1 Kata Koolent 11 - Jola-Kasa

¹ Jiliikoo lí ínje, loon ínje humumom iliikoolemuu li Kilisita.

Anaale laate ásoolo akila li kal̥aw

² Injé ummu li kasaluul min jiwayil̥owewommuu li wahoowah feh, li min jinabemuu li kulimaku kúmbaam loon ilobuulumuu.

³ Bale lifañe min jiliitiken wahawu unwe: Kilisita ammuu húkowahu hata ánayine anoowan. Anáyinaawu li aano húkowahu hata aseekool. Ateemit li aano húkowahu hata Kilisita.

⁴ Anáyine áhimenumuu húkowool akila li kal̥aw mantee foof akila li elob ésukayi hulim han Ateemit asenool, ánayinaawu ummu lasuuwensuuwen Kilisita.

⁵ Li bil nokoo loon anaale ásoolowut akila li kal̥aw mantee foof li elob ésukayi hulim han Ateemit asenool, anaalaawu ummu lasuuwensuuwen áyinool. Lanokoonokoo li anaale awuulowe.

⁶ Kaanumuu loon anaale ásoolowut, kama yo yommuu foof ámiito! Bale emmuu suunenisuuneni min anaale awuulo mantee foof li ámiito, kama laate ásoolo.

⁷ Anáyine áatut ásoolo, mata akila ammuu kambuwaku kata Ateemit li máyiineniyamu moola. Bale anaalaawu akila ammuu máyiineniyamu mata ánayinaawu.

⁸ Li mal̥egenamu, ánayinaawu áwuwenumulooti li anaalaawu, bale anaalaawu áwuwenumimuu li ánayinaawu.

⁹ Ban ánayinaawu áwuwenuti boot li anaalaawu, bale anaalaawu áwuwenimuu boot li ánayinaawu.

¹⁰ Wahawu unwu újimuu, humum hata kumalakaaku, anaalaawu laate abaj li húkowool wah wáhiise kaanaku látuttuul áyinool.

¹¹ Li buloŋabu boololaal li Amaaŋenawu, loon ánayine abajumuu jáliŋ li anaale, mo foof anaale abajumuu jáliŋ li ánayine.

¹² Mata loon anaale áwuwenumimuu li ánayine, mo foof ánayine abukumeyimuu li anaale, ban wahawu unwu feh li Ateemit ubilumulo.

¹³ Jijuke bukuluul humumuul min jijuk: mantee jaajak min anaale alako to muñaˈa básoolowut akila li kal̥aw Ateemit?

¹⁴ Bóono bata ál̥ahukowan búhihhiis kaanaku suunenisuuneni min ánayine abaj wal wabaake.

¹⁵ Bale anaale abajumuu wal wabaake, kasal. Li mal̥egenamu, anaale Ateemit lasenoosen wal wabaake min ulako búhimenum bata húkowahu hoola.

¹⁶ An afañumuu min alaañen áwonnoo mata hulimahu unhu, ahaas aan áloli jibajut bakaane bakee, ban sijanguwasu sata Ateemit foof sibajut bakaane bakee.

Hutiñahu hata Amaaŋenawu

¹⁷ Li wahawu wan emmuu li ilobuul, iyilaat isaluul, mata min jiwoogemuu jíwoogoliit boot kakaanoo majake, bale boot kakaanoo majakut.

¹⁸ Wahawu útiyaalawu wo wommuu, nan jiwoogemuu bajebaj bugiiloo li bukuluul, loon ijamumuu, ban líyinenyinen jakee kaanaku mal̥egen.

¹⁹ (Wáa úji? Li mal̥egenamu, éetiseeti baj bugiiloo li bukuluul, mantee bukanabuku káyinenumuu li mal̥egen li kuhaasi.)

²⁰ Nan jiwoogemuu, let hutiñahu hata Amaaŋenawu jitiñemuu.

²¹ Li mal̥egenamu, jijowumuu jiwoog boot hutiñ, anoowan li bukuluul li ayaan asommen atiñ hutiñahu hoola, min lako kukee kucaalete, kaabuku li kúkali.

²² Kama inti anoowan li bukuluul labaje eluuf? Wáa újiye let jiyaan jinaak jitiñul bo li jíhobul bo? Bale waa, jibebbes Ejanguwayi yata Ateemit, ban li jifañ min jisuuwen kabajutumuu? Waa jifañe min ilobuul to? Leete fíle isaluul? Maayeet! Let isaluul.

²³ Li mal̥egenamu, wahawu unwe Amaaŋenawu aliikenommuu, ban wo foof lemmuu li iliikenuul: Amaaŋenawu Yéesu, li ehukaayi nan kubetoolumuu li kuŋen kata bukan, laŋaŋŋa’ húmbuulu,

²⁴ min asal Ateemit aban, li amuncul ho ban li aan: «Laale eniilayi yúmbaam, yammuu boot li bukuluul. Jikaan loon muñeˈe min jinaak jiwayil̥owom.»

²⁵ Li manolamu foof, nan kutiñumuu kuban, li aŋa’ ejunkayi min aan: «Ejunkayi inye yo yommuu húfaalumahu huwunkulahu han Ateemit ákaanummuu li húsimahu húmbaam. Jikaan loon muñaˈa nanoonan nan jihobe li yo, min jiwayil̥owom.»

²⁶ Li mal̥egenamu, kulimaku unku kan Amaaŋenawu Yéesu alobumuu kúhihhiis kaanaku nanoonan nan jitiñe húmbuuluwahu unhu ban li jihob ejunkayi inyu, jiyiiŋene eketayi yata Amaaŋenawu, boot yok nan ammuu li abil.

²⁷ Wahawu unwu újimuu an atokoñumuu húmbuuluwahu unhu, ban li ahob li ejunkayi li makaane masalut Amaaŋenawu, fan akaanoolo kahoofoo li eniilayi li húsimahu hata Amaaŋenawu.

²⁸ Anoowan li bukuluul laate ajukeloolo okila humumool átowum atokoñ húmbuuluwahu unhu ban li ahob li ejunkayi inyu.

²⁹ Mata an atokoñumuu húmbuuluwahu unhu ban li ahob li ejunkayi akila bahaasut aan laalu eniilayi yata Amaaŋenawu, anawu ummu láŋaluloŋa’ katek akaanoolo akila humumool nan atokoñumuu húmbuuluwahu unhu ban li ahob li ejunkayi inyu.

³⁰ Wahawu unwu újimuu bukan kameeŋe li bukuluul li kúsomut kaabuku li kúgooto, ban kameeŋe li kuket.

³¹ Ujandaalumuu ujukeloolowaal jak alolaal humumolaal, Ateemit let atiibolaal.

³² Bale Amaaŋenawu latiibewolaatiib min acolenolaal, jakum bil ujowaal li sambun li mano li bukanabuku kata adunaayi.

³³ Kutuyom, wahawu unwu újimuu nanoonan nan jiwooge boot hutiñ hutiñahu hata Amaaŋenawu, li jikoboo.

³⁴ An li bukuluul acaaletumuu li atiñul boola, jakum jibil jinaak jiwoog, li jíŋalul katekaku kata Ateemit jikaanoolo. Wah waawu, nan emmuu li íliiŋul, li ilobuul mata wo.