1 Kata Tesalonik 3 - Jola-Kasa

¹ Mó mújimuu, emmuu áloli jibilut jiyili jikob fiyo, li jijok kaanaku jaajak min jilako li ésukayi yata Ateen bálewoli,

² ban li jíboñuluul átuyolaal Tímote ammuu li bulok li áloli boot li Ateemit, li kawaaleyaku kata Hulimahu Hásuumaahu hata Kilisita. Jiboñulooboñ boot min alitenuul ban li awankulenuul min jijooŋoo to li káyinenaku kan jibajumuu li Yéesu,

³ jakum bil sílaamasu san jommuu li so síji an li bukuluul li áyeko. Bukuluul humumuul, jihaase kaanaku sílaamasu unsu lóomumaal tomuu.

⁴ Li mal̥egenamu, nan jilakomuu booluul, jilobuulob jikat to joonuul fan kúlaamenolaal. Wahawu unwu ubajumuu foof, ban bukuluul jihaase.

⁵ Wahawu unwu újimuu emmuu iyilaat ikob fiyo, li íboñul Tímote abil agel̥l̥en mata káyinenaku kooluul. Líkoliyenkoli min Sayitaane abuntuul, min bulokabu bóololi feh bulako kakaal̥o.

⁶ Bale muñeˈe, Tímote álaañumulomuu booluul, lálobolilob kulim kásuume mata káyinenaku kooluul li húbooliyahu hooluul. Li amit áanoli kama jiloŋe li jíwayil̥owoli jak, ban jifañe min jíjukoli, loon óloli foof jifañumuu min jijukuul.

⁷ Kutuyom, mó mújimuu maayeet min áloli jibajumuu buyinaabu umbu li sílaamasu unsu feh, káyinenaku kooluul kújiwolimuu li jibaj kawankulen.

⁸ Muñeˈe áloli jilaañene jiloŋ, mata bukuluul jítuutuk lit li Amaaŋenawu.

⁹ Li mal̥egenamu, jihaasut buu jóomi li jisal ŋáa’ Ateemit oololaal mata bukuluul jíji, mata ésuumansuumayi feh yan jíkaanolimuu hákilool.

¹⁰ Alóli jumbuku min jihankenemuu min jil̥awool tihunak jiban ehuka mantee li ákatoli min jilaañen jijukuul, min jihabeluul wahawu wasaŋowuulumuu bahaas mantee káyinenaku kooluul li kuhaŋ malit.

¹¹ Jow Ateemit humumool ammuu Atuubawolaal, li Amaaŋenawu oololaal Yéesu, kúsenoli bútin min jibil booluul!

¹² Amaaŋenawu akaan min húbooliyahu han jíbooliwoomuu li han jíboolimuu bukanabuku feh huhaŋ maluuk huyinno bo, loon áloli foof jíbooliwuulumuu.

¹³ Ateemit ajow aliten uyinumawu wooluul mantee li jilako bukan kanabe, li bukan kan Ateemit ammuu Atuubawolaal ajukut majakut manooman li buko, nan Amaaŋenawu oololaal Yéesu ammuu li abil li bukanabuku koola feh kanabaaku.