Zakaria 6 - MUKANDA USANDU WA ZAMBI 1975

¹ Cheka nawa yinguhetula meso jami, yingumona matemba-a-jita awana kanatuhuka hakachi ka milundu yiali. Milundu te milundu ya unengu.

² Temba litangu liapwile ni tuvwalu achila; liamuchiali tuvwalu alá;

³ liamuchitatu tuvwalu atoma; temba liamuchiwana tuvwalu a yipekayipeka ya kutomonoka.

⁴ Yinguhula mungelo yoze wahanjikile ni yami ngwami, Wano kuchi apwa, mwene wami?

⁵ Mungelo yangukumbulula ngwenyi, Wano fuji jiwana ja malilu jize jakutuhuka muze te halikunjika kuli Mwene wa hashi heswe.

⁶ Temba lia tuvwalu alá linayi kutalikisa ku chifuchi ku Norte; atoma kanayi kutalikisa ku chifuchi ku Chitokelo; akwa yipekayipeka o kanatalikisa ku chifuchi ku Sule.

⁷ Ha kutuhuka tuvwalu kanalipupwisa kuya akendeleze hashi. Mba iye yamba ngwenyi, Yénu nukendeleze hashi. Chocho yaya nikwendeleza hashi.

⁸ Mba yakololoka kuli yami ngwenyi, Waze hatalikisa ku chifuchi cha ku Norte hatulisa Spiritu yami ha chifuchi cha ku Norte.

⁹ Liji lia Yehova yiliza kuli yami ngwenyi,

¹⁰ Sakula kuli njize Heldai, ni Tobija, ni Jedaia, waze hanakatuka ku Babilonia haneza, nukaye tangwa lioliene ku zuwo lia Josia mwana Zefania.

¹¹ Tambula kuli ayo prata ni oru; linga yipangula ukayise ha mutwe wa sasendote mukwa lutwe Yoshua mwana Jehozadake,

¹² ukambe kuli iye ngwe, Yehova-wa-Tujita kanambe ngwenyi, Talenu mwe lunga jina lienyi Mutango; mumu makatatuka muma mwenyi; makatungisa tembele ya Yehova.

¹³ Iye mwene makatungisa tembele ya Yehova; uhenya wa wanangana muukapwila hali iye, mba makatwama nikuyula ha ngunja yenyi. Ku ngunja yenyi kumukukapwa sasendote; hakachi ko aali makalitesa ni sambukila.

¹⁴ Yipangula yize muyipwa mu tembele ya Yehova, Chiwulwiso kuli Heldai, ni Tobija, ni Jedaia, ni Hene mwana Zefania.

¹⁵ Waze ali kusuku makeza akakwase kutunga tembele ya Yehova, mba mununyingika Yehova-wa-Tujita wangutumine kuli yenu. Chino muchiza kupwa nyi munwononoka ku liji lia Yehova Zambi yenu ni mbunge yeswe.