Zakaria 8 - MUKANDA USANDU WA ZAMBI 1975

¹ Liji lia Yehova-wa-Tujita yiliza kuli yami ngwenyi,

² Yehova-wa-Tujita kanambe ngwenyi, Ukwa ngunavwila Zaione, ukwa wunji; ni ukwa ngunayivwila wa ufwatulo wunji.

³ Yehova kanambe ngwenyi, Mungukahiluka ku Zaione, mungukatwama hakachi ka Yerusaleme, mba makatongola Yerusaleme ngwo, Chihunda cha jika, ni mulundu wa Yehova-wa-Tujita, makautongola ngwo, Mulundu usandu.

⁴ Yehova-wa-Tujita kanambe ngwenyi, Tushinakaji a malunga ni a mapwo makatwama nawa mu matapalo ja Yerusaleme, mutu mweswe ni pango mu kwoko mumu ha ushinakaji.

⁵ Ni matapalo ja chihunda makazala ni ana a malunga ni a mapwo, kanahehe mu matapalo jacho.

⁶ Yehova-wa-Tujita kanambe ngwenyi, Nyi muchipwa chikomokeso kumeso ja masalila ja atu ano ha matangwa ano, muchipwa nawa chikomokeso kumeso jami? Chocho kanambe Yehova-wa-Tujita.

⁷ Yehova-wa-Tujita kanambe ngwenyi, Mungukalamwina atu jami ku chifuchi cha ku Chivumbuko ni ku chifuchi cha ku Chitokelo.

⁸ Mungukaaneha akatwame mu Yerusaleme. O kumakapwa atu jami, ni yami mungukapwa Zambi yo, ni umwenemwene ni ululi.

⁹ Yehova-wa-Tujita kanambe ngwenyi, Yenu matangwa wano nwakwivwavwa maliji ano ku makanwa ja aprofeta chize ku tangwa lize asele fundamentu ya zuwo lia Yehova-wa-Tujita, moko jenu atakame hanga tembele yino yikatungiwe.

¹⁰ Mumu shimbu matangwa aze kanda achiheta kukwapwile fweto ya mutu hanji fweto ya chimuna chipwe kutusuka kuli mukwa kole hali yoze matuhuka hanji yoze manjila, mumu navundwile mutu mweswe kulimika ni mukwo.

¹¹ Alioze haliapwila Yehova-wa-Tujita kanambe ngwenyi, Chichi kulinga ni masalila ja vungu lino ngwe nalingile kunyima.

¹² Mumu kumukukapwa mbuto ya sambukila ni kuwaha; Mitondo ya uva muyikema mihuko, ni mavu makahana mbuto yako, ni malilu makahana mume wako, mba mungukayukisa masalila ja vungu lino ni yuma yino yeswe.

¹³ Nwapwile kashilikilo ka kushinga hakachi ka mavungu, chizechene yenu akwa munyachi wa Yunda ni munyachi wa Izalele mungukanulamwina mba munupwa chiwape. Kanda nwivwa woma; moko jenu akatakame.

¹⁴ Mumu Yehova-wa-Tujita kanambe ngwenyi, Chizechene ngwe napalile kulinga chuma chikalu kuli yenu muze tulamba twenu angwihile, ni yami chalikonyekene,

¹⁵ chocho nawa Yehova-wa-Tujita kanapale matangwa ano kulinga chipema ku Yerusaleme, ni ku munyachi wa Yunda. Kanda nwivwa woma.

¹⁶ Yuma munukalinga yino; Hanjikenu umwenemwene umwe kuli mukwo ni mukwo; ku malwaza jenu lingenu upatwilo wamwenemwene uze wakukoka sambukila;

¹⁷ kanda nulitakila chipi mu mbunge jenu umwe kulimika ni mukwo; kanda nuzanga shingo lia mahuza. Mumu Yehova kanambe ngwenyi, Yino yeswe yangupihila.

¹⁸ Liji lia Yehova-wa-Tujita yiliza kuli yami ngwenyi,

¹⁹ Yehova-wa-Tujita kanambe ngwenyi, Kulitwamina kulia ha kakweji wamuchiwana, ni ha kakweji wamuchitano, ni ha kakweji wamuchishimbiali, ni ha kakweji wamuchikumi, yeswe muyipwa kuli akwa munyachi wa Yunda matangwa a uwahililo ni chiseke, ni yiwanyino ya maseho. Kashika zangenu umwenemwene ni sambukila.

²⁰ Yehova-wa-Tujita kanambe ngwenyi, Mavungu meza kwiza, e atu a ku yihunda yinji.

²¹ Akwa chihunda chimwe makamba kuli akwo ngwo, Tatuyenu haliapwila tukete vumbi kuli Yehova, tukafupe mwe Yehova-wa-Tujita; ami ngunayi.

²² Mavungu anji, minyachi ya tachi makeza ni kufupa Yehova-wa-Tujita mu Yerusaleme akete vumbi kuli Yehova.

²³ Yehova-wa-Tujita kanambe ngwenyi, Ha matangwa aze kumi lia malunga a ku mavungu ja malimi eswe makakwata ku hina lia mutu umuwika Ka-Yunda nikwamba ngwo, Tutayize kuya ni yena mumu hitwevwa lufuma ngwo, Zambi hwali hamwe ni yenu.