Zefania 1 - MUKANDA USANDU WA ZAMBI 1975

¹ Liji lia Yehova lize liejile kuli Zefania mwana Kushi, mwana Gedalia, mwana Amaria, mwana Hezekia, ha matangwa a Josia mwana Amone mwanangana wa Yunda.

² Yehova kanambe ngwenyi, Mungukakomba liakulu yuma yeswe hashi.

³ Mungukakomba atu ni tushitu. Mungukakomba tujila a mu tetela, ni yishi a mu kalunga-lwiji, ni yitalingiso, ni yingulungulu. Mungukasutula e atu lume hashi. Chocho kanambe Yehova.

⁴ Mungukolola kwoko liami kulimika ni Yunda ni kulimika ni akwa Yerusaleme eswe. Mungukateta masalila ja Mbale kuma kwo kuno, ni lie jina lia asasendote ja mahamba,

⁵ waze ha mafulumba kakulihetamina ku mbunga ya mwilu; waze akulihetamina nikulishinga ni Yehova, hindu kakulishinga ni Malekame,

⁶ waze hanalitwamina kukaula Yehova; kafupile Yehova, chipwe kumuhula.

⁷ Holenu kumeso ja Mwene Yehova, mumu tangwa lia Yehova hiliakundama hakamwihi; Yehova hanalulika yitapo ni kusela ku usandu ngeji jenyi.

⁸ Mba ha tangwa lia chitapo cha Yehova— munguhana kastigu kuli akwa chiyulo ni ana ja mwanangana, ni waze eswe akuzala mazalo a tundaka.

⁹ Ha tangwa lize mungulamba kastigu mweswe mukwa kutumbuka chikuli ni waze akuzalisa mazuwo ja akako ni upupilo ni wiji.

¹⁰ Yehova kanambe ngwenyi, Ha tangwa lize makevwa muteto ku chikolo cha yishi, ni mbimbi ku chihanda chamuchiali, ni zungo linene ku milundu.

¹¹ Lilenu mbimbi enu nwatwama ku Makateshi, mumu akwa kusepa hahwako, waze eswe akupezalisa prata haatetako.

¹² Ha mwaka uze mungupolongoza mu Yerusaleme ni ndeya. Mungulamba kastigu malunga waze anenguluka ni kutoha; waze akwamba mu mbunge jo ngwo, Chipwe chipema, chipwe chipi, Yehova kechi kalinga nichimwe.

¹³ Mapunda yikumba yo; menyeka mazuwo jo. Chipwe matunga mazuwo kechi katwamamo. Chipwe matumba miuva, kechi kanwa vinyu yayo.

¹⁴ Tangwa linene lia Yehova linakundama; linakundama fuji-fuji. Chizungozungo cha tangwa lia Yehova chisasu; kwenako akwa ndundo mateta ni lijilinene.

¹⁵ Tangwa lize lia ufwatulo; tangwa lia kupinda ni kulifwita; tangwa lia kwenyeka ni kukuwisa; tangwa lia milima ni kulendama; tangwa lia malelwa ni milima pwi;

¹⁶ tangwa lia liji lia chitavwi ni kukalumioka cha jita kulimika ni yihunda ya kukolesa; cha kulimika ni yipanga-ya-mawe yisuku.

¹⁷ Hali atu mungukokela kupinda, chocho kumakenda ngwe tupuputa, mumu hanavulumuna Yehova. Makazukula manyinga jo ngwe fufuta, ni musunya wo ngwe tuji.

¹⁸ Ha tangwa lia ufwatulo wa Yehova kechi kahasa kulipulula chipwe ni prata yo, chipwe ni oru yo. Mu kahia ka ufwatulo wenyi wa ukwa hashi heswe muhaliwa, mumu makasulisa akwa hashi eswe liakulu, susumuku lume.