1 Kata Koolent 15 - Jola-Kasa

Kayitowulaku kata Kilisita li eketayi

¹ Kutuyom, lifañe min iwayil̥enuul Hulimahu Hásuumaahu han iwaalewuulumuu. Jiyayyab ho ban foof li jítuk ho lit.

² Li ho foof Ateemit áfakenumuulumuu, nokoomuu loon jijoojok ho loon liwaalewuul homuu. Letumuu mo, káyinenaku kooluul kubajut jáliŋ.

³ Li mal̥egenamu, bukuluul lijandumuu iliiken wahawu wan ínje humumom iyabumuu, wammuu: Kilisita lakeeket mata uhoofoolawu woololaal úji, loon Bakiicelabu bulobumuu.

⁴ Lahokihok jow baj kunak kúhaaji, Ateemit li ayitenumulool li eketayi, loon foof Bakiicelabu bulobumuu.

⁵ Nan ayitowumulomuu li eketayi, li áfu’ Fiyeel, ban li áfu’ foof kufootalaku.

⁶ Fúlum tó, li áfu’ kúgoomaku koola kahaŋe síteemeel hutok, li mano. Kukee li buko kukete, bale kameeŋe li buko kumbuku li buloŋ.

⁷ Nan fúlum tómuu, li áfu’ Saak ban kit kufootalaku feh.

⁸ Nan áfulumuu kaabuku feh aban, li ábanum lí ínje, ínje janokoomuu loon añiil abuki tówum taŋool éliiŋ.

⁹ Li mal̥egenamu, ínje ihaŋumuu matiti li kufootalaku feh. Itookut maayeet ñano min ihooñi afootal, mata lílaamenlaamen Ejanguwayi yata Ateemit.

¹⁰ Bale kájiyaku kata Ateemit kújimuu li eeno loon emmee. Ban min áyiyenommuu li kájiyaku koola, inti kakaal̥o. Mata liloolok ihaŋ kufootal kaabuku feh. Bale inti ínje iloke, li mal̥egenamu, kájiyaku kan Ateemit asenommuu kulambenom ikaan bulokabu umbu.

¹¹ Mo emmuu, lako ínje, li lako buko, Hulimahu unhe Hásuumaahu áloli jiwaaleˈemuu, ho unhe foof bukuluul jíyinenumuu li ho.

Kayitowulaku koololaal li eketayi

¹² Kaanumuu loon áloli jiwaaleˈewaale kaanaku Kilisita layitowuuyitowul li eketayi, kama wáa wómmuu lí úji kukee li bukuluul li koon kaketumuu let kubil kuyitowumul li eketayi?

¹³ Nokoomuu loon mal̥egen kaketumuu let kubil kuyitowumul li eketayi, kama Kilisita humumool ayitowumuloot li eketayi.

¹⁴ Ban kaanumuu loon Kilisita ayitowumuloot li eketayi, kama kawaaleyaku kóololi kubajut jáliŋ, káyinenaku kooluul foof kubajut jáliŋ.

¹⁵ Nokoomuu loon mo, kama áloli foof jímalemal jil̥oof Ateemit, mata jonsoon layitenuuyitenul Kilisita li eketayi, ban kama ayitenumulootool li eketayi, nokoo loon mal̥egen kaketumuu let kuyitowumul li eketayi.

¹⁶ Li mal̥egenamu, nokoomuu loon kaketumuu let kuyitowumul li eketayi, kama Kilisita foof ayitowumuloot li eketayi.

¹⁷ Ban kaanumuu loon Kilisita ayitowumuloot li eketayi, káyinenaku kooluul kubajut jáliŋ. Jiloŋe kama li uhoofoolawu wooluul.

¹⁸ Yo yommuu foof kama káyinenumuu li Kilisita ban li kuket, kújinjim bándoo.

¹⁹ Nokoomuu loon kákangumaku koololaal li Kilisita li buloŋabu umbe bale kubaje jáliŋ, kama alolaal uhaŋaalumuu máyiyeni li bukanabuku feh.

²⁰ Bale li mal̥egenamu, Kilisita layitowuuyitowul li eketayi. Li kaketumuu feh, okila ammuu átinaa li kayitowul li eketayi, min íhiis kaanaku kaabuku foof kaketumuu fan kuyitowumul li eketayi.

²¹ Mata emmuu eketayi li an ano ebilummuu, mo foof kayitowulaku li eketayi kubilummuu li an ano.

²² Loon Adam ájimuu bukanabuku li kunaak kuket, mo foof Kilisita ájimuu bukanabuku li kóomi li kuyitowumul li eketayi.

²³ Bale anoowan labaje tan ayitomuu li kacaal̥aku: Kilisita ammuu átinaa li kayitowulaku li eketayi, ban bukanabuku kata Kilisita fan kuyitowumul li eketayi nan ammuu li álaañul.

²⁴ Fúlum tómuu, wahawu feh li ukit uban, nan Kilisita ammuu li aniilen uyinumawu feh wajakutumuu, li huhaane hanoohan, li sembe sanoosan aban, li alaañen Jáyiiyaju asen Ateemit Atuubaawu.

²⁵ Li mal̥egenamu, Kilisita laate alako áyii boot yok nan Ateemit ammuu li aheek kulatoolawool feh, ban li aŋaliil asenool ákakul.

²⁶ Alatoolaawu ásolaawu an ammuu li aniilen, okila ammuu eketayi.

²⁷ Li mal̥egenamu, Bakiicelabu bonsoon: «Ateemit lakaanookaan wahawu feh ákakul.» Bale min Bakiicelabu boonumuu «wahoowah feh», lakowut boot li Ateemit ló, mata okila akaanumuu Kilisita wahoowah feh ákakul.

²⁸ Muñeˈe nan wahawu feh wommuu li ukaani li kuŋen kata Kilisita, okila humumool ammuu Añiilawu fan alako li kuŋen kata Ateemit aŋalumuu wahawu feh akaan li kuŋenool, mantee Ateemit li alako wahoowah li anoowan feh.

²⁹ Fan jiyinoo bukanabuku kábatiiseyeyimuu boot li kaketumuu: wáa újiye li kukaan mo? Nokoomuu loon mal̥egen kaketumuu let kuyitowumul li eketayi, wáa lí úji li kunaak kúbatiiseyi boot li kaketumuu?

³⁰ Ban alolaal humumolaal, wáa újimuu waatuwoowaatu buloŋolaal li boono li mákoyileniye?

³¹ Kutuyom, hunakoohunak lilakowelako li iket. Wahawu wan ilobumuu ulakolako mal̥egen loon foof súumonsuum li bukuluul mata bulokabu ban Amaaŋenawu oololaal Yéesu Kilisita ammuu li kakaanaku.

³² Nokoomuu loon bútajabu ban itajumuu li sínukuleŋasu sata li bujal li ésukayi yata Efées, li kayinoo kata ál̥ahukowan bale lítajum bo, jáliŋ buu léemi li ibaj to? Kaanumuu loon mal̥egen kaketumuu let kuyitowumul li eketayi, kama loon húlobuwahu hulobumuu: «Utiñaal ban li uhobaal, mata kajom fan uketaal.»

³³ Jakum jibuntoolo: «Kanaboo li bukan kajakut, lakajenekajen an ajake.»

³⁴ Jílaañul jikaan uyinumuul jak, ban li jikat kahoofoo. Li mal̥egenamu, kukee li bukuluul kuhaasut Ateemit. Lilobuulob mo boot li ñisuu ñooluul.

Eniilayi yata kayitowumulomuu li eketayi

³⁵ Bale akee fan agel̥l̥en aan: «Buu kaketumuu kóomi li kuyitowumul li eketayi eeno? Siniil buu kóomi li kubaj?»

³⁶ Min úbaamo muñowu! Kama an al̥ukumuu ekool teetaam, inti fan eket tówum el̥iilul?

³⁷ Wahawu wan ommuu li ul̥uk, let anuunukenawu ammuu li al̥iil, bale ekool humum yo, lako yata edenfeteŋ mantee foof yata wah ukee.

³⁸ Ateemit fan asen ekoolayi inyu eniil yan ammuu li afañ, li asen ekool yanooyan eniilayi yata yo.

³⁹ Wahawu waloŋumuu feh ubajut eniilayi yanolayi: bukanabuku kubaje eniilayi yooliil, bánuukuleŋabu bubaje yata bo, basuuwabu bubaje eniilayi yata bo, siwolasu li sibaj yata bo.

⁴⁰ Wahawu wammuu li emitayi ubaje bóonowabu bata wo, wammuu li etaamayi foof li ubaj wata bo. Wahawu wammuu li emitayi bóonowabu bata wo li majakamu mata wó múbute li mata wammuu li etaamayi.

⁴¹ Banakabu bubaje kaleñaku kata bo, hul̥eeñahu li hubaj kata ho, bawuutabu foof li bubaj kata bo. Ban maayeet bawuutabu kaleñaku kata bo kúbutoolebutoo.

⁴² Muñowu emmuu li bil nokoo nan kaketumuu kommuu li kuyitowumul li eketayi. Eniilayi ehokimuu li etaam, ekankaan eniil yakajene. Nan yommuu li eyitowumul li eketayi, li ekaan eniil yayilaat ekajen.

⁴³ Eniilayi yahokimuu li etaam égootogooto, ebajut sembe. Eniilayi yayitowumulomuu li eketayi éyiineniyiineni ban li ebaj sembe.

⁴⁴ Eniilayi yahokimuu li etaam ekankaan eniil yata adunaayi, yayitowumulomuu li eketayi ekankaan eniil yan Buyinumabu Banabaabu busene buloŋ.

⁴⁵ Li mal̥egenamu, Bakiicelabu bonsoon: «Anawu átinaalawu ammuu Adam, labiibil akaan búwuwenum baloŋe», bale Adam ásolaawu okila ammuu Buyinumabu basenemuu buloŋabu.

⁴⁶ Let ammuu Buyinumabu ammuu átinaalawu, bale ammuu ál̥ahukowan, ban kit ammuu Buyinumabu.

⁴⁷ Anawu átinaalawu li ekafayi yata etaamayi Ateemit ajuul̥umool, ál̥ubutawu akila li emitayi labilumulo.

⁴⁸ Bukanabuku kabilummuu li etaamayi, kunokoonokoo li anawu an Ateemit ajuul̥ummuu li ekafayi yata etaamayi. Bukanabuku kammuu li kujow li emitayi kunokoonokoo li anawu abilummuu li emitayi.

⁴⁹ Ban min uŋalaamuu kambuwaku kata anawu ajuul̥umimuu li ekafayi yata etaamayi, mo foof lomaamuu ubil uŋalaal kambuwaku kata anawu abilummuu li emitayi.

⁵⁰ Kutuyom, wahawu unwe lifañumuu min ilob: eniilayi inye yata ál̥ahukowan eyilaat enoken li Jáyiiyaju jata Ateemit, loon foof wah wakajene uyilaatumuu ulako li wah wákajeneliit.

⁵¹ Boot min ilobuul wah wahaasuti: let ololaal foofolaal feh óomi li uketaal, bale alolaal foofolaal feh siniilasu soololaal fan síbutoo.

⁵² Wahawu unwu fan ubaj yaan li ñano, hi’ loon an amoye, nan kasiinaku kúsolaaku kommuu li kul̥oki. Li mal̥egenamu, nan kasiinaku kúsolaaku kommuu li kul̥oki, bukanabuku kaketumuu fan kuyitowumul li eketayi min kulako bukan kayilaat kuket. Alolaal jaamaalumuu li buloŋ, siniilasu soololaal fan siyaan síbutoo.

⁵³ Li mal̥egenamu, wahawu wakajenemuu woote ulako wah wákajeneliit, wahawu waketemuu li ulako wah wáketeliit.

⁵⁴ Nan wahawu wakajenemuu wommuu ulako wah wákajeneliit, min wahawu waketemuu ulako wah wáketeliit, no hulimahu unhe han Bakiicelabu bulobumuu hommuu li hubaj: «Ateemit laheeheek eketayi, laniilenniilen yo bándoo.

⁵⁵ Aa eketaye, kama kaheekaku kooli kit kunkay? Kama katahaku kooli kunkay?»

⁵⁶ Katahaku kata eketayi ko kommuu kahoofoolaku, ban kahoofoolaku eluwaayi esen ko sembe.

⁵⁷ Bale usalaal Ateemit, ásenumolaamuu kaheekaku li Amaaŋenawu!

⁵⁸ Kutuyom kan iboolaat, mó mújimuu jítuk lit ban jakum jíwanwangoo. Jihanken nanoonan min jiŋa’ uyinumuul feh jikaan li bulokabu bata Amaaŋenawu, mata jihaase joon bulokabu bayoonenimuu ban jommuu li kakaanaku boot li Amaaŋenawu, inti kakaal̥o.