1 Kata Koolent 5 - Jola-Kasa

Kákaanikoolaku kalakomuu li ejanguwayi yata Koolent

¹ Jamowe tanootan kaanaku babbaj kákaanikoo li bukuluul. Kákaanikoolaku unku kubajut maayeet li bukanabuku kákaanumutumuu li Ateemit balewool. Lijame kaanaku akee li bukuluul lahintenehinten anaalaawu ata atuubawool.

² Buyina booteene bujokuul, min jikesoo anawu ummu ákaanikoomuu áfu’ li bukuluul, bale jikaanut mo min bukuluul jinaak jiteben ubanduul.

³ Injé, maayeet min íloyiyuulumuu, bale buyinumom bumbu li bukuluul. Litiibe anawu ákaanikoomuu iban, loon eenimuu to leem li bukuluul.

⁴ Jiwoogumuu li kajaw kata Amaaŋenawu Yéesu, buyinumabu búmbaam fan bulako li bukuluul. Li sembaasu sata Amaaŋenawu oololaal Yéesu Kilisita,

⁵ jibet anawu ummu li kuŋen kata Sayitaane min ábuj eniilayi yoola, mantee yaalayi yoola li ebil efak li hunakahu nan Amaaŋenawu ammuu li abil.

⁶ Min jitebenemuu ubanduul loon muñaˈa, jakut maayeet! Kama jihaasut kaanaku: «Jílebiil jatit jíkaakenemuu efolayi feh yasiiwimuu.»

⁷ Jífulen élebiilayi inyu yahaanayi li bukuluul, min jiset. Jikaan momuu, fan jinokoo loon efo’ yawunkul yasiiwi yabajut élebiil. Li mal̥egenamu, Kilisita ajokimuu loon ágalalaanawu an kusuwifaku kunaake kusilamuu min kukaan kagaanaku kata Faak, lasilayi ban.

⁸ Mó mújimuu, lootaale kama ukaanaal kagaanaku kata Faakayi, ban inti li kúmbuuluwaku kabajumuu élebiilayi yahaanayi, élebiilayi yata kákaanikoolaku li búl̥afutabu, bale li kúmbuulu kabajut élebiil, kúmbuulu kata maset, li mal̥egen.

⁹ Li eleetalayi yan ikiiculuumuu, lilobuulob kaanaku jitey bukanabuku kahintowemuu li aletalet.

¹⁰ Ilobut ígiwoo ló bukanabuku kata adunaayi kahintowemuu li aletalet, kákuuwetemuu, kaweelomuu li sídalam mantee foof kamanenemuu kuteemit kalet mal̥egen. Nokoomuu loon boot min jitey bukanabuku umbuku feh, yo yommuu kama mín jífu’ li etaamaye.

¹¹ Bale likiiculuukiic min eenuul jitey an aani láyinenyinen li Kilisita, ban li anaak ahinto li aletalet, li aweelo li sídalam, li amanen kuteemit kalet mal̥egen, li anaak áloboo bukan, li anaak ákaliyenoo mantee foof li anaak ákuwet. An loon muñowu jakum jitiñum dín dáno li akila.

¹² Li mal̥egenamu, inti ínje éemi li itiib bukanabuku káyinenutumuu li Yéesu. Bale bukanabuku kan jibajumuu káyinen kano, bukuluul humumuul jóotimuu jitiibiil.

¹³ Bukanabuku káyinenutumuu li Yéesu, Ateemit ammuu li atiibiil. Jífulen li tutooluul anawu ál̥afutumuu.