2 Kata Tesalonik 3 - Jola-Kasa

Jil̥aw boot li áloli

¹ Kutuyom, muñeˈe jil̥aw boot li áloli mantee Hulimahu hata Amaaŋenawu li hunaak huhaŋ majamo ŋáa’ ban li huluukeni tanootan loon huluukenimuu foof booluul.

² Jil̥aw foof mantee Ateemit li áfakenoli li bukanabuku kajakutumuu ban li kúl̥afut. Mata inti bukanabuku feh kufañe min kúyinen Hulimahu.

³ Bale Amaaŋenawu alobumuu kakaan wah, fan akaan wo, fan asenuul sembe ban li afooyuul li Majakutamu.

⁴ Amaaŋenawu lákaanolikaan jibaj húkangum li bukuluul kaanaku bukuluul jumbuku li kakaan wahawu wan jilobuulumuu ban let jikat kakaan wo.

⁵ Amaaŋenawu ajow akaan min jíbooli Ateemit li uyinumuul, ban li akatuul húmuñahu han Kilisita asenemuu.

Joote jilok loon áloli

⁶ Kutuyom, wahawu unwe jil̥awuul li kajaw kata Amaaŋenawu: jitey an li bukuluul afañut bulok, ban li ahoy baloŋ nab li makaanelamu man jiliikeniilumuu.

⁷ Bukuluul humumuul jihaase buu jommuu li jikaan loon áloli jikaanemuu. Mata áloli jikaanut bukan káfal̥e nan jilakumuu booluul.

⁸ Alóli jikatut an min ákuumenoli maayiiñ, bale jiloolok etihunaka jiban ehuka li buyok li sílaam ló, jakum bil akee li bukuluul ákiloli hutiñ.

⁹ Imban, tookeene min áloli jíyabum li bukuluul wah wata kalamben, bale jikaanut mo mantee li jilako bukittenoolum bajake boot li bukuluul.

¹⁰ Li mal̥egenamu, nan jilakomuu booluul jilobuulob kaanaku: «An afañutumuu min alok, jakum foof atiñ.»

¹¹ Alóli jilobuulob mo mata jijanjam kaanaku kukee li bukuluul kufañut bulok, min laññiil li kanoken li silob satookutiil.

¹² Bukanabuku umbuku áloli jumbuku li kal̥awiil ban li jiwankuleniil li kajaw kata Amaaŋenawu oololaal Yéesu Kilisita, min kubeben min kulok min kúbajum to buko humumiil wahawu wan kóotummuu kutiñ.

¹³ Kutuyom, bukuluul jakum jikat kakaan majake.

¹⁴ Nokoomuu loon an li bukuluul akaanut loon jilobuulumuu li eleetalayi inye, jílangumaasowool ban jakum an li bukuluul akoojool, mantee li asuu.

¹⁵ Bale jakum jiŋalool jikaan alatooluul. Jisaabool loon atuyaay asaabeyimuu.

Kásooniyen li kasaaf

¹⁶ Amaaŋenawu asenemuu kásuumaay, ajow asenuul akila humumool kásuumaay kanookan ban nanoonan. Amaaŋenawu ajow alako li bukuluul foofuul feh.

¹⁷ Injé Fool humumom ítuke li kaŋenom min ikiiculuul kulimaku unke min isaafuluul. Li kuŋenom humum ko likiicume kulimaku unke. Muñowu lílangumaasoyemuu sileetalasu súmbaam feh, muñaˈa foof likiicemuu eeno.

¹⁸ Kájiyaku kata Amaaŋenawu oololaal Yéesu Kilisita kujow kulako li bukuluul foofuul feh.