Zakaria 9 - MUKANDA USANDU WA ZAMBI 1975

¹ Chikuma cha liji lia Yehova chalimika ni chifuchi cha Hadrake; kumuchikatula ha Ndamaseku. Mumu meso ja atu ni ja minyachi yeswe ya A-Izalele kuli Yehova ali.

² Ni Hamate nawa, chifuchi chize chalihata nacho, ni Teru ni Sendone, chipwe ali ni mana anji.

³ A-Teru halitungila chipanga-cha-mawe. Hanalilumbikila prata ngwe fufuta; hanalilumbikila oru ngwe mavu a ha matapalo.

⁴ Hindu Mwene makamuchiza yikumba yenyi; makambila upite wenyi mu kalunga-lwiji ni che chihunda makachocha ni kahia.

⁵ Asekalone makachimona; makevwa woma; ni Ngeza nawa mba makalifwita ni yikola. Ni Ekrone nawa mumu kutalatala chenyi hichafuwa. Mwanangana wa Ngeza makafwa; Asekalone makasala keshi ni atu.

⁶ Amwe atu keshi chinyingi makatwama mu Ashedode, mba mungukasulisa kulengumuka cha A-Filistea.

⁷ Mungukachiza manyinga mu kanwa lienyi, mungukachiza chuma cha lwaji hakachi ka mazo jenyi, neye nawa makapwa ngwe atu a masalila kuli Zambi yetu; kumakalumuka ngwe umwe munyachi wa Yunda, ni A-Ekrone makapwa ngwe A-Yepushe.

⁸ Henaho mungukatwama ku zuwo liami ngwe kalayi, niamwe kechi kendako ngwe maswalale; niumwe mukwa kupinjisa makaakumba nawa mumu haliapwila ngunamono ni meso ja yami mwene.

⁹ Ena mwana-pwo Zaione, Wahilila chikolo! Ena mwana-pwo Yerusaleme, likwize! Mwanangana wenu kaneza kuli yenu; aye mukwa kukangana, mukwa kukumba, hindu kanalikehesa, kanende hali chimbulu, te hali mwana-chimbulu wa kusemuka kuli chimbulu.

¹⁰ Temba lia jita mungukaliteta ku Eframe; kavwalu wa jita mungukamuteta ku Yerusaleme. Uta wa jita makautetako, mba iye kumakatumina sambukila ku mavungu. Chiyulo chenyi muchikapwa chize ku kalunga-lwiji ndo ku kalunga-lwiji; chize ku Lwiji ndo ku masongo a hashi.

¹¹ Ha kutwala kuli yenu nawa, mungukatusula funge jenu ku wina uze kuushi meya mumu ha manyinga ja usendo wami ni yenu.

¹² Enu funge nwakutalatala, hilukenu kuma kwenu kwa tachi. Musono ngunanulweze ngwami, Mungukanukundulula yisuho yiali.

¹³ Mumu hinanana Yunda ngwe uta wami, hinapwisa Eframe mwivu wami. Ena Zaione, mungulinga ni ane a malunga kulamba ana a malunga a yena Ngresia. Mungulinga ni yena ngwe uli katana wa kajita.

¹⁴ Mba Yehova masoloka helu lio, mivu yenyi muyipwa ngwe njaji. Mwene Yehova mahumuna chitavwi, matuhukila ni yijimbi ya ku Sule.

¹⁵ Yehova-wa-Tujita maafunga; makashiha ni kuliata akwa kukonga mawe. Makanwa manyinga jo ngwe vinyu. Makazala ngwe misenge, ngwe mbango ja chilumbilo ja pwocha ni manyinga.

¹⁶ Ha tangwa lize Yehova Zambi yo makaalamwina, mumu o te mbunga ya atu jenyi. Kumakahenya ha chifuchi chenyi ngwe diamante ha chipangula chenyi.

¹⁷ Ewa muchikapwa chipema, cha uhenya. Mbuto muyikawahisa akweze ni vinyu yaha muyikawahisa ana-mapwo.