3 Saŋ 1 - Jola-Kasa

Kasaafoo

¹ Atuyom Gáyiyis an iboolaatumuu, ínje anahaanawu ikiiculi, awu an íboolimuu li mal̥egen.

² Atuyom an iboolaat, lil̥awe Ateemit min wahi feh ujak, ban awu humumi li ubaj kásuumaay li eniili loon foof yaali ebajumuu kásuumaay.

³ Libabbaj ésuumansuum yáamak nan kutuyolaal kukee kubilumuu min kulobom kaanaku mal̥egenamu mujukijuk li buloŋabu booli, ban mal̥egen buloŋabu booli bunannab li mal̥egenamu ummu.

⁴ Bajut wah wahaŋ másuumom bajam kaanaku bañoolom kumbuku li buloŋ nab li mal̥egenamu.

Baloŋelabu bata Gáyiyis

⁵ Atuyom an iboolaat, wahawu feh wan ukaanemuu boot li kutuyolaal, lukaanekaan wo li mal̥egen, maayeet wan ukaanemuu boot li ejawoola.

⁶ Kulollob mata húbooliyahu hooli hákil ejanguwayi feh. Fan jak ŋáa’ awu balambeneliil li kañaahoolaku kooliil, kalamben kásuume Ateemit.

⁷ Elob mata Kilisita éjimuu li kujow, ban kufañut kuyab wahoowah li kuŋen kata bukanabuku kákaanumutumuu li Ateemit balewool.

⁸ Mó mújimuu alolaal lootaale uyabaal bukan loon umbuku, mantee li ulambenaaliil li bulokabu ban kommuu li kakaanaku min mal̥egenamu muhaasi.

Jakum jiliikoo li bukanabuku kakaanemuu majakut

⁹ Likiiculokiic kulim boot li ejanguwayi, bale Jotulef afañemuu min okila alako anahaanawu ooliil, afañut min ájantenoli.

¹⁰ Mó mújimuu nan emmuu li ibil, fan ilobuul majakutamu feh man akaanumuu, li kulimaku kajakutumuu kan alobumuu aya li alolaal. Bale wahawu unwu feh ufitutool: li ahoy bayab kutuyolaal kabilumuu, ban kafañeenumuu kuyabiil li amit áhiliil kúyabumiil, min akesooliil kúfu’ li ejanguwayi.

¹¹ Atuyom an iboolaat, jakum uliikoo li wah wajakut, bale uliikoo li wah wajake. An akaane majake, Ateemit akilool, bale an akaane majakut, ahaasut Ateemit.

¹² Bale Démetiliyus ésukayi feh elollob majake eya li akila, ban mal̥egenamu mammuu li akila mujukijuk li buloŋabu boola. Alóli húmumoli foof jilollob majake jiya li akila, ban luhaase oon áloli wahawu wan jilobemuu mal̥egen.

Kasaafoo kúbanum

¹³ Libaje wah wameeŋe kalobi, bale ifañut min ilobi wo li eleetal.

¹⁴ Lenseen let fiyo ujukooluma min uloba bújooŋoo.

¹⁵ Kásuumaay kulako li awu! Kufaali kúsaafuli. Usaaf anoowan li kufaalolaal.