1 Kata Koolent 4 - Jola-Kasa

Kufootal kata Kilisita

¹ Joote kama jíjokoli loon kuloka kata Kilisita, kan asene bútebabu bata elob mata mal̥egenamu mata Ateemit mahaasutimuu.

² Imban wahawu wan kufañumuu min an an kusene wah kakaan akaan, wo wommuu min akaan bulokabu boola jak.

³ Injé, kaanutom wahoowah bukuluul batiibelom mantee foof ínje batiibeli li hutiib hata bukan. Injé humumom ífandiit itiiboolo.

⁴ Li mal̥egenamu, bajut wah wan éemum li iwatatenoolo, bale inti wahawu unwu wommuu li úji li eeni ibajut butila. Amaaŋenawu okila ammuu li atiibom.

⁵ Mó mújimuu, jakum jitiib an tówum taŋayi éliiŋ. Jikob boot nan Amaaŋenawu ammuu li abil. Okila ammuu li áŋalul li mawuŋe wahoowah feh wayoli li élim, ban li áhiis foof uyinoolawu wan bukanabuku kuyolumuu li uyinumiil. Muñeˈe anoowan li akit áyabum li Ateemit kasalaku kammuu kutookool.

⁶ Kutuyom, wahawu wan ilobuulumuu feh, lilollob wo iya li Afolos lí ínje humumom boot li majakaamu mooluul. Lifañeene min jiliikenum li áloli wahawu wan húlobuwahu unhe hufañumuu hulob: «Jakum jikaan wah jijow jiwuuhen wahawu wakiicimuu.» An li bukuluul aatut ateben ubandool mata min alaañe bata akee min akat bo aahu.

⁷ Kama ayimaa akaani uhaŋ kaabuku? Waa lubaje wan Ateemit asenuti? Ban nokoomuu loon wahawu wan ubajumuu kusenisen wo, wáa lí úji lí óoti uteben ubandi loon eenimuu wah wan kusenuti?

⁸ Jiyaane jibaj wahawu wan jifañumuu feh! Jiyaane jikaan bukan kabaje! Jilaañe jikaan kúyii min jíkatoli bo. Lifañeene min jilako li mal̥egen kúyii, mantee áloli foof li jiyili jilako kúyii li mano li bukuluul.

⁹ Li mal̥egenamu, lenseen kama Ateemit lákaanolikaan áloli kufootalaku li foof hákil bukanabuku.

¹⁰ Alóli joonosoono bukan kawele humum hata Kilisita, bale bukuluul joonosoono bukan kájallowe li hujamoolahu hooluul li Kilisita. Alóli jígootogooto, bale bukuluul jibabbaj sembe. Bukuluul bukanabuku kuluukenuuluuken, bale áloli kúbesolibes!

¹¹ Boot yok li waatuwayi yan oomaalumee, áloli jumbuku min jicaalete, bahob li bóokoli. Jibajut búkoko, kumbuku min kútekewolimuu, ban jumbuku min jiñaahoole bomuu muñaˈa li jijow.

¹² Alóli jumbuku min jitekemuu síniiloli min jítuk li kúŋenoli min jilok. Kúgelolimuu li jísooniyeniil, li kúlaamenoli li jímuñ.

¹³ Kulobumuu kulim kajakut kuya li áloli, li jilob li buko súum. Boot yok muñeˈe, bukanabuku kújokolijok loon hin buwuuwumabu bata adunaayi, áloli jihine jommuu mabojamu mata adunaaye.

¹⁴ Ikiiculootuul kulimaku unku boot kasuuwenuul, bale boot kaliikenuul loon bañoolom ban iboolaat.

¹⁵ Mata li mal̥egenamu, maayeet min jibajeene kuliikena koono sínjunne li buloŋabu booluul li Kilisita, bale atuuba ano bale jiyilo jibaj, mata li buloŋabu booluul li Yéesu Kilisita, ínje áŋaluluumuu Hulimahu Hásuumaahu. Injé emmuu atuubawuul.

¹⁶ Muñeˈe kama lil̥awuul min jinaak jikaan loon ínje ikaanemuu.

¹⁷ Wahawu unwu újimuu li íboñuluul Tímote, ammuu añoolom an iboolaatumuu, ban li átuk lit li Amaaŋenawu. Fan awayil̥enuul buu ínje iloŋemuu li Yéesu Kilisita, loon foof liliikene bomuu tanootan li sijanguwasu feh.

¹⁸ Kukee li bukuluul kutebenteben ubandiil mata kuyinooyinoo li koon let ibil booluul.

¹⁹ Bale súumumuu li Amaaŋenawu, fan ibil booluul ban let fiyo. Nan emmuu li íliiŋul, inti kulimaku kan bukanabuku umbuku katebenumuu ubandiil léemi li ihaas, bale sembaasu san kubajumuu.

²⁰ Li mal̥egenamu, Jáyiiyaju jata Ateemit jilakowut mata kulim bale, bale mata sembe.

²¹ Waa jihaŋe mafañ? Mantee ibil boot booluul li egol ló, mantee li húbooli ló li buyinum bájoobiye?