1 Kata Koolent 14 - Jola-Kasa

Ujíyawu wata Buyinumabu Banabaabu woote ulamben bukanabuku feh

¹ Jijand jiŋes húbooli. Jiŋa’ uyinumuul feh jikaan li újiyawu wata Buyinumabu Banabaabu, háŋum kájiyaku kata min Ateemit álobum li bukuluul.

² Li mal̥egenamu, an alobe silob sahaasuti, alobut li bukanabuku, bale li Ateemit lalobe, mata let baj an ammuu ajam waa lalobe. Fan álobum wah wan an ahaasut li sembaasu sata Buyinumabu.

³ Bale afulofet, fan alob li bukanabuku min akaaniil kank li káyinenaku kooliil, li awankuleniil, li átintimbeniil foof.

⁴ An alobe silob sahaasuti, káyinenaku koola bale ko lalitene, bale afulofet, káyinenaku kata ejanguwayi foof yo feh lalitene.

⁵ Lifañeene min bukuluul foofuul feh jilob silob sahaasuti, bale lihaŋe mafañ min Ateemit álobum li bukuluul. Li mal̥egenamu, afulofet lahaŋe mabaj jáliŋ an alobe silob sahaasuti, mantee yo yommuu kama min akee akitten waa anawu alobumuu silob sahaasuti alobe, mantee ejanguwayi foof yo feh li elit li káyinenaku kata yo.

⁶ Kutuyom, muñowu ibilumuu booluul íliiŋul li ilob li bukuluul li silob san jihaasut, jáliŋ buu léemi li ibaj li bukuluul? Let íjaliŋuul wahoowah, mantee yo yommuu ínje bakitteneluul hulim han Ateemit alobom, mantee wah wan ihaase, mantee hulim habilumulo li Ateemit, mantee foof li iliikenuul wah ukee.

⁷ Muñowu nokoomuu li kal̥ok ehombol li kawel ekontiŋ. Ehombolayi el̥okutimuu jak, mantee foof ekontiŋayi etekuti jak, buu bukanabuku koote kuyili kahaas kawelaku kata yanooyan li so?

⁸ Li bil nokoo loon al̥oka egeg al̥okut yo jak, ayi aate afale boot ejow hutiik?

⁹ Bukuluul foof manolamu! Jilobumuu kulim kan an ayilaat ajam, buu an aate ayili ahaas waa jilobe? Jilollob jibeten.

¹⁰ Baje silob sameeŋe li etaamayi sábutoole, ban so feh baje wah wan silobe.

¹¹ Bale ijamutumuu elob yan an aŋale min alob lí ínje, anawu ummu alobumuu elobayi inyu, ajawoola laam boot lí ínje, ínje foof li éemi ajawoola boot li akila.

¹² Bukuluul foof mo manolamu! Emmuu jifanfañ ŋáa’ újiyawu wata Buyinumabu Banabaabu, jihaŋ maŋes újiyawu wayilimuu ulamben Ejanguwayi feh min yank li káyinenaku.

¹³ Wahawu unwu újimuu, an alobe silob sahaasuti laate al̥aw Ateemit min asenool kájiyaku kata kaheb ésukayi waa silobasu unsu silobe.

¹⁴ Il̥áwummuu li silobasu unsu, buyinumabu búmbaam bumbu li mal̥egen li kal̥aw, bale butuukowabu búmbaam bulet ló.

¹⁵ Muñowu kama buu léemi li ikaan? Fan íl̥awum li buyinumom, bale foof fan íl̥awum li butuukowom. Fan ikijenum li buyinumom, bale foof fan ikijenum li butuukowom.

¹⁶ Mata nokoomuu loon luŋaŋŋa’ buyinumi bale min usal Ateemit, an ahine áami li huwoogahu min aano li bajanten let ahaas waa lulobe. Muñowu buu lammuu li akaan min ayili aan «Aameen» li kal̥awaku kooli kata kasalaku?

¹⁷ Li mal̥egenamu, maayeet min kal̥awaku kooli kata kasalaku kukite kujak majak, bale aahu kal̥awaku kooli let kulambenool min ank li káyinenaku koola.

¹⁸ Lisale Ateemit min ihaŋuulumuu foofuul feh elob li silob sahaasuti.

¹⁹ Bale Ejanguwayi ewoogumuu, lihaŋe mafañ min ilob kulim hutok bale kan ésukayi ejame min iliikeniil to wah ukee, ínje balobe kulim koono sínjunne kuŋen li silob sahaasuti.

²⁰ Kutuyom, jakum jinokoo li bañiil li mayinelamu mooluul. Nokoomuu loon mata kakaan majakut, jilako bañiil, bale loon mata kayinoo, jilako kunahaan.

²¹ Li Bakiicelabu, Amaaŋenawu lansaan ló: «Li bukan kalobe elob yan kuhaasut, léemummuu li ilob li bukanabuku kúmbaam. Fan ilob li buko li utum wata ejawoola. Bale maayeet mo, bukanabuku kúmbaam let kujantenom.»

²² Mó mújimuu, kájiyaku kata elob silob sahaasuti kulakolako búhiisenum bata batiib boot li káyinenutumuu, bale kulet búhiisenum bata batiib boot li káyinenumuu. Kájiyaku kata elob kulim kan Ateemit asene an, ko búhiisenum koom kata kásooniyen boot li káyinenumuu, bale kulet búhiisenum bata kásooniyen boot li káyinenutumuu.

²³ Kama nokoomuu loon ejanguwayi foof yo feh ewooge, bukanabuku feh li kulob silob sahaasuti, ban bukan kahaasut to wahoowah li bukan káyinenut li kúnokenul ló, inti fan koon bukuluul kúkowuul kúsuumut?

²⁴ Bale nokoomuu loon Ateemit lálobunlobum li bukuluul foofuul feh, ban an áyinenut mantee foof an ahaasut wahoowah li ánokenul ló, wahawu wan ajamumuu fan újiwool li ahaas kaanaku akila ahoofoola laam, ban li ukaanool alaañen ayinoo mata buloŋabu boola jak.

²⁵ To untu wahawu wayolomuu li buyinumool fan úfulul li mawuŋe. Muñeˈe fan ákuntuŋ min aŋa’ buulool aya teetaam min amanen Ateemit aan: «Ateemit ummu li mal̥egen li bukuluul!»

Wahoowah woote ul̥uul li Ejanguwayi

²⁶ Kutuyom, kama muñeˈe boot min een buu? Nan jiwoogemuu, an li bukuluul abajumuu kakijen, layilo akijen ko. An li abaj wah wan áami li aliiken bukanabuku, li alob wo. An li abaj wah wan Ateemit áhiisool boot li bukanabuku, li alob wo. An foof li abaj hulim han áami li asen bukanabuku li elob yahaasuti, li alob ho. Li bil nokoo loon an ayilo átiiw hulim halobi li elob yahaasuti min bukanabuku kuhaas ho, li átiiw hó. Wahawu unwumaa feh, woote ukaani boot kalamben Ejanguwayi min yank.

²⁷ Nokoomuu loon boot min jilob silob sahaasuti, bukan kúl̥uba mantee foof kúhaaji bale li kúlobul, ano li ano, ban akee li akitten ésukayi waa kulobumuu.

²⁸ Bajutumuu an ayilo akitten ésukayi wah walobi li silob sahaasuti, kama anawu alobemuu li silob sahaasuti li alu, min alob li akila humumool, li Ateemit.

²⁹ Muñeˈe kufulofetaku, bukan kúl̥uba mantee kúhaaji li buko koote kuŋa’ hulimahu min kulob min kaabuku kutiib wahawu wan kulobumuu.

³⁰ Bajumuu an akee ábuto abah ló an Ateemit asene hulim, átinaalawu alakomuu elobayi laate alu.

³¹ Bukuluul foofuul feh jiyilo jilob ano li ano hulim han Ateemit asenuul, bájum bukuluul foofuul feh li jiliikenum to wah, ban li jíbajum to kawankulen.

³² Kufulofetaku koote kuhaŋ sembe kájiyaku kooliil unku kan Ateemit aseniilumuu.

³³ Li mal̥egenamu, Ateemit alet Ateemit ata búguul̥oo, bale Ateemit ata kásuumaay laam. Loon kaanemuu li sijanguwasu feh sata bukanabuku kata Ateemit,

³⁴ Kanaalaabuku koote kulu li sijanguwasu. Kubajut kakaañen min kúlobul, bale koote kuluukoo min kujanten loon eluwaayi yata Móyiis elobumuu.

³⁵ Kufañumuu min kuhaas wah, li kugel̥l̥en kúyiniil booliil, mata colut min anaale álobul li huwoog hata ejangu.

³⁶ Waa, jonsoon fíle Hulimahu hata Ateemit booluul húfulumulo? Bale waa jonsoon booluul bale húliiŋulo?

³⁷ An li bukuluul ayinoomuu li aan akila afulofet laam, mantee foof kulimaku kan alobemuu li Buyinumabu Banabaabu kubilumulo, laate kama ahaas aan wahawu wan ikiiculuulumuu, hulim hata Amaaŋenawu.

³⁸ An ahaasut yomuu, Ateemit foof let ahaasool.

³⁹ Kutuyom, mó mújimuu wahawu wan jóotimuu jihaŋ mafañ, wo wommuu min Ateemit álobum li bukuluul, bale jakum jíhi an álobum silob sahaasuti.

⁴⁰ Bale wahawu feh woote ukaani li majake li mal̥uule.