1 Kata Koolent 8 - Jola-Kasa

Eliwayi yata sínuukuleŋasu sasilayimuu kuteemit kalet mal̥egen

¹ Muñeˈe mata eliwayi yata sínuukuleŋasu sasilayimuu kuteemit kalet mal̥egen, luhaasaale kaanaku «alolaal foofolaal feh lubajaale kahaasemiñ», loon jilobemuu. Bale kahaasemiñ lakaanekaan an min atebenoolo, húbooli li akaan an min ank li káyinenaku.

² An ayinoomuu li aan lahaase wah ukee, anawu ummu ahaasolut jak loon áatimuu ahaas.

³ Bale an afañumuu Ateemit, anawu ummu Ateemit lahaasool.

⁴ Muñeˈe mata bútokoñabu bata eliwayi yata sínuukuleŋasu sasilayimuu kuteemit kalet mal̥egen, luhaasaale kaanaku kuteemitaku kaletumuu mal̥egen kulet wah wata mal̥egen li adunaayi inye, ban Ateemit ano bale abaje.

⁵ Li mal̥egenamu, baje kukee kaane baje kuteemit li kumaaŋen kameeŋe li emitayi li etaamayi,

⁶ bale li alolaal, Ateemit ano bale abaje. Okila ammuu Atuubaawu, áwuwenumuu wahoowah feh, ban li uloŋaal boot li akila. Li baj foof Amaaŋen ano bale. Okila ammuu Yéesu Kilisita, an wahoowah feh úwuwenumimuu li akila, ban li úloŋumaal li akila.

⁷ Bale inti bukanabuku feh kuhaase mal̥egenamu ummu. Kukee kafuleneenumuu li ejow bata kuteemitaku kaletumuu mal̥egen, boot síyaat kuloŋe li kutokoñ eliwayi inyu loon eenimuu eliw yata sínuukuleŋ sasilayi kuteemitaku umbuku kaletumuu mal̥egen. Uyinumawu wooliil úgootogooto, ban li kujokoolo loon bukan kasikowe li eliwayi inyu.

⁸ Inti wah watiñeyi wóomi lí újiwolaal li ulakowaal hákil Ateemit. Let kaan wahoowah alolaal batiñutaal wo. Let foof ubajaal to wahoowah alolaal batiñaale wo.

⁹ Jiyilo jikaan wah wásuumuul, bale jijuke to, jakum bil bakaanelabu booluul búji bukanabuku kan káyinenaku kooliil kulitutumuu, li kulo li kahoofoo.

¹⁰ Li mal̥egenamu, nokoomuu loon an an káyinenaku koola li Kilisita kulitut, ajuki awu «jahaasumuu wah», mabahe tan kukaane ateemit alet mal̥egen min ulako hutiñ, mantee anawu ummu let ayinoo li aan layilo atokoñ eliw yata sínuukuleŋ sasilayi kuteemit kalet mal̥egen?

¹¹ Kaanumuu loon muñaˈa, atuyi ummu an káyinenaku koola kulitutumuu, «kahaasemiñaku» kooli li kújiwool li ájim, ban Kilisita lakeeket boot li akila.

¹² Jihoofoomuu loon muñaˈa kutuyuul, ban li jiliiw uyinumawu wooliil wágootomuu, jihaas joon Kilisita humumool jihoofoole.

¹³ Wahawu unwu újimuu, kaanumuu loon eliw yan itiñe yóomi li éji atuyom li alo li kahoofoo, fan ikat kale bútokoñ eliw jakum íji atuyom li alo li kahoofoo.