1 Tímote 4 - Jola-Kasa

Baliikene balet mal̥egen

¹ Buyinumabu bulollob buhant boon, li kunakaku kúbanumaku bukan kameeŋe fan kukat bo káyinenaku kooliil, min kujow kunab li uyinum wabunte, li baliikene bata uyinum wajakut.

² Fan kukat bukan kámale ban li kúhoolo min kújimeniil, bukan kan uyinumawu wooliil ukete loon eenimuu mañ máwake kuŋale min kúsu’ wó.

³ Bukanabuku umbuku kúhilehi’ ésukayi éyabowum, ban li kúhiliil foof kutiñum mutiñaay mukee. Ban Ateemit láwuwenwuwen mutiñaayamu ummu, mantee káyinenumuu li akila, kahaasumuu mal̥egenamu, li kul̥awool ban li kusalool min kutiñ mo.

⁴ Li mal̥egenamu, wahoowah feh wan Ateemit áwuwene ujaajak. Bajut wah waate uhoyi, samin ulakomuu li utiñ wo li ujand ul̥aw ban li usal Ateemit.

⁵ Mata hulimahu hata Ateemit li kal̥awaku, fan kúji wahawu unwu li ulako wah wata Ateemit.

Aloka ajake ata Yéesu Kilisita

⁶ Ukittenumuu wahawu unwu feh kutuyi, fan ulako aloka ajake ata Yéesu Kilisita. Fan úhiis kaanaku li kulimaku kasenemuu káyinen li baliikenelabu bata mal̥egenamu ban unabumuu li bo jak, lúkuumenumi.

⁷ Uhoy ukoŋawu wákaaneliitumuu bukan kúyinen li Yéesu Kilisita, wammuu wata siñaakanasu saalaasu. Ukankaanoo min unaak útuul Ateemit.

⁸ Kakaan min eniilayi elako li kásuumaay kubabbaj jáliŋ li wah watit, bale kátuul Ateemit kubabbaj jáliŋ li wahawu feh, mata kúŋaluleŋalul kásooniyen boot li buloŋabu umbe li boot li buloŋabu babilemaa.

⁹ Hulimahu unhe hulim hata mal̥egen, hatooke min bukanabuku feh kuyab ho.

¹⁰ Li mal̥egenamu, loonowaasoono li bulok súf li bútaj, mata lúkangumaakangum li Ateemit aloŋumuu, ammuu afakenaawu ata bukanabuku feh, háŋum káyinenumuu li akila.

¹¹ Ulob bukanabuku feh kulimaku unku ban li uliikeniil ko.

¹² Jakum ukat an min abesi mata min ommuu áfu’, bale ulako bukittenoolum boot li káyinenumuu, li malobelamu mooli, li makaanelamu mooli, li húbooliyahu hooli, li káyinenaku kooli li manabamu mooli.

¹³ Ujuke to min ujanga Bakiicelabu hákil ésukayi feh, uwankuleniil ban li uliikeniil bo tówum ibil.

¹⁴ Jakum ubet to kájiyaku kan Buyinumabu busenimuu, kan uyabumuu nan kufulofetaku kulobumuu mooli, li nan kunahaanaku kuŋalumuu kuŋeniil kuwalen li awu.

¹⁵ Ujooŋoo to min ukaan wahawu unwu feh. Usenoolo foofi feh boot li bulokabu umbu. Mo lommuu ukaan, bukanabuku feh li kujuk bulokabu ban ukaanumuu.

¹⁶ Ujuke to li awu humumi li baliikenelabu booli. Uhanken to jaj. Li mal̥egenamu, ukaanumuu loon muñaˈa, fan ufakenoolo awu humumi li bukanabuku kajanteneyimuu foof.