2 Kata Tesalonik 1 - Jola-Kasa

Kasaafoo

¹ Injé Fool, famen to Silibeŋ.

² Ateemit Atuubawoolaal li Amaaŋenawu Yéesu Kilisita kujow kúsooniyenuul ban li kusenuul kásuumaay.

Amaaŋenawu fan álaañul abil atiib adunaayi

³ Kutuyom, óloli joote jisal nanoonan Ateemit mata bukuluul jíji. Jaajak min óloli jikaan mo, mata káyinenaku kooluul li Yéesu Kilisita kunku min kuhaŋemuu malit, ban húbooliyahu han anoowan li bukuluul abajumuu li kaabuku hunhu foof min huhaŋemuu maluuk.

⁴ Mó mújimuu, áloli húmumoli li jinaak jisaloolo mooluul li sijanguwasu sata Ateemit, mata min bukuluul jítukumuu lit ban li jiloŋ li jíyinen li Yéesu, maayeet min bukanabuku kúlaamenuulumuu ban li kuyokenuul ŋáa’.

⁵ Wahawu unwu feh úhihhiis kaanaku batiibabu bata Ateemit bucoccol. Sílaamasu san jílaamemuu li so, so sommuu lí síjiwuul li jilako bukan katooke kalako li Jáyiiyaju jata Ateemit jájimuu li jóomi li sílaamasu unsu.

⁶ Li mal̥egenamu, Ateemit lakankaan Ateemit acole: fan akaan bukanabuku kálaamenuulumuu kúlaam sílaamasu san kukaanuulumuu,

⁷ ban bukuluul jammuu li sílaam fan asenuul kayool̥o, li áloli foof. Fan akaan wahawu unwu nan Amaaŋenawu koola ló kata sembe.

⁸ Yéesu fan abilum li húlaañaañ hata sambun, boot katek bukanabuku kahaasutumuu Ateemit ban li kuhoy bakaan loon Hulimahu Hásuumaahu hata Amaaŋenawu oololaal Yéesu hulobumuu.

⁹ Katekaku kan bukanabuku umbu kommuu li kubaj, ko kommuu sílaam boot nanoonan, lóyi Amaaŋenawu li sembaasu soola sáyiineniyaasu.

¹⁰ Li hunakahu unhu nan ammuu li abil, bukanabuku koola fan kúbinkenool, ban káyinenumuu li akila feh li kúgaalenool. Bukuluul humumuul fan jilako li bukanabuku umbu, mata jíyinenyinen li hulimahu han áloli jiwaalewuulumuu.

¹¹ Mó mújimuu, áloli jikatut kal̥aw boot li bukuluul. Jil̥awel̥aw Ateemit oololaal mantee li akaanuul jilako bukan katooke buloŋabu ban ahooñuulumuu boot. Jil̥awool̥aw mantee li alambenuul li sembaasu soola, min jikaan majakaamu feh man jifañumuu min jikaan, ban li akaan min baloŋelabu booluul búhiis kaanaku jibabbaj káyinen.

¹² Muñowu bukuluul jommuu li jíji kajawaku kata Amaaŋenawu oololaal Yéesu li kúbinkeni, ban okila humumool foof li ábinkenuul. Wahawu unwu feh ubilumbilum li kájiyaku kata Ateemit oololaal li kata Amaaŋenawu Yéesu Kilisita.