1 Tímote 6 - Jola-Kasa

Buloŋ bata amiikeel

¹ Bukanabuku feh kammuu li humiikeeleto koote kujok kunahaanaku kooliil bukan katooke min kuluukeni, jakum bil an alob majakut aya li kajawaku kata Ateemit li Baliikenelabu foof boololaal.

² Emiikeelayi yabajumuu kunahaan káyinene li Yéesu, jakum kubes kunahaanaku kooliil mata waa kutuyiil koom. Bale koote kuhaŋ malok jak boot li buko, mata kunahaanaku kooliil kammuu li kúbajum wah li bulokabu booliil, bukan káyinene li Yéesu koom, ban Yéesu lafañiifañ ŋáa’. Wahawu unwu lommuu li uliiken bukanabuku ban li ulobiil min kukaan wo.

Káyinen kata mal̥egen

³ Nokoomuu loon an akee aliikene wah wábuto, min akat bo kulimaku kata mal̥egen kata Amaaŋenawu kammuu baliikenelabu bakaanemuu bukanabuku kútuul Ateemit,

⁴ anawu ummu an atebenoolowe laam ban ahaasut wahoowah. Lásomuusomut li búceeŋoo ban li anaak ámuy mata kulim. To untu batahaayabu bubilumulemuu, li úmuyawu, li kúgelaku, li eyindiyoonayi yajakutumuu,

⁵ búceeŋoolabu bábaneliitumuu bata bukanabuku kata uyinumawu wacolutumuu, kahaasutumuu mal̥egen. Kuyinooyinoo li koon kátuul Ateemit senesen hubaj.

⁶ Mal̥egen, kátuul Ateemit hubaj háamak boot li an, okila balewoole li wahawu wan abajumuu.

⁷ Li mal̥egenamu, ubilutaal li wahoowah li adunaayi inye, ban let újowetumaal wahoowah nan ommuu úfulaal li yo.

⁸ Mo emmuu, ubajaalumuu hutiñolaal li wañ, li uluukenaal.

⁹ Bale bukanabuku kafañumuu min kulako kusaanum, fan kulo li jabunt. Jabuutoolaju jata kásiibo kameeŋe kata bul̥uuhoo ban kujakut, fan kujokiil. Kásiibowaku unku kuniilenemuu ban li kújimen bukanabuku umbuku.

¹⁰ Li mal̥egenamu, efañ sídalam huhaa’ hata majakut manooman. Kukee síibiisiib kubaj sídalam bil gay, li kúloyi káyinenaku min kukaanoolo buko humumiil sílaam sameeŋe.

Utaj jakum bil káyinenaku kooli kufaki

¹¹ Bale awu, ammuu an ata Ateemit, utey wahawu unwu feh. Uŋes min ulako an acole, an átuke li Ateemit, an ata káyinen, an ata húbooli, an ayilo húmuñ li an ájoobiye buyinum.

¹² Utaj jakum bil káyinenaku kooli kufaki. Ujok buloŋabu bábaneliitumuu ban Ateemit ahooñimuu boot li bo, loon awu humumi ulob momuu li kulimaku kásuumaku kan ulobumuu mata káyinenaku kooli hákil bukan kameeŋe.

¹³ Boot ilobi hákil Ateemit asenemuu buloŋ wahoowah feh, li hákil Yéesu Kilisita alobumuu kulim kásuume kata mal̥egen hákil Fons Filat, eeni:

¹⁴ ukaan jak loon kulimaku kan uyabumuu kulobumuu. Jakum util li ko tanootan ban jakum foof an ayili alob majakut aya li awu boot yok nan Amaaŋenawu oololaal Yéesu Kilisita ammuu li álaŋul.

¹⁵ Nan taŋayi yommuu li éliiŋ, Ateemit fan akaanool álaŋul, Ateemit ata kásooniyen, okila ammuu Ayíi balewool, Ayíiyawu ata kúyiiyaku, Amaaŋenawu ata kumaaŋenaku.

¹⁶ Akila bale ayilaatumuu aket, akinumuu li mawuŋe dán an ayilaat ajow. Bajut an abile ajukool, ban an ayilaatool ajuk. Kábinkenaku li sembaasu sijow silako soola boot nanoonan! Aameen.

¹⁷ Ulob bukanabuku kammuu kusaanum li adunaayi unye ooniil jakum kutebenoolo, ban jakum foof kúkangum li hubajahu unhu haatutumuu hufiyo, bale kúkangum li Ateemit asenewolaalumuu wahoowah feh ŋáa’ mantee li úbajumaal li wo kásuumaay.

¹⁸ Ulobiil ooniil kukaan majake, ban li kubaj wah wajake wameeŋe wan kukaane. Ooniil kukaan bukan kásuume ban kubajumuu wah, li kugaboo wo li kaabuku.

¹⁹ Muñowu kommuu kukaan, li kuwoogen hubaj hajake ban li hulit boot kajom, mantee li kubaj buloŋabu bata mal̥egen.

Kasaafoo kúbanum

²⁰ Tímote, ujok jak wahawu wan Ateemit asenimuu ooken. Utey elobayi yameeŋaayi yákaaneliitumuu bukanabuku kútuul Ateemit, li búceeŋoo mata wahawu wan kukee kúmalumuu koon laalu ehaasemiñ.

²¹ Kukee kakaanemuu loon kubabbaj ehaasemiñayi inyu, kúloyiloyi káyinenaku. Kájiyaku kata Ateemit kulako li bukuluul!