Bakaanelabu 14 - Jola-Kasa

Fool buko li Balunabaas li kujow boot Ikóniyom

¹ Muñeˈe nan Fool buko li Balunabaas kúliiŋumuu Ikóniyom, li kunoken foof li eluufayi yata kal̥awaku, min kuwaale Hulimahu hata Ateemit yok Kusuwif li bukan kákaanumut li Ateemit balewool kameeŋe kúyinen.

² Bale Kusuwifaku kafañutumuu kúyinen li Yéesu, li kutiken bukanabuku kákaanumutumuu li Ateemit balewool min kubaj kayinoo kajakut li káyinenumuu.

³ Bale Fool buko li Balunabaas li kulako Ikóniyom fiyo jakee. Li kunaak kulob li kabaneyiil, li káwoolu ló li Amaaŋenawu li wah wan an ajuulelut, min áhiis kaanaku kulimaku kan kuwaaleyemuu mata kájiyaku koola, mal̥egen.

⁴ Muñeˈe bukanabuku kata ésukayi li kutiiloo: kukee li kulaañ bata Kusuwifaku, kaabuku bata Kufootalaku.

⁵ Kusuwifaku, li kákaanumutumuu li Ateemit balewool, li kunahaanaku kooliil li kulako kágoluloo bánum li kúcoocikoo Fool buko li Balunabaas, min kutekiil kuyitik kumuk.

⁶ Bale nan Fool buko li Balunabaas kuhaasumuu uyinoolawu wooliil, li kutey boot li sísukasu san koonemuu Lisit li Delib, sammuu li etaamayi yata Likawoni, li halaabahu hata bo.

⁷ Bo umbu foof, li kuwaale bo Hulimahu Hásuumaahu.

Fool buko li Balunabaas li kujow kawaale li ésukayi yata Lisit

⁸ Muñeˈe li baj li ésukayi yata Lisit ánayine akee ayilaat ayito, mata labobobobo. Kábilum nan abukimuu lakaje, ban afinut min abile ayili ajow.

⁹ Anáyinaawu li alako bajanten kulimaku kan Fool alakomuu elobayi. Muñeˈe Fool li ajukelool súy, li ahaas aan ánayinaawu labaje káyinen kayilo kújiwool li afak.

¹⁰ Li alobool li sembe aanool: — Uyito ucol! Mal̥egen ánayinaawu li ayaan ayito háak, ban li átoŋ ajow.

¹¹ Nan búsukabu bujukumuu wahawu wan Fool akaanumuu, li kulob butiya li elobayi yalobeyimuu li etaamayi yooliil, yammuu yata Likawoni koon: — Kuteemitaku kuŋale kambu kata an, min kúwalowul kubil kulako li alolaal!

¹² Muñeˈe li kuhooñ Balunabaas «Sás», Fool li kuhooñool «Elimees» mata akila anaake álobulumuu.

¹³ Alámbaawu ata ateemitawu an koonemuu Sás, an eluufayi yoola okila Sás yommuu li kánoonumaku kata ésukayi, li áŋalul kúmuuna kásangenumi élunfen boot tin wámbiilawu. Li anongeen okila li búsukabu, min aŋa’ kúmuunaaku kusilayiil.

¹⁴ Bale nan Kufootalaku kúl̥uba, Fool buko li Balunabaas kujamumuu loon muñaˈa, li kuhaacul wañawu wooliil, ban li kusommen kujow boot li tut búsukabu min kulobiil butiya kooniil:

¹⁵ — Kúfaaloli, wáa újiye li jóomi li jikaan loon muñaˈa? Olóli foof bukan joom loon bukuluul. Jiŋaluluuŋa’ Hulimahu Hásuumaahu mantee kay li jikat bo kuteemitaku umbuku kaletumuu kuteemit kata mal̥egen, min jítiiwo jinab li Ateemit aloŋumuu, áwuwenumuu emitayi, li etaamayi, li halahu, li wahawu feh wáami dómuu.

¹⁶ Naanaŋ, Ateemit lakaakat bukanabuku feh kákaanumutumuu li akila balewool min kunab li útinawu wooliil.

¹⁷ Bale, Ateemit akatut káhiis bukanabuku majakaamu moola, mata li emitayi lásenewumuluumuu malamu man élaalewulumuu, li mutiñaay nan maalemuu. Ateemit asenewuulumuu mutiñaay, ban li akaan uyinumuul úsuum.

¹⁸ Maayeet min kufootalaku kulobiilumuu loon muñaˈa, búsukabu li bufañeen min buceeŋ kuu min bukaaniil kasila.

¹⁹ Kusuwif li kubilum Antiyok yata Fisidi, li Ikóniyom. Li kukaan búsukabu búyinen li buko, min kutek Fool kuyitik boot kumuk, ban li kúhuulool kúfuletum tíyaŋ ésukayi, mata kunaanaak kuyinoo li koon lakeeket.

²⁰ Bale nan káyinenumuu kubilumuu kúguutool, Fool li ayito ban li ajow anoken li ésukayi. Hunak hukaten, li anaboo li Balunabaas kujow boot Delubi.

Fool li Balunabaas li kulaañ boot Antiyok yata Siili

²¹ Fool buko li Balunabaas li kuwaale Hulimahu Hásuumaahu li ésukayi yata Delubi. Bukan kameeŋe li kulako kúgoom. Fúlum tó, li kulaañ boot Lisit, li Ikóniyom, li Antiyok yata Fisidi.

²² Li kuwankulen kúgoomaku, ban li kooniil kútuk lit káyinenaku kooliil. Li kunaak foof kooniil: — Lootaale úlaamaal ŋáa’ tówum unokenaal li Jáyiiyaju jata Ateemit.

²³ Li kul̥us li ejangu yanooyan bukan kulako kunahaan, ban nan kumommomuu min kul̥aw kuban, li kuŋaliil kukat li kuŋen kata Amaaŋenawu an kúyinenumuu li akila.

²⁴ Li kújowum li etaamayi yata Fisidi kulo Fanfili.

²⁵ Li kuwaale Hulimahu hata Ateemit li ésukayi yan koonemuu Feelus kuban, li kújowum to boot li ésukayi yata Atali.

²⁶ Li kújufowum tó Atali li ébato boot Antiyok, yammuu ésukayi tan kuŋaliilumuu kukat li kájiyaku kata Ateemit boot kakaan bulokabu ban kukaanumuu.

²⁷ Nan kúliiŋumuu Antiyok, Fool buko li Balunabaas li kuwoogen ejanguwayi, min kukitteniil wahawu feh wan Ateemit ákaanummuu li buko, li buu lasenumuu bútin kákaanumutumuu li okila balewool min buko foof kúyinen.

²⁸ Fool buko li Balunabaas li kulako to fiyo li kúgoomaku.