1 Tímote 2 - Jola-Kasa

Ayi jóotimuu jinaak jil̥aw boot li okila?

¹ Boot min ijand iwankulenuul min jinaak jil̥aw Ateemit boot li bukanabuku feh, li jiyaakoolool ban li jilobool wah wan jokuul li wo, li jinaak foof jisalool.

² Joote jil̥aw boot li kúyiiyaku li kunahaanaku kata ésukayi feh, mantee li ubajaal buloŋ bata kabeben li bata kásuumaay, min útuulaal Ateemit ban li uloŋaal buloŋ batooke kasal.

³ Wahawu unwu ujakumuu ban li úsuum Ateemit ammuu afakenaawu ololaal,

⁴ afañumuu min bukanabuku feh kufak ban li kuhaas mal̥egenamu.

⁵ Li mal̥egenamu, Ateemit ano bale abaje, ban foof an ano bale li áami li tutoo Ateemit li bukanabuku. Anawu ummu okila ammuu Yéesu Kilisita,

⁶ asenumuu buloŋool humum bo min acaam boot kafaken bukanabuku feh. Wahawu unwu Kilisita akaanumuu min áhiis, nan taŋayi yan Ateemit ajokumuu yommuu li éliiŋ, kaanaku Ateemit lafanfañ min bukanabuku feh kufak.

⁷ Mó mújimuu Ateemit li al̥usom min akaanom ayiiŋena li afootal, boot kaliiken bukanabuku kaletumuu kusuwif mata káyinenaku li Yéesu Kilisita li mal̥egenamu. Imálut, mal̥egen lilobe.

⁸ Lifañe kama tanootan feh, kánayinaabuku li kuteb kuŋeniil kanabe min kul̥aw, ban jakum kukaan mo li etindihuuñ ló mantee foof li búñakoo kulim ló.

Buloŋ bata anaale áyinene li Yéesu

⁹ Lifañe foof min kaalaabuku kunaak kukoko búkoko bal̥uule, balewoo to ban li kawalenoolo ló. Jakum kúsangenoolum buhec batiineniye ŋáa’, mantee éwulus li usis, mantee foof wañ waseele.

¹⁰ Bale kukaan majake, loon kanaalaabuku feh kaanumuu kútuttuul Ateemit kóotimuu kukaan.

¹¹ Anaale laate anaak alu min ajanten bawaaleyelabu, li kawalenoolo ló.

¹² Ifañut min anaale awaale, mantee foof li ágoben ánayine. Bale laate alu.

¹³ Li mal̥egenamu, Ateemit Adam lajande áwuwen, ban kit Eewa.

¹⁴ Ban inti Adam kubuntumuu, bale anaalaawu kubuntumuu min alo li kahoofoo.

¹⁵ Bale anaalaawu kabukoolaku koola fan kújiwool li afak, nokoomuu loon látuutuk lit káyinenaku li húbooliyahu, li abaj buloŋ banabe, ban li awalenoolo.