2 Saŋ 1 - Jola-Kasa

Kasaafoo

¹ Injé Anahaanawu, ikiiculo boot li Anaalaawu an Ateemit al̥usumuu, li boot li kuñoolool kan íboolimuu li mal̥egen. Inti ínje balewom íbooliwuul, bale bukanabuku feh kahaasumuu mal̥egenamu kúbooliwuubooli foof.

² Mata mal̥egenamu mummu li alolaal, ban fan mulako li alolaal boot nanoonan.

³ Ateemit Atuubaawu li Yéesu Kilisita, ammuu Añiilawu ata Atuubaawu, kujow kusenolaal káji, kabonket li kásuumaay, min uyili uloŋaal li mal̥egenamu li húbooliyahu.

Jiloŋ buloŋ bata húbooli

⁴ Súumonsuum ŋáa’ min ijukumuu kaanaku kukee li kuñooli, buloŋabu booliil bunannab li mal̥egenamu, loon Atuubaawu alobolaalumuu.

⁵ Anaale, muñeˈe lil̥awi eeni: úbooliwoolaal. Inti eluwa ewunkul likiiculi, bale eluwaayi yan uyabaalumuu yaan no li húkitumahu.

⁶ Húbooliyahu ho hommuu min uloŋaal loon siluwaasu sata Ateemit silobumuu. Li mal̥egenamu, eluwaayi yata Ateemit, loon jijam yomuu yaan no li húkitumahu, yo yommuu inye: jiloŋ buloŋ bata húbooli.

Jijuke to kámalemuu

⁷ Kúmalamiñ kameeŋe kuyiisoole kujow koono tanootan li adunaayi. Kuhoohoy koon Yéesu Kilisita labiibil min alako mal̥egen an. An loon muñaˈa okila ammuu ámalamiñ. Okila ammuu Alatoolaawu ata Kilisita.

⁸ Kama bukuluul humumuul joote jijuke to, jakum bil wahawu wan ulokaalumuu újim li bukuluul, bale min jiyab bacaam bálile.

⁹ An anabutumuu nanoonan li baliikenelabu bata Kilisita, min átij to, anawu ummu ayabut Ateemit. An anabumuu nanoonan li baliikenelabu bata Kilisita, anawu ummu layayyab Atuubaawu li Añiilawu.

¹⁰ Nokoomuu loon an abile atookuul ban aliikenutuul nab li baliikenelabu umbu bata Kilisita, jakum jiyabool booluul, ban jakum foof jisaafool.

¹¹ Mata an asaafoolumuu, anawu ummu, ummu ló li bakaanelabu boola bajakutumuu.

Hulimahu húbanumahu

¹² Libaje wah wameeŋe kalobuul, bale ifañut min ilobuul wo li eleetal. Lifañe min ibil boot booluul min ilob li bukuluul bújooŋoo, mantee li ubajaal ésuumansuum yáamak.

¹³ Bañiilabu bata Atuyi, an Ateemit al̥usumuu foof, busaafuli.