1 Tímote 3 - Jola-Kasa

Kunahaanaku kata Ejanguwayi

¹ Hulimahu unhe hulim hata mal̥egen: An li bukuluul afañumuu min alako anahaan li Ejanguwayi, anawu ummu lafañe bulok bajake.

² Anahaan ata Ejangu laate alako an, an an aatut ajuk majakut manooman li akila. Laate abaj anaale ano. Aatut awuuhen li wahoowah. Laate alako an abaje buyinum, ban li abaj buloŋ bajake. Laate foof alako an ayabe boola bukan jak ban li ayili awaale hulimahu hata Ateemit.

³ Jakum alako an ákaliyenoole mantee foof an ámuyitene bukan, bale laate akaan an ájoobiye buyinum ban li alako an abebene. Jakum lako an afañe sídalam ŋáa’.

⁴ Laate alako an ajoke butoŋool jak, ban li akaan manooman min bañoolool bútuulool li wahoowah feh.

⁵ Li mal̥egenamu, nokoomuu loon an ayilaat aaken butoŋool, buu laate ayili ajok jak Ejanguwayi yata Ateemit?

⁶ Jakum anahaan ata ejangu alako an akite li áyinen li Yéesu, letumuu mo, fan abil ateben ubandool min abaj katek loon kata Sayitaane.

⁷ Laate foof alako an, an bukanabuku káyinenutumuu li Yéesu kulobe majake kuya li akila, jakum bil ésukayi ebesool, mantee foof li alo li embaalayi yata Sayitaane.

Kujaakulaku kata Ejanguwayi

⁸ Kujaakulaku foof koote kulako bukan, kan ésukayi esuuwe ban jakum kulako bukan káhoolowe. Jakum kulako bukan kákaliyenoole, mantee foof bukan kaweelowe li sídalam.

⁹ Koote kujok jak mal̥egenamu man Ateemit áhiisumuu ban li úyinenaal li mó li buyinum bajake.

¹⁰ Koote kujand kuyoobi, ban nokoomuu loon bajut wah wajakut wajuki li buko, li kukit kuyili kulako kujaakul.

¹¹ Li manolamu, kanaalaabuku foof kammuu kujaakul koote kulako kanaale kan ésukayi esuuwe, ban jakum kunaak kúloboo bukan. Kootut foof kuwuuhen li wahoowah, ban li kulako bukan kabajut búhoolo banooban.

¹² Ajaak anoowan laate abaj anaale ano, ban laate foof ayili ajok bañoolool li butoŋool jak.

¹³ Kujaakulaku kakaanemuu bulokabu booliil jak anoowan laluukeniiluuken, ban kuyilo kulob li kabaneyiil feh mata káyinenaku kan ubajaalumuu li Yéesu Kilisita.

Mahaaseenutimuu li mulaañ muhaasi

¹⁴ Tímote, likiiculikiic kulimaku unke li kákangum ló kaanaku fan ibil ínabenuli, ban let fiyo.

¹⁵ Bale nokoomuu loon íbilaaliwut, kulimaku unke fan kújiyi li uhaas buu lommuu uloŋ eeno li butoŋabu bata Ateemit, bammuu Ejanguwayi yata Ateemit aloŋumuu, yammuu yiilayi li ekuŋayi yakegumuu mal̥egenamu.

¹⁶ Mal̥egen, ban an ayilaat aceeŋ, Mahaasutimuu mata káyinenaku koololaal mululluuk! Kilisita láfuluufulul ajuki loon an, Buyinumabu Banabaabu búhihhiis kaanaku lacoccol, ban Kumalakaaku kujukoojuk. Li kulob foof moola bata kaletumuu kusuwif, li kúyinen li akila li adunaayi feh, ban li ájowetumi boot li emitayi li máyiineni ló.