Zefania 3 - MUKANDA USANDU WA ZAMBI 1975

¹ Lamba kuli chihulia yoze halichisa, chihunda cha kupinjisa akwo!

² Kapanjikile ku liji nilimwe, katayile kumufumba, kafulielele Yehova, kakundamine kuli Zambi yenyi.

³ Akwa kuyula muchima lienyi kapwa ngwe ndumba a kuhiohia. Ngaji jenyi ngwe tungunga a ha chingoloshi waze kahichikile nichimwe ndo chimene.

⁴ Aprofeta jenyi alelu, akwa mafwefwe; asasendote jenyi kakuchisa yuma yisandu ni kutangula shimbi.

⁵ Yehova muchima lienyi mukwa ululi, kalingile nichimwe chipi. Tangwa ha tangwa chimene upatwilo wenyi wa kulita unasoloka; ha kucha cha tangwa keshi kuhona, alioze akwa uhenge keshi sonyi.

⁶ Hinasutula mavungu; yipanga yo ya mawe yinapuzuka. Hinenyeka matapalo jo, chocho niumwe keshi kwendelamo. Yihunda yo hiyalumuka ya hululu; kumushi mutu; kumushi mwenyayo.

⁷ Nambile ngwami, Manguvwila woma, matayiza kumufumba, chocho chichi kamuteta kuma kwa kutwama chipwe namwaha kastigu. Alioze akalishile mbunge jo nikuchisa yitanga yo yeswe.

⁸ Kashika Yehova kanambe ngwenyi, Ngutwaminyine ndo tangwa lize mungumana ngwe chela. Mumu chize hinapatula mu mbunge ngwami, Kukunga mavungu nikukungulula mawanangana hanga ngukaazukwile ufwatulo wami; kusasaminya cheswe cha utenu wami. Mumu akwa hashi eswe makajimuka mu kahia ka ufwatulo wami wa ukwa.

⁹ Ha mwaka uze mungwalumuna kuhanjika cha mavungu chikapwe kuhanjika chipema hanga eswe akatongole jina lia Yehova nikumulingila ni mbunge yimuwika.

¹⁰ Sali lize lia njiji ja Etiopia akwa kungwita, mwana wa pwo atu jami a kumwanga makaneha mulambu wami.

¹¹ Ha tangwa lize kechi kunukolesa sonyi ha mukunda wa yitanga yize nwangukatukilile nayo; mumu ha mwaka uze munguchiza hakachi kenu waze akulisamba ni kulengumuka cho, ni yenu kunuchi kulizata nawa mu mulundu wami usandu.

¹² Mumu munguhichika hakachi kenu atu akulikehesa ni kushimbika. O makafupa chiswamo mu jina lia Yehova.

¹³ Waze malisalaho mu Izalele kechi kalinga chipi nichimwe. Kechi kahanjika mahuza; chipwe kuwana mu makanwa jo limi lia kwonga. Mumu makawana kelo; makapomba; niumwe makaakolesa woma wakuhi.

¹⁴ Ena mwana-pwo Zaione, imba ni liji linene. Ena Izalele, kololoka! Ena mwana-pwo Yerusaleme wahilila ni kulikwiza ni mbunge ye yeswe.

¹⁵ Yehova hachiza uhiso uze wa kulimika ni yena; hambila akwa kole je. Mwanangana wa Izalele, mwe Yehova mwali muli yena; kuchi kevwa nawa woma wa yuma yipi.

¹⁶ Ha tangwa lize makamba ku Yerusaleme ngwo, Ena Zaione, kanda wivwa woma; moko je kanda ahonga.

¹⁷ Yehova Zambi ye mwali muli yena, mwe ka jita yoze wakuhana kukumba. Kumakevwa kuwaha ni yena ni chiseke chinji; kumakakuhuzulula mu zango lienyi; kumakalikwiza ni yena ni miaso ya tachi

¹⁸ ngwe ha tangwa lia chiwanyino. Mungukachiza lamba kuli yena chocho kuchikevwa nawa luchoko walio.

¹⁹ Ha mwaka uze mungukasopesa waze eswe akukupinjisa. Mungukalamwina mukwa kupalita; mungukakungulula waze aahumine. Waze aakolesele sonyi hashi heswe, mungwapwisa uhaliso, ni jina lia lufuma.

²⁰ Ha mwaka uze mungukanunjisa; mungukanukungulula; mumu mungukanupwisa jina lia lufuma ni uhaliso hakachi ka mavungu eswe a hashi muze mungukuhilwisa kuwaha chenu ku meso jenu. Chocho kanambe Yehova.