1 Kata Koolent 9 - Jola-Kasa

Buu Fool awaaleyemuu Hulimahu Hásuumaahu

¹ Waa iyilaat ikaan wah wásuumom? Waa ilet afootal? Kama inti Yéesu lijukumuu ammuu Amaaŋenawu oololaal? Kama inti bukuluul jommuu bulokabu búmbaam li Amaaŋenawu?

² Maayeet min kite eeni baje kukee kaane ilet afootal, bale bukuluul joote jihaas joon ínje afootal leem, mata bukuluul jammuu li Amaaŋenawu, bukuluul jíhiisumuu jak kaanaku ínje afootal.

³ Muñeˈe licahenoolowemuu hákil bukanabuku kawatatenewommuu:

⁴ Waa áloli tookut min kúsenoli jitiñ li jihob?

⁵ Wáa áloli jibajut kakaañen min anoowan li ayab anaale áyinene li Kilisita min jinaak jinaboo, loon kufootal kaabuku foof kukaanemuu, li kutuyaku kata Amaaŋenawu li Fiyeel?

⁶ Mantee ínje li Balunabaas bale jóotimuu jilok li kúŋenoli min jiloŋ?

⁷ Jibile jijam asollaali aŋale wahawu woola humum wo min acaam bulokool bata asollaali? Ayimaa abile al̥uk úbiiñ aban let atiñ kúul̥aku kata úbiiñawu. Amata buu áhobeliit míil̥amu mata bumatabu boola?

⁸ Lilollob mata wahawu wata buloŋabu bata ál̥ahukowan, bale inti wo bale úhiise wahawu wan ifañumuu ilob. Inti eluwaayi yata Móyiis foof elollob wahawu wanolawu?

⁹ Li mal̥egenamu, kikkiic li eluwaayi yata Móyiis kaanaku: «Jootut jikok butum bata húmuuna ho li etoboj edenfeteŋ». Waa, Ateemit layinooleyinoo mata kúmuuna bale?

¹⁰ Inti alolaal újiyaalumuu li alob loon muñaˈa? Kulimaku unku kukiicikiic boot li alolaal. Li mal̥egenamu, anawu awañemuu li átekulemuu edenfeteŋayi koote kukaan bulokabu booliil li kákangum ló kata fan kubaj to jooliil.

¹¹ Kaanumuu loon áloli jil̥uul̥uk li bukuluul sígul sajake sata Buyinumabu Banabaabu, waa jonsoon fíle hahah min jíbajum wah wajake li bukuluul?

¹² Nokoomuu loon baje kukee kayilo kúbajum wah li bukuluul, áloli jihaŋiil mabaj kayilaaku unku, inti mo? Alóli jiyiliyeene jikaan mo, bale jikaanut mo, min jímuñ wahawu feh jakum bil jíji Hulimahu Hásuumaahu hata Kilisita li hújowaati loon hóotimuu hujow.

¹³ Manooman jihaase kaanaku bukanabuku kalokemuu li Eluufayi yata Ateemit, ló kúyabume naak hutiñahu hooliil. Bukanabuku kasilayemuu sínuukuleŋasu li husilaahu kubajebaj jooliil li eliwayi yata sínuukuleŋasu sasilayimuu.

¹⁴ Li manolamu, Amaaŋenawu lalollob kaanaku bukanabuku kawaaleyemuu Hulimahu Hásuumaahu, koote kúloŋum li Hulimahu Hásuumaahu.

¹⁵ Liyiliyeene ikaan mo, bale ikaanut mo, ban ikiiculoot kulimaku unke mantee li íbajum tó wah ukee. Haŋe majak kama min iket! Bale an let abot lí ínje wahawu unwu wájiwommuu li ibaj kasal.

¹⁶ Ilet li ijow kasaloolo mata min iwaaleyemuu Hulimahu Hásuumaahu. Li mal̥egenamu, laalu búteb ban Ateemit akaanom. Katek kujow kulako lí ínje, ínje bahoye kawaale Hulimahu Hásuumaahu.

¹⁷ Nokooleenumuu loon ínje humumom imane min ikaan bulokabu umbu, manooman fan ibajeen bacaam, bale emmuu búteb ban Ateemit asenom, fan ikaan bulokabu ban asenommuu kakaan.

¹⁸ Kama bacaamabu búmbaam bo bommuu bay? Bo bommuu min iwaaleyemuu Hulimahu Hásuumaahu montoŋ, bagel̥l̥enut wahawu wan eeteenumuu ibaj li kawaaleyaku kan iwaaleye homuu.

¹⁹ Li mal̥egenamu, maayeet min iletumuu amiikeel ata an, li ikaanoolo amiikeel ata bukanabuku feh, bájum li íŋalul bukan kahaŋ mameeŋ boot li Yéesu Kilisita.

²⁰ Ilakomuu bulok li Kusuwifaku, fan iloŋ loon asuwif aloŋemuu mantee li íŋaluliil boot li Yéesu. Maayeet min an ayilaatumuu atuuŋom ikaan bakaanelabu bata kusuwifaku loon eluwaayi yata Móyiis elobumuu, fan iloŋ loon eenimuu li eluwaayi inyu leem, ínje li bulok li bukanabuku kakaanemuu loon eluwaayi inyu elobumuu, mantee li íŋaluliil boot li Yéesu Kilisita.

²¹ Li manolamu, ilakomuu li bukan kahaasut eluwaayi yata Móyiis, fan iloŋ loon kuloŋemuu, ban let ijuke li eluwaayi inyu yata Móyiis, mantee li iŋaliil boot li Yéesu Kilisita. Inti eeniseen mantee ínje ítuulut eluwaayi yata Ateemit, mata likaanekaan loon eluwaayi yata Kilisita elobumuu.

²² Ilakomuu li bukan kágootowe, fan iloŋ loon eenimuu ínje humumom lígootogooto, mantee li íŋalul kágootomuu boot li Yéesu Kilisita. Mó mújimuu likaanoolokaanoolo ilako wahawu feh boot li bukanabuku feh, mantee manooman li ifaken kukee li buko.

²³ Wahawu unwu feh likankaan wo bájum Hulimahu Hásuumaahu li hujami tanootan, mantee li íbajum tó júmbaam li kásooniyenaku kata ho.

²⁴ Inti bukuluul jihaase kaanaku bukanabuku kaheekoolemuu li etey li kukaakaku, foofiil feh fan kutey, bale an ano li buko ammuu li aheek min aŋa’ bacaamabu? Bukuluul foof kama jitey etey yata min jiheek min jiŋa’ bacaamabu.

²⁵ Anoowan li bukanabuku kaheekoolemuu li búteyoo, fan atek eniilayi yoola min ahoy wah wameeŋe. Ban buko kukankaan mo boot min kubaj bacaam baatut bufiyo, bale alolaal lukaanaakaan mo boot min ubajaal bacaam baatut bubil buban.

²⁶ Wahawu unwu újimuu ínje ummu li etey, bale íteyeliit ló muñaˈa. Linokoonokoo loon atekoola, bale ítekeliit ló muñaˈa.

²⁷ Liteetek eniilayi yúmbaam séngi, ban li ijok yo eeken jakum bil iwaale kaabuku Hulimahu Hásuumaahu iban, li lako ínje ílet ló li bukanabuku kammuu li kuyab bacaamabu.