1 Kata Koolent 7 - Jola-Kasa

Fool li alob mata búyabo

¹ Muñeˈe mata kulimaku kan jigel̥l̥enommuu li eleetalayi yooluul, boot min eenuul jaajak min ánayine alako to bahintenut anaale.

² Bale emmuu bucagayetabu bululluuk ŋáa’, haŋe majak min ánayine anoowan abaj aseekool, anaale anoowan li abaj ánayinewool.

³ Anáyinaawu laate akaan aseekool wahawu wan ánayine áatimuu akaan aseekool. Li manolamu, anaalaawu foof laate akaan áyinool wahawu wan anaale áatimuu akaan áyinool.

⁴ Anaalaawu ayilaat akaan wah wásuumool li eniilayi yoola, mata eniilayi yoola áyinool akil yo. Li manolamu, ánayinaawu foof ayilaat akaan wah wásuumool li eniilayi yoola, mata eniilayi yoola aseekool akil yo.

⁵ Jakum an li buko kúl̥uba ahoy min kuhinto li afaalool, mantee yo yommuu buko bajamoole min kukokkoben jakee min kunaak kul̥aw Ateemit. Bale fúlum tómuu, li kulaañen kuloŋ buloŋiil bata búyabo, jakum bil kúyiliyaati kujokoo min kusen Sayitaane bútin min abuutiil.

⁶ Min ilobumuu loon muñowu, ilet li katuuŋuul min jikaan mo, bale jikaan momuu jaajak.

⁷ Li mal̥egenamu, lifañeene min bukanabuku feh kunokoo loon ínje, bale anoowan labaje káji humum ko kan Ateemit asenool. Aahe káji kaake, aaha káji kaaka.

⁸ Kulimaku unke lemmuu li ilob kayabutumuu li kayabowutumuu li kukahalaku: fan jak ŋáa’ boot li buko min kulako to muñaˈa loon ínje.

⁹ Bale jiyilaatumuu jijokoo, káyinaabuku li kuyab, kaalaabuku li kuyabo. Haŋe majak jiyab mantee jiyabo, jakum bil jísulo li kásiibo.

¹⁰ Kayabumuu li kayabomuu, hulimahu unhe lemmuu li ilobiil: anaale ayabowe aatut ábalo bata áyinool. Koote kukaan loon hulimahu unhu hulobumuu. Inti lí ínje hubilumulo, bale li Amaaŋenawu.

¹¹ Nokoomuu loon anaale ábalowe bata áyinool, jakum alaañen ayabo, mantee yo yommuu alaañ kujow kujamoo li áyinool. Li manolamu, ánayine aatut aan aseekool ábalo.

¹² Kaabuku kulimaku unke lemmuu li ilobiil: ánayine áyinene li Yéesu abajumuu anaale áyinenut ban anaalaawu li aan éehe’ kuyilo kukin, ánayinaawu aatut aan anaalaawu ábalo. Kulimaku unke ínje humumom ilob ko, inti Amaaŋenawu.

¹³ Li manolamu, kaanumuu loon anaale áyinene li Yéesu ayabowe li ánayine áyinenut, ban ánayinaawu li aan éehe’ kuyilo kukin, anaalaawu aatut aan ánayinaawu kukatoo.

¹⁴ Li mal̥egenamu, ánayinaawu áyinenutumuu, li anaalaawu oola láatummuu alako an anabe. Li manolamu, anaalaawu áyinenutumuu, li áyinool láatummuu alako an anabe. Letumuu mo, bañiilabu booliil fan bulako loon bañiil bata bukan kákaanumut li Ateemit balewool, ban li mal̥egenamu bañiil banabe koom.

¹⁵ Nokoomuu loon anawu áyinenutumuu li Yéesu afañe min kukatoo li anawu an kuyabomuu áyinenumuu, kuyilo kukatoo. No unnu ánayinaawu mantee anaalaawu áyinenumuu hoola húfule, mata Ateemit lahooñuuhooñ boot mata min jiloŋ li kásuumaay.

¹⁶ Li mal̥egenamu, awu anaalaawu luhaase mantee li ufaken ánayinaawu ooli? Awu ánayinaawu luhaase mantee li ufaken anaalaawu ooli?

Jiloŋ loon Ateemit afañumuu

¹⁷ Fúlum tomuu li wahawu unwu feh, jijok li hulimahu han ilobemuu bukanabuku li sijanguwasu feh. Hulimahu unhu ho hommuu: anoowan laate alako loon Amaaŋenawu akaanoolumuu, loon alakomuu nan Ateemit ahooñoolumuu.

¹⁸ Kaanumuu loon an lateyitey búkut nan Ateemit ahooñoolumuu, alako to loon muñaˈa. Li bil nokoo loon an ateyut búkut nan Ateemit ahooñoolumuu, jakum aŋes min atey búkut.

¹⁹ Utey búkutoo, uteyut búkutoo, bajut jáliŋ. Wahawu wabajumuu jáliŋ wo wommuu kátuul kulimaku kata Ateemit.

²⁰ Anoowan laate alako loon alakomuu nan Ateemit ahooñoolumuu.

²¹ Kaanumuu loon amiikeel lulakowe nan Ateemit ahooñimuu, jakum uyinoo wahoowah. Bale ubajumuu bútin mata mín úfu’ li humiikeeletowahu, újowum li bo min úfu’ lí hó.

²² Li mal̥egenamu, amiikeel an Amaaŋenawu ahooñe, Amaaŋenawu láfulenool aban li humiikeeleto. Li manolamu, an alet amiikeel an Kilisita ahooñe, amiikeel laam ata Kilisita.

²³ Ateemit lacancaam ŋáa’ min ánoomuluul, jakum jilaañ jilako emiikeel yata bukan.

²⁴ Kutuyom, anoowan laate alako hákil Ateemit loon alako nomuu nan ahooñoolumuu.

Fool li alob mata bukanabuku kayabutumuu, kayabowutumuu li kahokumuu kúyiniil

²⁵ Muñeˈe mata bukanabuku kayabutumuu mantee foof kayabowutumuu, ibajut hulim háfulumulo li Amaaŋenawu han éemi li isenuul. Bale boot min ihin isen kayinoolom, ínje jan káyiyenaku kata Amaaŋenawu kújimuu léemi an an joote jíkangum li akila.

²⁶ Lenseen jaajak min an alako to loon aanomuu. Sílaamasu sata muñeˈe síjimuu li ilob mo.

²⁷ Kaanumuu loon lubabbaj anaale, jakum uŋes min jikatoo. Li bil nokoo loon ubajut anaale, jakum uŋes anaale.

²⁸ Bale uyabumuu anaale, ukaanut kahoofoo. Li bil nokoo loon ásungute ahaasut ánayine ayabowe, akaanut kahoofoo. Bale bukanabuku kayabumuu fan kubaj sílaam li buloŋiil bata hunakoohunak, ban lifañeene jakum jibaj so.

²⁹ Kutuyom, wahawu wan ifañumuu ilob wo wommuu unwe: taŋayi yasaŋomuu efamut. Bukanabuku kayabumuu koote kuloŋ loon bukan kayabut, yaan muñeˈe.

³⁰ Káamimuu li jíl̥ok, li kukaan loon bukan kalet li jíl̥ok. Káamimuu li ésuumansuum, li kukaan loon bukan kalet li ésuumansuum. Káamimuu li hunoom, li kukaan loon bukan kabajut wahoowah.

³¹ Káloŋummuu li wahawu wata adunaayi, li kukaan loon kúloŋumut li wo, mata adunaayi loon yommuu, elet li efiyo ŋáa’.

³² Lifañeene min buyina banooban búfu’ li bukuluul. An ayabut fan ayinoo mata wahawu wata Amaaŋenawu. Fan aŋes min akaan Amaaŋenawu súum.

³³ Bale an ayabe, fan ayinoo foof mata wahawu wata adunaaye. Fan aŋes min akaan aseekool súum.

³⁴ Muñowu buyinumool bommuu bulako li wah úl̥uba. Li manolamu, anaale abajut ánayine mantee foof ásungute, fan ayinoo mata wahawu wata Amaaŋenawu, mata fan afañ min alako an ata Amaaŋenawu li wahoowah feh wan akaane li wan ayinoole. Bale anaale ayabowe fan ayinoo foof mata wahawu wata adunaaye. Fan aŋes min akaan áyinool súum.

³⁵ Lilollob loon muñowu boot li majake mooluul, inti boot kabuutuul min jilo li miñ, bale mantee li jikaan wahawu wahaŋumuu majak, ban li jikot Amaaŋenawu li buyinumuul feh.

³⁶ Kaanumuu loon áfu’ abaje ásungute an kujamoole boot búyabo, ban li ayinoo li aan alet li kakaan jak ásungutaawu min ayabutoomuu, ban buyinumool li bujow li ásungutaawu, ban ayilaat ajokoo, min ayinoo li aan koote kuyabo, kama li kuyabo loon afañumuu. Akaan momuu, ahoofoolut.

³⁷ Bale an ajokumuu li buyinumool kaanaku let ayab, ban an atuuŋutool, min lako okila ayinoole min akaan wah wásuumool, ban li ayili ajokoo li kásiibowaku koola, anawu ummu lakaane jak.

³⁸ Kaanumuu loon muñaˈa, anawu ayabumuu ásungutaawu an kufañoomuu lakaane jak, bale anawu ayabutumuu anaale, lahaŋe makaan jak.

³⁹ Anaale an kuyabowe li ánayine, fan kukin boot yok nan áyinool ammuu li aket. Bale áyinool aketumuu, anaalaawu layilo ajow ayabo li an an afañe. Bale anawu an kóotimuu kuyabo laate alako an áyinene li Amaaŋenawu Yéesu.

⁴⁰ Alako tomuu muñaˈa bayabowut, fan ahaŋ mabaj kásuumaay. Kayinoolaku kúmbaam ko kommuu unku, ban lenseen ínje foof libaje Buyinumabu bata Ateemit.