu ájim, butumom bulet bo.

²⁷ Mata líhiisuuhiis wahawu feh wan Ateemit afañumuu kakaan, ban iyoloolutuul wahoowah.

²⁸ Jijuke to li bukuluul humumuul, li bumatabu feh ban Buyinumabu Banabaabu busenuulumuu jooken. Jicookoo Ejanguwayi yan Ateemit ábajummuu, li eketayi yata Añiilawu oola humumool.

²⁹ Lihaase een nan emmuu li ijow, bukan kanokoole li sijangibujal sál̥afute, fan kubil kulako li bukuluul ban let kukat to bumatabu.

³⁰ Fan baj maayeet li bukuluul bukan káami li kunaak kúmal, min kuñak kúgoomaku kunab li buko.

³¹ Ban di jíkaanum, min jiwayil̥o joon simit síhaaji feh, bajut etihunaka bajut ehuka, ikatut kasaabuul ikat to, li jíl̥ok ló.

³² «Ban muñeˈe boot min ikatuul li kuŋen kata Ateemit, li hulimahu hata kájiyaku koola. Ateemit layilo alitenuul ban li asenuul bútowaabu ban akat tomuu boot li bukanabuku feh kammuu koola.

³³ Imelowut ehaaliis yata an, mantee éwulus yata an, mantee wañ wata akee.

³⁴ Bukuluul humumuul jihaase joon li kuŋenom lílokume, min ibaj wah boot li buloŋom li bata kanaake kunabumuu lí ínje.

³⁵ Líhiisuuhiis li wahawu feh kaanaku joote jilok loon muñaˈa, min jilamben kusukateenaku, ban li uwayil̥owaal kulimaku kan Amaaŋenawu Yéesu humumool alobumuu: “Kasen wah an lahaŋ mabaj ésuumahukow, an baseneyi wah.”»

³⁶ Nan fool alobumuu loon muñaˈa aban, li ákuntuŋ li buko ló min al̥aw.

³⁷ Buko foofiil feh li kul̥ok, ban li kujow kuŋa’ kuŋeniil kugaab Fool min kusaafool kasaaf kata kakatoo.

³⁸ Buyina báamak li bujokiil mata Fool, háŋum min aaniilumuu let kulaañen kujukool buul. Fúlum tó, li kútiŋenool ajow ájufo li ébato.