Bakaanelabu 19 - Jola-Kasa

Fool li ajow awaale li ésukayi yata Efées

¹ Nan Afolos alakomuu Koolent, Fool li ájowum li etaamayi ban kuyuuyaku kommuu, abil boot Efées. Alíiŋul li atook bó kúgoom kukee.

² Li agel̥l̥eniil aaniil: — Mantee jiyayyab Buyinumabu Banabaabu nan jíyinenumuu? Kúgoomaku li koonool: — Jifanut jijam li kulob kaanaku babbaj Buyinum Banabe.

³ Fool li alaañen aaniil: — Kama kábatiise kay jíbatiiseyi? Li koonool: — Kábatiisaaku kata Saŋ Batiis.

⁴ Muñeˈe Fool li aaniil: — Saŋ lanaanaak ábatiise bukanabuku kafañumuu kukat baloŋelabu booliil buhaanabu min kútiiwo kuŋa’ buloŋ buwunkul, ban li aan kata Isilayeel kúyinen li anawu ammuu li abil búsolool. Anawu ummu okila ammuu Yéesu.

⁵ Nan kujamumuu kulimaku unku, li kujow kúbatiiseyiil li kajawaku kata Amaaŋenawu Yéesu.

⁶ Fool li aŋa’ kuŋenool awalen li buko, Buyinumabu Banabaabu li bubil bulako li buko. Muñeˈe li kulob silob sahaasuti, ban Ateemit li álobum li buko.

⁷ Bukanabuku umbuku kuyilo kúliiŋ kuŋen li kúl̥uba.

⁸ Fúlum tó, Fool li ajow boot li eluufayi yata kal̥awaku, ban li aŋes min akaan min kajantenoomuu kúyinen.

⁹ Bale kukee li buko kufañut kujam, min kuhoy báyinen ban li kunaak kulob kulim kajakut kuya li Bútinabu bata Amaaŋenawu hákil ésukayi. Muñeˈe Fool li ajow akatiil to, ban li aŋa’ kúgoomaku ájowetum, min anaak ajow awaale hunakoohunak li elekoolayi yata Tíilanus.

¹⁰ Fool li akaan mo jow baj simit síl̥uba, yok bukanabuku feh kata etaamayi yata Aasi, Kusuwifaku li kata Gilees, kujam hulimahu hata Amaaŋenawu.

Bañiilabu bata Sikeewa

¹¹ Ateemit li anaak ákaanum wah wájaahaleniye ŋáa’ li kuŋen kata Fool.

¹² Mó lí múji bukanabuku li kunaak kuŋa’ kumusuwaal mantee foof kufalen kata sileesa kagole eniilayi yata Fool, kujow kukaan li kúsontaaku kooliil, li kufak ban uyinumawu wajakutaawu li úfu’ li buko.

¹³ Li baj no Kusuwif kukee kanaake kuñaahoo li sísukasu min kunaak kukesoo uyinumawu wajakutumuu úfu’ li kásomutumuu. Muñeˈe li kufañ kuŋa’ kajawaku kata Amaaŋenawu Yéesu min kukaan wo úfu’ li bukanabuku. Li kunaak koon uyinumawu wajakutaawu: — Leenuul jífu’ li kajaw kata akila Yéesu an Fool awaaleyemuu!

¹⁴ (Bukanabuku kanaake kukaanumuu loon muñaˈa, buko kommuu bañiilabu hutok li búl̥uba bata Sikeewa alakomuu álamba áamak ata Kusuwifaku.)

¹⁵ Bale buyinumabu bajakutumuu li booniil: — Lihaase Yéesu ban li haase ayi ammuu Fool, bale bukuluul bukay joom?

¹⁶ Muñeˈe ánayinaawu an buyinumabu bajakutumuu bújufomuu li ayitowul li buko, li ágooteniil foofiil feh. Li átekikooliil tó li sembe, gay li kutey kúfu’ li eluufayi bákolotoo macokowe.

¹⁷ Bukanabuku kakinumuu Efées, Kusuwifaku li Kugilekaku li kujam mabajumuu, li kúkoli foofiil feh, ban li kúkaanum ŋáa’ li kajawaku kata Amaaŋenawu Yéesu.

¹⁸ Bukan kameeŋe li káyinenumuu li kubil kulob hákil ésukayi, wahawu wan kukaanumuu.

¹⁹ Bukan kameeŋe kanaake kukaanumuu jángafayinde, li kúŋalul síliibalasu sooliil kubil kúsu’ hákil ésukayi feh. Li kucob bunoomabu bata síliibalasu unsu, li sibaj sihanjal sata sídalam sáamak.

²⁰ Muñaˈa Hulimahu hata Ateemit huhaŋumuu majamo ban li huhaŋ mabaj sembe, li búkaanum bata sembaasu sata Amaaŋenawu.

Búgugguloo li bubaj li ésukayi yata Efées

²¹ Nan wahawu unwu ubajumuu jow fú’ tó, Fool li ajok min ájowum li etaamayi yata Maseduwaan li yata Akaay, ajow boot Yeelusalem. Li anaak aan: — Nan emmuu íliiŋ bo, fan foof ijow boot Lom.

²² Muñeˈe li aboñ kúl̥uba li kulambenaaku koola, Tímote buko li Elasit, boot li etaamayi yata Maseduwaan. Bale akila humumool li afan alako jakee li etaamayi yata Aasi.

²³ Muñeˈe no unnu, li baj búgugguloo báamak mata Bútinabu bata Amaaŋenawu búji.

²⁴ Mata babbaj ahaaña akee an koone Démetiliyus, anaake aŋa’ ehaaliis min ahaañ baluuf batit banokoole li eluufayi dán kumanenemuu ateemitawu anaalaawu an koonemuu Alitemis. Bulokabu bata Démetiliyus li bunaak búji kulokaabuku li kubaj sídalam sáamak.

²⁵ Muñeˈe li ahooñ kulokaabuku umbuku li bukanabuku foof kabajumuu bulok banokoo li bo, min aaniil: — Kufaalom, jihaase joon hubajahu hoololaal li bulokabu umbu hubilume.

²⁶ Bale jijuke ban jijame wahawu wan ánayinaawu ummu an koonemuu Fool ammuu li kakaan. Mata lansaan kuteemitaku kan bukan kukaane, kulet kuteemit kata mal̥egen, min áji bukan kameeŋe li kúyinen li akila, let taate li ésukayi yata Efées bale, bale foof li etaamayi feh yata Aasi.

²⁷ Kulimaku unku inti bulokabu boololaal bale koote kukajen, bale foof fan kukajen kajawaku kata eluufayi yata ateemitawu áamakawu anaalaawu Alitemis. Esúkayi let elaañen eluukenool, okila an bukanabuku feh kakinumuu li etaamayi yata Aasi, li kata adunaayi feh, kumanenemuu!

²⁸ Nan bukanabuku kalako tomuu kujamumuu kulimaku unku, etindihuuñ yáamak li ejokiil. Li kunaak kulob butiya koon: — Alitemis ammuu ateemitawu áamakawu ata kata Efées!

²⁹ Búgugguloolabu li buyiisoo buban ésukayi feh yata Efées. Búsukabu li bújokul bukan kúl̥uba kata Maseduwaan, Gáyiyis buko li Alisitaak, kanaake kunaboomuu li Fool, min húmimahu hata búsukabu huhuuñ li buko boot li hukaakahu.

³⁰ Fool li afañeen min ajow bata búsukabu, bale káyinenumuu li kúhi’.

³¹ Bukan káamak káfulumulo li etaamayi yata Aasi, kalakowe kubukewool, li kúboñul kubil kuyaakoolool koonool jakum ajow bata hukaakahu.

³² Muñeˈe no unnu, ésukayi feh li éguul̥oo: kukee fan kulob butiya maame, kaabuku li kulob maama. Ban bukan kameeŋe li buko kuhaasut wáa újiye ésukayi li ebil éfimboo tó.

³³ Muñeˈe li baj ánayine akee an koone Alekusandul, an Kusuwifaku kunaake kutuuñen ayab kayooŋ. Kukee li búsukabu li kukittenool mabajumuu, li áyiit kaŋenool min afañeen alob li búsukabu.

³⁴ Bale nan kuhaasumuu koon Alekusandul asuwif, buko foofiil feh li kulob butiya li mano kulimaku kanolaku jow yili baj siwaatu síl̥uba koon: — Alitemis ammuu ateemitawu áamakawu ata kata Efées!

³⁵ Muñeˈe anahaanawu ata ésukayi yata Efées li akaan búsukabu bulu, ban li aaniil: — Kata Efées, ayi li bukanabuku feh ahaasut aan ésukayi yata Efées, yo efooyemuu eluufayi dán manenemuu Alitemis áamakawu, li kambuwaku koola kálowumulomuu li emitayi?

³⁶ Emmuu bajut an ayilo aceeŋ wahawu unwu, kama joote jibeben, ban jakum jikaan wah bukuluul bajandut jiyinoo jak.

³⁷ Jiŋalloŋa’ bukanabuku umbuke boot taate, ban kulet kúkuuta wah li siluuf sata kuteemit, ban foof kugelut ateemitawu oololaal Alitemis.

³⁸ Nokoomuu loon Démetiliyus li kulokaabuku koola, kujuujuk majakut li akee, baje kunak kata batiib, ban kutiiba kumbuku to!

³⁹ Bale nokoomuu loon babbaj wah ukee wan jifañe jigel̥l̥en mata wo, fan útalulooli li hujoj hanabe li eluwaayi.

⁴⁰ Ban li mal̥egenamu ubanutumuu li ujukelaal to, kata Lom fan kóonul lúhoogulaahoogul eluwaayi, mata wahawu wabajumuu síyaat úji. Mata bajut wah wan óomi li uŋalaal min ukittenaaliil kaanaku, wó újimuu huwoogahu unhe li hubaj.

⁴¹ Nan anahaanawu alobumuu kulimaku unku aban, li aan ésukayi eyiisoo.