Zakaria 7 - MUKANDA USANDU WA ZAMBI 1975

¹ Ha mwaka wamuchiwana wa mwanangana Dariu liji lia Yehova yiliza kuli Zekaria ha tangwa liamuchiwana lia kakweji wamuchilivwa (wa Chisleve).

² Achi akwa Mbetele te hatuma Sharezere ni Rejeme-Meleke ni malunga jo akafupe vumbi lia Yehova,

³ akahule asasendote a zuwo Iia Yehova-wa-Tujita ni aprofeta ngwenyi, Changutamba kulinyenga ni kulitwamina kulia ha kakweji wamuchitano chizechene ngwe nakulinga miaka yino yinji nyi ka?

⁴ Mba liji lia Yehova-wa-Tujita yiliza kuli yami ngwenyi,

⁵ Amba kuli atu eswe a mu chifuchi hamwe ni asasendote ngwenu, Ha kulitwamina kulia ni kulinyenga ha kakweji wamuchitano ni wamuchishimbiali, miaka yino makumi shimbiali, te yami nunachilingila?

⁶ Ni shimbu munulia ni shimbu mununwa te kunwalile, kunwanwine kuli yenwene?

⁷ Shimbu machitwama mu Yerusaleme ni kuwaha ni yihunda yeswe ya kujingilika, ni chifuchi cha ku Sule ni chifuchi cha ku mwanda yeswe ni atu, te Yehova kambile maliji wano ene kuli aprofeta jenyi a kushi?

⁸ Liji lia Yehova yiliza kuli Zekaria ngwenyi,

⁹ Yehova-wa-Tujita kanambe ngwenyi, Patulenu ni ululi; lingenu ni utu ni keke mutu mweswe kuli mukwo.

¹⁰ Kanda nupinjisa twamishi, hanji shiwa, hanji njize, hanji chiswale. Niumwe kanda atakila mukwo chuma chipi mu mbunge yenyi.

¹¹ Alioze katayile kupanjika; yangutalikisa chipaya cha pami; yajika matwi jo kuchina mevwa.

¹² Yapwisa mbunge jo jikalu ngwe diamante kuchina mevwa shimbi ni maliji aze Yehova-wa-Tujita watumine ni Spiritu yenyi kuli aprofeta a kushi. Kashika ufwatulo unene wejile wa kuli Yehova-wa-Tujita.

¹³ Yehova-wa-Tujita kanambe ngwenyi, Yami naasanyikine, o katayile kupanjika; chocho nawa o asanyikine ni yami chatayile kupanjika.

¹⁴ Kashika naamwangine ni chijimbi hakachi ka mavungu eswe kaanyingikine. Chocho chifuchi cho chasalile cha hululu; niumwe wapajekelemo, ni chifuchi chipema achipwishile cha hululu.