1 Saŋ 1 - Jola-Kasa

Hulimahu hata buloŋabu

¹ Jikiiculuukiic boot min jilobuul mata anawu ammuu Hulimahu hata buloŋabu. Hulimahu unhu hubabbaj yaan no li húkitumahu. Lujamaajam Hulimahu, ban li ujukaal ho li kúkilolaal. Li ulasowaal ho, ban li ugolaal ho li kuŋenolaal.

² Anawu ummu ammuu buloŋabu láfuluufulul, ban lujukaaloojuk. Wahawu unwu újimuu li joonowuul li elob moola, ban li jilobuul mata buloŋabu bábaneliitumuu balakomuu li Atuubaawu, báfululumuu ujukaal.

³ Wahawu wan áloli jijukumuu ban li jijam wo, wo jommuu foof li kahebuul, mantee bukuluul li áloli li ujokoolaal min ulakowaal an ano. Hujamoolahu hoololaal ho hommuu hujamoo li Atuubaawu li Añoolool Yéesu Kilisita.

⁴ Jikiiculuukiic kulimaku unke mantee ésuumansuumayi yóololi li ehaŋ maluuk boot to.

Ateemit mawuŋe

⁵ Ateemit mawuŋe. Bajut élim yanooyan li akila. Hulimahu unhu áloli jíjamummuu li Yéesu Kilisita, han jóomimuu li elobuul.

⁶ Nokoomuu loon loonaasoon lujamoolaajamoo li Ateemit ban li uloŋaal buloŋ bata élim, lúmalaamal. Ukaanutaal loon mal̥egenamu mulobumuu.

⁷ Bale nokoomuu loon luloŋaaloŋ buloŋ bata li mawuŋe loon Ateemit humumool ammuu li mawuŋe, muñeˈe no unnu lujamoolaajamoo ban húsimahu hata Añoolool Yéesu, fan hufos uhoofoolawu woololaal feh.

⁸ Oonaamuu ubajutaal kahoofoo, lubuntoolowaale ololaal humumolaal, ban mal̥egenamu mulet li alolaal.

⁹ Bale uhebaalumuu Ateemit uhoofoolawu woololaal, fan abonketolaal wo ban li áfulen majakut manooman máami li ololaal, mata lal̥egenl̥egen ban li acol.

¹⁰ Li bil oonaal ubajutaal kahoofoo, Ateemit lujokaale ámalamiñ, ban hulimahu hoola hulet li ololaal.