Bakaanelabu 17 - Jola-Kasa

Fool buko li Silaas li kujow boot Tesalonik

¹ Muñeˈe Fool buko li Silaas li kújowum Anfífoliis kulo Afoloni, ban li kuhaaŋ boot Tesalonik tan Kusuwifaku.

² Fool li anoken li eluufayi yata kal̥awaku, loon afinemuu min akaane. Fool li aŋa’ Hulimahu hata Ateemit min áwonnoo li bukanabuku kalako lómuu, jow baj kúyiiyaay kúhaaji kata kusuwifaku.

³ Li akitteniil ban li áhiisiil kaanaku loon Hulimahu hata Ateemit hulobumuu, Afakenaawu laate álaam ban li ayitowumul li eketayi. Li aaniil: — Yéesu an ilobemuu li bukuluul moola, okila ammuu Afakenaawu.

⁴ Kusuwif kukee li buko li kúyinen, min kulaañ bata Fool buko li Silaas. Bukan kameeŋe kata Gilees kanaake kumanen Ateemit, li kanaale kameeŋe káami bukan káamak li ésukayi, li kulaañ foof bata Fool buko li Silaas.

⁵ Bale Kusuwifaku li kutahaay ŋáa’. Li kujow kúŋalul kújos kál̥afute, kalakowemuu li útinawu, kubil kúkiŋul búsukabu min kukaan ésukayi éguul̥oo feh. Li kubil boot bata Saasoŋ huŋes Fool buko li Silaas, boot min kujokiil kukaan hákil búsukabu.

⁶ Emmuu kutookutiil bo, li kújokul Saasoŋ li kukee káyinene, kújowetum jow kusen kunahaanaku kata ésukayi, ban li kunaak kulob butiya koon: — Kánayinaabuku umbuku kúgugguul̥ etaamayi feh, ban muñeˈe kuŋejulo baabe!

⁷ Saasoŋ li ayabiil boola! Bukanabuku umbuku feh kúhooguuhoogul siluwaasu sata áyiiyawu áamakawu, mata konsoon baje áyii akee an koone Yéesu.

⁸ Kulimaku unku li kúji búsukabu li kunahaanaku kata ésukayi li kúguul̥oo.

⁹ Muñeˈe Saasoŋ li kaabuku káyinenumuu li kukomen kucaam kunahaanaku min kukit kukateniil.

Fool buko li Silaas li kujow kawaale li ésukayi yata Beele

¹⁰ Nan tiyaane tijonumuu, káyinenumuu li Yéesu li kukaan Fool buko li Silaas.

¹¹ Kusuwifaku kata Beele kuhaŋ mabaj uyinoo wajake kata Tesalonik, ban li kuhi’ li kayab Hulimahu hata Ateemit. Hunakoohunak li kujuke li Hulimahu hata Ateemit min kujuk mantee wahawu wan Fool alobumuu mal̥egen.

¹² Bukan kameeŋe li buko li kúyinen. Li baj li kata Gilees, kanaale kameeŋe káami bukan káamak li ésukayi, li kánayine kameeŋe káyinene li Yéesu.

¹³ Bale nan Kusuwifaku kata Tesalonik kujamumuu kaanaku Fool ummu li kawaale foof Hulimahu hata Ateemit li ésukayi yata Beele, li kubil kákiŋul li káguul̥ búsukabu.

¹⁴ Muñeˈe káyinenumuu li kuyaan kukaan Fool ájowum bata katantaku kata halahu. Bale Silaas buko li Tímote li kulako Beele.

¹⁵ Bukanabuku kájowetummuu Fool li kujow li akila boot Ateen. Ban, li kúlaañumul bó boot Beele li kúheben ló kan Fool áhebenuliil kujow koon Silaas buko li Tímote, kukaan wahoowah min kujow cab kujowubenool.

Fool li awaale li ésukayi yata Ateen

¹⁶ Nan Fool alakomuu kakobaku kata Silaas buko li Tímote li ésukayi yata Ateen, li ajuk kaanaku ésukayi ememmeeŋ kuteemit kalet mal̥egen, súumutool li buyinum maayeet.

¹⁷ Li anaak áwonnoo li eluufayi yata kal̥awaku li bukan kaabuku kamanenemuu Ateemit. Li áwonnoo foof hunakoohunak li bukanabuku kan ammuu atook li kaayeenaku.

¹⁸ Bale li baj bukan kukee kata sihekej kan koone Efíkiiliyeŋ, kaabuku Sitoyiisiyeŋ kabile kulob foof li Fool. Kukee li kunaak kugel̥l̥enoo koon: — Kama waa kaŋaaŋaalaku unku kahaasutumuu wahoowah kufañe kulob? Kaabuku li koon: — Kankaan loon mata kuteemit kata bakee láami li elob. Kulollob loon muñaˈa mata kujanjam Fool li awaale mata Yéesu, li mata kayitowulaku li eketayi.

¹⁹ Muñeˈe li kuŋa’ Fool kújowetum boot tin kutiibemuu, hákil huhaanaahu háamakahu hata ésukayi yata Ateen han koonemuu Ayeelofaas, ban li koonool: — Mantee jiyilo jihaas mata baliikenelabu umbu buwunkulabu ban ulobemuu li bo?

²⁰ Emmuu awu ummu min úlobewolimuu wah wan jijanlelut, jifañe min jihaas wahawu unwu wo wommuu waa.

²¹ (Li mal̥egenamu, bukanabuku feh kata Ateen boot li ejawoolaayi yákin dómuu, buloŋiil feh elob mantee foof bajanten wah uwunkul wakite li úfulul).

²² Fool li ayito li tut huhaanaahu háamakahu han koonemuu Ayeelofaas, min aan: — Kata Ateen, lijuke een jikankaan bukan káyinene ŋáa’.

²³ Mata lilakolako kañaahoo li ésukayi yooluul, li ijuk wahawu wooluul wáñeyimuu tan jimanenemuu kuteemitaku kooluul. Li ijuk foof husila tan kiice kulimaku unke: «Unte boot li ateemit ahaasuti.» Yoo! wahawu wan jimanenemuu ban jihaasut wo, wó ínje ibilumuu kalobuul mata wo.

²⁴ Ateemit áwuwenumuu adunaayi li wahawu feh wáami dómuu, akila ammuu Amaaŋenawu ata emitayi li etaamayi, ban akinut li siluuf sata kuteemit san bukan kuteefe.

²⁵ Ateemit jokutool li wah wan bukan kuyilo kukaan boot li akila, mata akila asenemuu bukanabuku feh buloŋ, huyih li wahoowah feh.

²⁶ Li an ano Ateemit áwuwenummuu bukanabuku feh, min akaaniil kukin li etaamayi feh. Okila alobumuu buu taŋayi yóomi li efiyo le, ban li akaan sígaatulasu sata ban kommuu li kukin.

²⁷ Ateemit lakankaan loon muñaˈa bájum bukanabuku li kuŋesool, ban maayeet min huŋesahu hoola húsengiye, nakee li kujukool. Ban li mal̥egen, Ateemit áloyiwut anoowan li alolaal,

²⁸ mata: «Li okila lúbajumaamuu buloŋ, li unaak ugoloolaal, li óomiyaal bukan.» Mo foof kukee li kujuul̥a ukijenawu kooluul kulobumuu koon: «Olóli foof kuñoolool joom.»

²⁹ «Emmuu ololaal kuñool Ateemit loomaal, ootut uyinoolaal kaanaku Ateemit lanokoonokoo li ebaaŋoot yata éwulus, mantee yata ehaaliis, mantee yata kugisa, yajoki loon ateemit, yan bukan kuyinoole min kukaan li eseeleyiil.

³⁰ Bale Ateemit li ajok min akat bo taŋayi nan bukanabuku kuhaasutumuu wahoowah. Muñeˈe Ateemit laane bukanabuku feh kammuu tanootan kukat baloŋeliil buhaan, min kútiiwo kuŋa’ buloŋ buwunkul.

³¹ Lajoojok hunak nan ammuu atiibum bukanabuku feh kata etaamayi col, li anawu an al̥usumuu. Láhihhiis wahawu unwu bukanabuku feh, nan ayitenumulomuu anawu ummu li eketayi!»

³² Nan bukanabuku kujamumuu Fool li alob mata kayitowulaku kata kaketumuu li eketayi, kukee li buko li kúl̥uwool, kaabuku li koonool: — Fan jibil jijanteni nakee min ulob mata hulimahu unhu.

³³ Muñeˈe Fool li ajow akatiil to.

³⁴ Bale kukee li kulaañ boola, min kúyinen. Li bukanabuku umbuku káyinenumuu, baj to Dóniis alakomuu li huhaanaahu hata Ayeelofaas, li anaale akee an koone Damalis, li kukee foof.