1 Kata Koolent 10 - Jola-Kasa

Wahawu wabile ubajumuu kata Isilayeel li kayiinaayaku

¹ Kutuyom, lifañe min jiwayil̥o kaanaku li taŋayi yata Móyiis, situubawolaal sihaan sinaanaak sijow sinab li kafaal kanaake kufooyiilumuu, ban buko foofiil feh li kújowum li husamuwahu Hájunkaahu kúfu’ baaba.

² Buko foofiil feh nokoonokoo loon kúbatiisewumibatiise li kafaalaku li foof husamuwahu min kubaj hujamoo li Móyiis.

³ Buko foofiil feh kutintiñ mutiñaayamu manolamu, man Ateemit aseniilumuu mabilummuu li emitayi.

⁴ Ban buko foofiil feh, kuhohhob foof malamu manolamu man Ateemit aseniilumuu. Li mal̥egenamu, kunaanaak kuhob li hugisaahu han Ateemit anaake akaanumuu hunab li buko. Hugisaahu unhu, ho hulakomuu Kilisita.

⁵ Bale Ateemit súumutool li kahaŋumuu mameeŋ li buko, wahawu unwu újimuu li kuket kuban kayiinaayaku feh.

⁶ Wahawu unwu feh ubabbaj, min ulako bukittenoolum boot li ololaal, jakum bil ukataal kásiibo kajakut min kuhaŋolaal sembe loon buko.

⁷ Jakum foof jinaak jimanen kuteemit kalet mal̥egen loon kukee li buko kunaake kukaanumuu. Loon Bakiicelabu bulobumuu: «Esúkayi enaanaak ebah min etiñ eban li ehob, ban li eyito éwayeen.»

⁸ Alolaal jakum ulowaal li kákaanikoo loon kukee li buko kukaanumuu, min bukan koono sínjunne áyii li síhaaji kuket hunak hano.

⁹ Jakum foof úgecaal Amaaŋenawu loon kukee li buko kukaanumuu, min sinuukayila silumiil min kuket.

¹⁰ Jakum jinaak jímummunoo loon kukee li buko kukaanumuu, min amalakaawu ata eketayi aniileniil.

¹¹ Wahawu unwu feh ubabbaj min ulako bukittenoolum boot li kaabuku. Ukiicikiic kat to, min bilum alolaal aamaalumuu li buloŋ li taŋ yan uhaase oon buloŋabu bumbu li buban, li uliikenumaal to wah.

¹² Mó mújimuu an ayinomuu li aan layitoyito, laate ákaanum jakum bil alo.

¹³ Sílaamasu san jibajumuu, so foof kukee kubajemuu. Bale Ateemit álobeliit aban li añak alaañ búsol, ban let akat min jilo li sílaam sahaŋuul sembe. Nan sílaamasu sommuu li jilowuul, fan asenuul sembe min jiyili jímuñ, li asenuul foof bútin min jífu’ lí só.

¹⁴ Kutuyom kan iboolaat, wahawu unwu újimuu jikat kamanen kuteemitaku kaletumuu mal̥egen.

¹⁵ Lilollob li bukuluul loon bukan kata uyinum. Jiyinoo bukuluul humumuul min jijuk kulimaku kan ilobuulumuu.

¹⁶ Jiyinoo ejunkayi yata kásooniyenaku yájimuu li unaak usalaal Ateemit. Inti nan uhobaale lómuu ekaanewolaakaan ubajaal hujamoo li Kilisita humum hata húsimahu hoola háyuwimuu boot li alolaal? Húmbuuluwahu han umunculoolaalemuu, inti nan utokoñaale homuu hukaanewolaakaan ubajaal hujamoo li Kilisita humum hata eniilayi yoola yacoocimuu boot li alolaal?

¹⁷ Húmbuulu hano bale hubaje, ban maayeet min kite eenimuu lumeeŋaameeŋ, bale eniil yano loomaal, mata alolaal foofolaal feh lutokoñaatokoñ li húmbuuluwahu hanolahu.

¹⁸ Fan jijuke kata Isilayeel: inti bukanabuku katokoñemuu eliwayi yata sínuukuleŋasu sasilayimuu Ateemit, kujamoojamoo li Ateemit?

¹⁹ Waa lifañe ilob to? Mantee eliwayi yata sínuukuleŋasu san kusilayemuu kuteemit kalet mal̥egen wah ukee éjaliŋe, mantee foof kuteemitaku humum ko kaletumuu mal̥egen wah ukee kújaliŋe?

²⁰ Maayeet! Boot min eenuul wahawu unwu wan kusilayemuu, li mal̥egenamu uyinum wajakut kusilaye wo, inti Ateemit kusilaye wo. Ban ifañut min jilako an ano li uyinum wajakut.

²¹ Jiyilaat jihob li mano li ejunkayi yata Amaaŋenawu li yata uyinumawu wajakutumuu. Jiyilaat jitiñ li mano li buyinjaayabu bata Amaaŋenawu li bata uyinumawu wajakutumuu.

²² Waa fíle, jifanfañ min jígec Amaaŋenawu? Jiyinooyinoo li joon luhaŋaale Amaaŋenawu sembe?

Ukaanumuu wah li ukaan wo boot li kasal kata Ateemit

²³ Kukee li bukuluul koone: «An layilo akaan wah wásuumool.» Mal̥egen! Bale inti wahawu feh ujake kakaan. «An layilo akaan wah wásuumool», bale inti wahawu feh uyilo ukaan bukanabuku min kank li káyinenaku kooliil.

²⁴ Jakum an aŋes majake boot li akila bale, bale aŋes majake boot li kaabuku.

²⁵ Jiyilo jitiñ eliw yanooyan feh yan kújulaye li malise, ban jakum jigel̥l̥enoo bay eliwayi inyu ebilumulo, jakum bil an abaj to kayinoo kakee.

²⁶ Mata loon Bakiicelabu bulobumuu: «Amaaŋenawu akile etaamayi li wahawu feh wáami lómuu.»

²⁷ An áyinenut li Yéesu ahooñuulumuu hutiñ, ban li joon éehe’ min jijow, wahoowah wan ammuu asenuul li jitiñ wo. Jakum jigel̥l̥enoo bay wahawu unwu úfulumulo, jakum bil an abaj to kayinoo kakee.

²⁸ Bale an aanuulumuu: «Eliwayi inye yata énuukuleŋ yawaaseni kuteemit kalet mal̥egen», jakum jitokoñ yo humum hata anawu ummu alobuul momuu, jakum bil an abaj to kayinoo kakee.

²⁹ Inti mata wahawu wan bukuluul jiyinoo tomuu lilobe, bale mata kayinoolaku kata aahu. Waa wommuu li úji li ikaan wah hákil an, wáami li újiwool li abaj to kayinoo kakee min ájowum to atiibom, ban liyiliyeene ikaan wo?

³⁰ Nokoomuu loon lisassal Ateemit mata wahawu wan itiñumuu, wáa lí úji an láati awatatenom mata mutiñaayamu ummu man ísalummuu Ateemit?

³¹ Mó mújimuu, jítiñoo li jíhoboo, wahoowah wan joote jikaan, li jikaan wo feh boot li máyiineniyamu mata Ateemit.

³² Baloŋelabu booluul jakum búji bukan li kulo li kahoofoo, lako kusuwif, mantee bukan kalet kusuwif, mantee foof bukanabuku kata ejanguwayi yata Ateemit.

³³ Jikaan loon ínje. Liŋeseŋes min ikaan bukanabuku feh súumiil li wahoowah feh. Iŋesut majake múmbaam bale, bale majakaamu mata bukanabuku feh, mantee li kufak.