1 Kata Koolent 3 - Jola-Kasa

Kulokaabuku kata Ateemit

¹ Kutuyom, li mal̥egenamu iyiliwut ilob li bukuluul loon bukan kabaje Buyinumabu bata Ateemit. Lilollob li bukuluul loon bukan kata adunaayi inye, loon bukan kañiilowe li káyinenaku kooliil li Kilisita.

² Míil̥ lisenuul jihob, inti mutiñaay mal̥aal̥e lisenuul, mata jiyilaateen mo jitiñ. Ban foof boot yok muñeˈe jiyilaat mo jitiñ,

³ Mata jiloŋe li jiloŋ loon bukanabuku kata adunaayi inye kuloŋemuu. Emmuu li mal̥egenamu babbaj li bukuluul batii li úmuy, inti wahawu unwu úhihhiis kaanaku bukuluul bukan kata adunaayi inye joom? Ban inti jilonloŋ loon bukanabuku kuloŋemuu?

⁴ An li bukuluul aanumuu: «Injé bata Fool lilaañe», akee li aan: «Injé bata Afolos lilaañe», jilob momuu inti jikankaan loon bukanabuku kukaanemuu?

⁵ Kama Afolos waa laam? Fool waa laam? Alóli kuloka bale joom kata Ateemit, kájiwuulumuu li jíyinen li Kilisita. Anoowan li áloli lakankaan bulokabu ban Amaaŋenawu asenoolumuu kakaan.

⁶ Injé lil̥uul̥uk, Afolos li aloose, bale Ateemit akaane min l̥iil.

⁷ Mó mújimuu anawu al̥ukumuu li anawu aloosemuu kulet wahoowah, bale Ateemit akaanumuu min l̥iil, akila ammuu wah.

⁸ Anawu al̥ukumuu kulele buko li anawu aloosemuu. Ateemit fan acaam anoowan li buko le li bulokabu ban akaanumuu.

⁹ Li mal̥egenamu, áloli kuloka joom kálokume dín dáno boot li Ateemit, bukuluul li jóomi kal̥aakaku kata Ateemit. Bukuluul jommuu eluufayi yata Ateemit.

¹⁰ Liloolok loon ateefa ata mal̥egen, naboo li kájiyaku kan Ateemit asenommuu, ban li iteef huteefahu huleeteemaahu, min akee áami li álakkenum li ho. Bale anoowan laate ajuke to min alakkenemuu eeno.

¹¹ Li mal̥egenamu, bajut huteef hukee huleeteema han an ayilo ateef hábuto li han Ateemit akaan tomuu: hammuu Yéesu Kilisita.

¹² Muñeˈe an aŋammuu éwulus, mantee ehaaliis, mantee foof kuyitik katiineniye, mantee sinuk, mantee foof mukaaw min ateef alakken li huteefahu huleeteemaahu unhu,

¹³ bulokabu boola fan bubil búfulul bujuki li hunakahu hata batiibabu. Li hunakahu unhu, Ateemit fan aŋa’ sambun min ayoob bulokabu bata anoowan, min anoowan ahaas bulok buu lakaane.

¹⁴ An an sambunasu unsu sootutumuu sikajen wahawu wan ateefumuu alakken li huteefahu unhu huleeteemaahu, anawu ummu fan ayab bacaam.

¹⁵ Bale an an bulokabu boola bommuu li búsulo, let ayab bacaam. Okila humumool fan afak, bale fan anokoo loon an áfakumulo li sambun.

¹⁶ Kama jihaasut joon bukuluul jommuu eluufayi yata Ateemit, imban Buyinumabu bata Ateemit li bukuluul bukine?

¹⁷ An akajenumuu eluufayi yata Ateemit, Ateemit fan aniilen anawu ummu, mata eluufayi yata Ateemit eñawo, ban bukuluul jommuu eluufayi yoola.

¹⁸ Jakum an li bukuluul abuntoolo. An li bukuluul ayinoomuu li aan lababbaj bújallowabu bata adunaayi inye, laate kama alaañenoolo an awele, bánum li alako li mal̥egen an ájallowe,

¹⁹ mata bújallowabu bata adunaayi inye, bul̥uuhoo hákil Ateemit. Li mal̥egenamu, Bakiicelabu bonsoon: «Ateemit li butuukowabu bata kájallomuu, lájokumeyiilumuu.»

²⁰ Bakiicelabu bonsoon foof: «Amaaŋenawu lahaase uyinoolawu wata kájallomuu, lahaase aan uyinoolawu unwu ubajut jáliŋ.»

²¹ Mó mújimuu, jakum an asaloolo mata bukan kúji, mata wahawu feh wooluul:

²² lako Fool, lako Afolos mantee foof Fiyeel, lako adunaayi, lako buloŋabu, lako eketayi, lako wah wata muñeˈe mantee foof wammuu li ubil, wahoowah feh wooluul.

²³ Ban bukuluul Kilisita akiluul, Kilisita Ateemit li akilool.