1 Kata Koolent 16 - Jola-Kasa

Sídalam saseni boot kalamben káyinenumuu li ésukayi yata Yeelusalem

¹ Muñeˈe mata sídalamasu sasenimuu boot li bukanabuku káyinenumuu li Yéesu kammuu li ésukayi yata Yeelusalem, bukuluul foof jinab li kulimaku kan isenumuu bukanabuku kata sijanguwasu sammuu li etaamayi yata Galasi.

² Dímaasoodimaas, anoowan li bukuluul laate áfulen sídalam naboo li wahawu wan abajumuu, ahahen jata so boola. Jikaan mo jakum bil íliiŋul, li jikit jijow kayinoo káfulen sídalam jisen.

³ Nan emmuu li íliiŋul, fan iboñ li sileetal ló bukanabuku kan bukuluul humumuul jommuu li jil̥us, kújowetum wahawu wan jommuu li jisen boot Yeelusalem.

⁴ Nokoomuu loon tottook mín ínje humumom foof ijow, fan jinaboo jijow.

Wahawu wan Fool afañumuu kakaan

⁵ Boot min íjowum Maseduwaan min íhaaŋul boot booluul, (mata leete íjowum li etaamayi inyu).

⁶ Nakee fan ilako booluul kunak kafamut, mantee foof li ikaan bo taŋayi feh yata kutontaku, bájum li jilambenom min iyili ijow banooban ban emmuu li ifañ min ijow.

⁷ Mata ñaañe, ifañut min ijukuul bale ínje li ejow. Lifañe min ilako booluul jakee, kaanumuu loon Amaaŋenawu lafanfañ.

⁸ Bale boot min ilako li ésukayi yata Efées boot yok li hunakahu hata kagaanaku kata Fantokot,

⁹ mata libabbaj tó bútin bata kakaan bulok báamak, maayeet min kulatoolaaku kumeeŋumuu.

¹⁰ Tímote abilumuu, li jikaan wahoowah jakum abaj kákoli kanookan booluul. Ummu li bulok boot li Amaaŋenawu loon ínje.

¹¹ Jakum an li bukuluul abesool. Bale jilambenool min ajow kañaahoolaku koola li kásuumaay, mantee li aban li álaañul atookulom, mata ínje li kutuyolaal jumbuku li kakobool.

¹² Atuyolaal Afolos, liwankulenewoowankulen ñameeŋe mata min abil booluul li kutuyolaal kaabuku, bale afañut min afan abil muñeˈe. Nan ammuu ayili abil, fan abil.

Kasaab kúbanum li kasaafoo

¹³ Jijuke to, jítuk lit li káyinenaku kooluul. Jíyanki, jibaj sembe.

¹⁴ Jikaan wahoowah li húbooli ló.

¹⁵ Manooman jihaase Sitefaan boot li butoŋool ló. Jihaase foof kaanaku li etaamayi yata Akaay, buko kujandumuu kúyinen li Yéesu Kilisita, ban li kunaak kulok boot li bukanabuku káyinenumuu li Yéesu Kilisita. Kutuyom, ínje ummu li kal̥awuul,

¹⁶ min jikat bukan loon umbuku, li bukanabuku feh kammuu li bulok súf li buko, min kumatuul.

¹⁷ Súumonsuum ŋáa’ li ebilayi yata Sitefaan, Folitiin li Akayikis. Nan ijukiilumee, bukuluul foof lijuke jalet tomuu.

¹⁸ Kútintimbenontintimben min buyinumom bubah, loon kútintimbenuulumuu foof. Joote jiluuken bukan loon umbuku.

¹⁹ Sijanguwasu sammuu li etaamayi yata Aasi sisaafuluul. Akilaas buko li Filisila li Ejanguwayi yawoogemuu booliil, kusaafuluul ŋáa’ li kajaw kata Amaaŋenawu.

²⁰ Kutuyolaal feh kammee baabe kusaafuluul. Jisaafoo kasaafoo kata batuyaay.

²¹ Injé Fool lisaafuluul. Li kaŋenom lítuke min ikiiculuul kulimaku unke.

²² An afañutumuu Amaaŋenawu, anawu ummu katek kujow kulako li akila. Maalanata — Ubil, Amaaŋen óololi!

²³ Kájiyaku kata Amaaŋenawu Yéesu kujow kulako li bukuluul.

²⁴ Líbooliwuubooli bukuluul foofuul feh li kajaw kata Yéesu Kilisita.