1 Kata Koolent 12 - Jola-Kasa

Ujíyawu wata Buyinumabu Banabaabu

¹ Muñeˈe ulobaal mata újiyawu wata Buyinumabu Banabaabu: Kutuyom, lifañe min jihaas mata mal̥egenamu mata újiyawu unwu.

² Jihaase kaanaku nan jilakowutumuu ekelecen, jibuutobuuto bata kuteemitaku kaletumuu mal̥egen, kayilaatumuu kúlobul maayeet.

³ Wahawu unwu újimuu, lifañe min jihaas kaanaku anoowan álobume li Buyinumabu bata Ateemit, ayilaat aan: «Katek kujow kulako li Yéesu!» Ban an foof ayilaat aan: «Yéesu ammuu Amaaŋenawu!» akila bálobumuloot mó li Buyinumabu Banabaabu.

⁴ Baje úji wanoowan wábutoole, bale Buyinumabu banolabu busene wo.

⁵ Ulokawu boot li Amaaŋenawu umemmeeŋ ban li úbutoo, bale Amaaŋenawu anolawu ésukayi elokemuu boot li akila.

⁶ Ulokawu wájaahalenimuu umemmeeŋ ban li úbutoo, bale Ateemitawu anolawu akaane womuu feh li bukanabuku feh.

⁷ Buyinumabu Banabaabu bubaje buu búlokumemuu li anoowan, li káji boot li majakaamu mata bukanabuku feh.

⁸ Buyinumabu fan busen akee káji kata bújallo li elob, aahu Buyinumabu banolabu li busenool hulim hata kahaasemiñ.

⁹ Akee, Buyinumabu banolabu li busenool káji kata káyinen, aahu bo banolabu li busenool káji kata kafaken bukan li úsomut.

¹⁰ Akee Buyinumabu li busenool kayile min anaak akaan bújaahalenum, aahu li busenool káji kata min naak Ateemit álobum li akila, akee foof li busenool káji min anaak ahaas wah wabilumulo li Buyinumabu Banabaabu li wah wabilumulo li uyinumawu wajakutumuu. Akee Buyinumabu li busenool káji kata min alob silob sahaasuti, aahu li busenool káji kata min ayili akitten bukanabuku waa silobasu unsu silobe.

¹¹ Wahawu unwu feh Buyinumabu banolabu bukaane wo. Bo busene anoowan káji kábute, loon bufañumuu.

Bukanabuku káyinenumuu li Yéesu eniil yano koom

¹² Li mal̥egenamu, eniil hugumb hano yoom, maayeet min ekite ebajumuu ugeb wameeŋe, ban maayeet min ugebawu wata yo umeeŋumuu, bale wo feh eniil yano woom. Mo foof Kilisita anokoomuu.

¹³ Li manolamu, alolaal foofolaal feh lúbatiisewaalibatiise li Buyinumabu banolabu min ukaanaal eniil yano, oono asuwif mantee ulet asuwif, oono amiikeel mantee foof ulet amiikeel. Foofolaal feh Ateemit lakaanolaakaan uhobaal li Buyinumabu banolabu.

¹⁴ Li mal̥egenamu, eniilayi inti bugeb bano bale ebaje, ebaje ugeb wameeŋe.

¹⁵ Nokoomuu loon kaataku koone: «Emmuu ínje ilet kaŋen, kama ilet ló li eniilayi», mantee fan jí kó li kúlakowaati li mal̥egen bugeb bata eniilayi?

¹⁶ Li bil nokoo loon ejanayi yoone: «Emmuu ínje ilet jíkil, kama ilet ló li eniilayi», mantee fan jí yó lí élakowaati li mal̥egen bugeb bata eniilayi?

¹⁷ Nokooleenumuu loon eniilayi foof yo feh jíkil yoom, buu yooteen ekaan min enaak ejam? Li bil nokoo loon foof yo feh ejan yoom, buu yooteen ekaan min enaak eciiŋen?

¹⁸ Li mal̥egenamu, Ateemit lakankaan bugeb banooban li eniilayi loon akila humumool afañumuu.

¹⁹ Kaaneenumuu loon ugebawu unwu feh ukankaan bugeb bano, mantee fan lako eniil?

²⁰ Mó mújimuu baje ugeb wameeŋe, bale eniil yano.

²¹ Jíkilaju jiyilaat joon kaŋenaku: «Jokutom li awu!» Húkowahu huyilaat hoon kootaku: «Jokutom li bukuluul!»

²² Esin ugebawu wata eniilayi wakaanumuu loon úgootogooto, wo uhaŋumuu mabaj jáliŋ.

²³ Ugebawu wata eniilayi wan uyinoolaamuu loonaal wo ubajut jáliŋ ŋáa’, wo luhaŋaalemuu majok jak. Wasuunenimuu wo luluukenaalemuu.

²⁴ Ugebawu wata eniilayi wan an ayilimuu ajuk wo jokutolaal min uluukenaal wo loon muñaˈa. Bale Ateemit lakankaan eniilayi ban li akaan min bukanabuku kuhaŋ maluuken ugebawu wasuunenimuu.

²⁵ Lakankaan mo jakum bil baj bugiiloo li eniilayi, bale ugebawu unwu feh wábutoomuu, ulambenoolambenoo.

²⁶ Bugeb bano bata eniilayi bulakomuu li sílaam, ugeb waawu feh fan úlaam unaboo li bo. Li bil nokoo loon bugeb bata eniilayi bubaje kasal, ugeb waawu feh fan ubaj ésuumansuum unaboo li bugebabu umbu.

²⁷ Bukuluul foofuul feh, bukuluul jommuu eniilayi yata Kilisita, ban anoowan li bukuluul bugeb bata eniilayi inyu laam.

²⁸ Mó mújimuu, Ateemit li ajand akaan li Ejanguwayi kufootal, fúlum tó, kuliikena bukan hulimahu hoola, ban kakaanemuu wah wájaahaleniye, ban kabajumuu káji kata kafaken bukan li úsomutawu wooliil, fúlum tó, kabajumuu káji kata kalamben bukan, ban kabajumuu káji kata kaaken ejangu, ban kit kabajumuu káji kata elob silob sahaasuti.

²⁹ Inti bukanabuku feh kóomi kufootal, inti bukanabuku feh kóomi kufulofet, inti foof bukanabuku feh kóomi kuliikena bukan hulimahu hata Ateemit. Inti bukanabuku feh kubaje káji kata kakaan wah wájaahaleniye.

³⁰ Inti foof bukanabuku feh kubaje káji kata kafaken bukan li úsomut, inti bukanabuku feh kubaje káji kata elob silob sahaasuti. Inti foof bukanabuku feh kubaje káji kata kakitten silobasu unsu sahaasutimuu buu silobe.

³¹ Mó mújimuu, jiŋes li uyinumuul feh újiyawu wahaŋumuu feh. Muñeˈe, boot min íhiisuul bútinabu bahaŋumuu útin waawu feh.