Zefania 2 - MUKANDA USANDU WA ZAMBI 1975

¹ Enu akwa vungu kulishi sonyi, Swilenu mu chikungulwila,

² shimbu kanda akolesa shimbi; shimbu tangwa kanda Upalika ngwe yizungu; shimbu utenu usasu wa Yehova kanda unuwana; shimbu tangwa lia ufwatulo wa Yehova kanda linuwana.

³ Enu eswe akwa kulikehesa mu chifuchi akwa kulinga shimbi jenyi; fupenu Yehova, fupenu ululi, fupenu kulikehesa cha mbunge. Hanji manusweka ha tangwa lia ufwatulo wa Yehova.

⁴ Mumu Ngeza muyipwa ya hululu; ni Asekalone muyalumuka ya kulungunga; akwa Ashedode ma: huma ha tangwa ha muchima; ni Ekrone mayitukula.

⁵ Lamba kuli yenu nwatwama ku mbaka, enu akwa vungu lia A-Cherete! Liji lia Yehova Malimika ni yenu, enu A-Kanana, chifuchi cha A-Filistea. Mungukanwonwona ndo niumwe mwenyembo kechi kasalako.

⁶ Ni yenu yifuchi ya ku mbaka, munwalumuka ulilo wa yimuna, ni yana ya tufunga ni malimba a yimuna.

⁷ Mbaka muyipwa chihinga cha masalila ja munyachi wa A-Yunda kuze Analishila yimuna. Mu mazuwo ja Asekalone mapomba ha chingoloshi; mumu Yehova Zambi yo maewuluka ni kwahilwisa kuwaha cho.

⁸ Hinevwa kuchoka cha Moape, ni kutukana cha A-Amone, chize hachoka atu jami nikulizata kulimika ni chifuchi cho.

⁹ Yehova-wa-Tujita, Zambi ya Izalele kanambe ngwenyi, Kashika, ni mwono wami Moape malumuka ngwe Sondome, ni A-Amone mapwa ngwe Ngomora, chifuchi cha kutakana ni mikalale ni matenga a mungwa, chifuchi cha hululu ndo ku miaka. Masalila ja atu jami maapupa, ni atu jami aze alisalaho maazuka.

¹⁰ Chino muchipwa nicho mumu ha kulengumuka cho; mumu ha kulenya ni kulizata kulimika ni atu a Yehova-wa-Tujita.

¹¹ Yehova mapwa kole ni woma ha kulimika no. Ewa, makahongesa mazambi eswe a hashi, mba yifuchi yeswe ya mavungu makahetamina kuli iye, mweswe kuma kwenyi.

¹² Ni yenu nawa A-Etiopia kumunukafwa ni katana kami.

¹³ Kumakolola kwoko lienyi ku Norte nikwonwona Asuria; kumakapwisa Ninive ya hululu; chifuchi cha kwenyeka chau, ngwe puya.

¹⁴ Yimuna makapomba hakachi kacho, tushitu eswe a mavungu; ni makuyu, ni chisekele kumakapomba ha masongo a manguji jenyi. Liji lio mulikahiohia mu njanela jako, ndo ku yikolo mukupwa kwa hululu, mumu makafukula milimo yenyi ya sedru.

¹⁵ Che chihunda cha kulilengela acho, chize chatwamine kawape nikwamba kuli iye mwene ngwenyi, Yami uno, kukushi mukwo. Hamwenyeka Chichize! Chiswamo cha ngongo! Waze eswe anapalikako kanasozana nikuhungisa moko.