1 Kata Koolent 6 - Jola-Kasa

Akelecen bale áatimuu atiib akelecen

¹ Kaanumuu loon an li bukuluul jammuu ekelecen abaje elob li afaalool akelecen, buu eete kaan li abaj kakaañen min ájowetum elobayi ajow asen bukan káyinenut li Ateemit balewool kutiib, min akat bo bukanabuku kata Ateemit?

² Kama jihaasut joon bukanabuku kata Ateemit kommuu li kubil kutiib adunaayi? Ban nokoomuu loon bukuluul jóomi li jibil jitiib adunaayi, waa elob yatit bale jootutumuu jiyili jitiib?

³ Kama jihaasut joon alolaal omaalumuu li utiibaal kumalakaabuku? Háŋum wahawu wata buloŋabu umbe!

⁴ Waa wommuu lí úji li baj elob li bukuluul loon inyu, li jiŋa’ bukan kalet wahoowah hákil ejanguwayi kulako kutiiba?

⁵ Lilollob mo boot li ñisuu ñooluul. Waa hinut baj li bukuluul an ájallowe ayilo akaan bukan li bukuluul kámuye min kujamoo?

⁶ Li mal̥egenamu, mantee jaajak min an kutilibunaal li atuyool, ban mit hákil bukan káyinenut li Yéesu Kilisita?

⁷ Min fanemuu baj tilibinaal li bukuluul humumuul, yo éhiisumuu kaanaku heekuuheek li kabane. Kama wáa újiye bukuluul jifañut min kukaanuul wah wacolut? Waa kama kuyilaat kúkuuwetuul li jikat bo?

⁸ Bale bukuluul humumuul jikaanemuu wah wacolut, bukuluul jíkuuwetemuu, ban bukanabuku kan jikaane momuu kutuyuul!

⁹ Kama jihaasut joon bukanabuku kakaanemuu majakut let kunoken li Jáyiiyaju jata Ateemit? Jakum jibuntoolo: káfulowemuu li aletalet, kamanenemuu kuteemit kalet mal̥egen, kahintowemuu li bukan kan kuyabowut, kánayinaabuku kahintenemuu kufaaliil kánayine,

¹⁰ kákuuwetemuu, kaweelomuu li sídalam, kákaliyenoolemuu, káloboolemuu bukan, kabotemuu wah wata bukan, let kunoken li Jáyiiyaju jata Ateemit.

¹¹ Ban muñowu kukee li bukuluul kunokoo nomuu. Bale Ateemit oololaal lafoffos kahoofoolaku unku áfulen li bukuluul, min akaanuul to boot li akila. Li akaanuul jilako bukan kacole li kajaw kata Amaaŋenawu li Buyinumabu boola.

Jiŋa’ eniilayi yooluul min jisal Ateemit

¹² Kukee li bukuluul koone: «Liyilo ikaan wah wásuumom.» Mal̥egen! Bale inti wahawu feh ujake kakaan. Liyilo een: «Liyilo ikaan wah wásuumom», bale let ikaanoolo amiikeel ata wahoowah.

¹³ Li jinaak foof joon: «Mutiñaay lakaanikaan boot li ha’, ha’ li akaani boot li mutiñaay.» Mal̥egen! Ateemit fan abil aniilen wo úl̥uba: mutiñaayamu li halahu. Bale eniil yata ál̥ahukowan ekaanuti boot bucagayet. Eniilayi yoonosoono to boot li Amaaŋenawu, Amaaŋenawu li aano to boot li eniilayi.

¹⁴ Ateemit layitenuuyitenul Amaaŋenawu li eketayi, ban fan ayitenulolaal foof li eketayi li sembaasu soola.

¹⁵ Kama jihaasut joon siniilasu sooluul bugeb bata eniilayi yata Kilisita soom? Waa, iŋa’ leete fíle bugeb bata eniilayi yata Kilisita ijow ikaan eniil yata ecaga? Maayeet!

¹⁶ Kama jihaasut joon ánayine ahintenumuu ecaga, buko kúl̥uba fan kulako eniil yano? Li mal̥egenamu, Bakiicelabu bonsoon: «Anáyinaawu li anaalaawu fan kulako eniil yano.»

¹⁷ Bale an asenoolomuu boot li Amaaŋenawu, li kulako an ano li buyinum.

¹⁸ Jitey bucagayet! Uhoofoo waawu wan an akaane fan ulako tíyaŋ eniilayi yoola, bale an alomuu li bucagayet, li ahoofoo li eniilayi yoola humum yo.

¹⁹ Kama jihaasut joon eniilayi yooluul yommuu eluufayi yata Buyinumabu Banabaabu báamimuu li bukuluul, ban Ateemit asenuulumuu? Jikiloolowut bukuluul humumuul.

²⁰ Li mal̥egenamu, Ateemit lacancaam bacaam báamak min ánoomuluul. Mó mújimuu, joote kama jiŋa’ siniilasu sooluul min jíbinkenool.