1 Tímote 1 - Jola-Kasa

Kasaafoo

¹ Injé Fool ammuu afootal ata Yéesu Kilisita li búlobum bata Ateemit humumool, ammuu Afakenaawu oololaal li Yéesu Kilisita an úkangumaalumuu li akila,

² ínje ikiiculo eleetalayi inye boot li awu Tímote, ammuu añoolom ata mal̥egen li káyinenaku: Ateemit atuubaawu li Yéesu Kilisita ammuu Amaaŋenawu oololaal, kujow kuseni káji, kabonket li kásuumaay.

Jakum jijanten bukanabuku káwaaleyeliitumuu hulimahu hata Ateemit col

³ Lifañe min ulako li ésukayi yata Efées loon ilobimuu nan ilakomuu li ijow boot Maseduwaan. Baj to bukan kaliikene ésukayi kulim kanaboolut li káyinenaku koololaal. Oon bukanabuku umbuku kukat.

⁴ Ulobiil min kukat elob mata ukoŋawu unwu, li elob mata uland waakut húwuñenum. Wahawu unwu búwonnoo babajut jáliŋ bale úŋalewul, bale ulambenut bukanabuku li káyinenaku kooliil, min kuhaas wahawu wan Ateemit ammuu li kakaan.

⁵ Wahawu wájimuu li ilobi loon muñaˈa wo wommuu min baj húbooli habilumulo li buyinum bajake, buyinum babahe li káyinen kata mal̥egen.

⁶ Kukee kukaakat bo buloŋabu umbu bacolumuu min kulo li búwonnoo babajut jáliŋ bakaaniilumuu kújim.

⁷ Li kufañ kulako kuliikena káamak kata eluwaayi yata Ateemit, bale kúnaanumut kulimaku kooliil humum ko, li wahawu wan kulobemuu mata wo li kákangum ló káamak.

⁸ Luhaasaale oonaal eluwaayi yata Móyiis ejaajak, yo baŋaleli min kaan loon elobumuu.

⁹ Uhaasaal wahawu unwe: eluwaayi ekaanuti boot li bukan kakaane majake, bale ekaanikaan to boot li kákaanikoolemuu li kákaaneliitumuu loon elobumuu. Ekaanikaan to boot li kákoliwutumuu Ateemit li kuhoofoolaaku, boot li bukanabuku kaluukenutumuu Ateemit li wahawu wanabaawu. Ekaanikaan to foof boot li kamukemuu situubayiil mantee foof sijaawiil, boot li kumuka bukan.

¹⁰ Eluwaayi ekaanikaan to boot li bukanabuku kahintowemuu li bukan kan kuyabowut, boot li kánayinaabuku kahintenemuu kufaaliil kánayine, boot li bukanabuku kájulayemuu emiikeelayi. Ekaanikaan to foof boot li kámalemuu li bukanabuku kanuulemuu ban let kukaan loon kunuulumuu, boot foof li bukanabuku káhoogulemuu baliikenelabu bata mal̥egen.

¹¹ Baliikenelabu umbe bumbu li Hulimahu Hásuumaahu hata máyiineniyamu mata Ateemit ata kásooniyen. Ateemit humumool asenom homuu.

Fool li asal Kilisita

¹² Lisale Amaaŋenawu, min ajukumuu kaanaku litottook min aŋalom min ilok boot li okila, ban li asenom sembe min ikaan bulokabu boola,

¹³ maayeet min ilob nomuu kulim kajakut iya li akila, li ílaamenool ban li ikaanool majakut. Bale Ateemit láyiyenonyiyen mata ibajeenut káyinen li akila, ban ihaasut wahawu wan ilakomuu kakaan.

¹⁴ Bale Amaaŋenawu oololaal li áhiisom másuumamu moola ŋáa’, ban li asenom káyinen li húbooliyahu hammuu li Yéesu Kilisita.

¹⁵ Hulim unhe hata mal̥egen hatooke min ésukayi feh eyab ho: Yéesu Kilisita labiibil li adunaayi boot kafaken kuhoofoola. Ban ínje humumom emmuu átinaa li kuhoofoolaabuku umbuku feh.

¹⁶ Bale wahawu unwe újimuu Ateemit li áyiyenom: lafanfañ min Yéesu Kilisita áhiisum lí ínje, ammuu átinaa li kuhoofoolaabuku feh, húmuñahu hoola háamakahu, min lako bukittenoolum boot li bukanabuku kammuu li kubil kúyinen li akila, min kubaj buloŋabu bábaneliitumuu.

¹⁷ Awu ammuu Ayíi boot nanoonan, Awu áketeliitumuu ban újukeliiti, Awu bale ommuu Ateemit, kábinkenaku li máyiineniyamu, mujow mulako mooli boot nanoonan! Aameen.

¹⁸ Añoolom Tímote, kulimaku unke lifañumuu min iseni. Kunaboonaboo li kan kufulofetaku kulob nomuu kuya li awu. Ujówum li kulimaku unku min utaj bútajabu bajakaabu,

¹⁹ li káyinenaku ló ban li buyinum babahe. Bukan kukee kuhoohoy kujanten uyinumawu wooliil, mó lí múji káyinenaku kooliil li kújim.

²⁰ Li bukanabuku umbuku, Himene buko li Alekusandul kumbuku ló. Liŋaliiŋa’ ibet li kuŋen kata Sayitaane mantee li kuhaas koon kukat kúgel Ateemit.