Zakaria 5 - MUKANDA USANDU WA ZAMBI 1975

¹ Cheka nawa yinguhetula meso jami, yingumona mukanda umwe wa chivungo unahumuka.

² Aye yamba kuli yami ngwenyi, Yika unamono? Yingukumbulula ngwami, Ngunamono mukanda wa chivungo unahumuka; usuhe wawo makumi aali a mbandu, ni utohe wawo kumi lia mbandu.

³ Henaho yamba kuli yami ngwenyi, Lie shingo lienalio linayi chifuchi cheswe, mumu kulutwe mweswawo meya chuma mamusuma nikulita ni mukanda, ni mweswawo malishinga ni mahuza mamusutula nikulita nawo.

⁴ Yehova-wa-Tujita kanambe ngwenyi, Munguutuma mba muunjila mu zuwo lia mwiji, ni mu zuwo lia mukwa kulishinga ni mahuza ni jina liami, mba muutwama mu zuwo lienyi nikulilia lieswe, ni mitondo ni mawe.

⁵ Mba mungelo yoze wahanjikile ni yami yakundama, yamba ngwenyi, Hetula meso je umone. Chino chinayi, chika?

⁶ Yingwamba ngwami, Mba chika? Aye yamba ngwenyi, Yino ye *efa yakwenda. Yamba nawa ngwenyi, Uno we uhenge chifuchi cheswe.

⁷ Kumanyi chifuko cha shumbu achizundwile; umwe pwo unatwama muchima lia *efa!

⁸ Mungelo ngwenyi, Yono we Ungulungulu. Mba yamukona mu *efa nikusa chifuko cha shumbu ha kanwa liayo.

⁹ Yinguhetula meso jami, kumanyi mapwo aali anakundama! Fuji yapwile mu mapulwa jo, te kali ni mapulwa ngwe a chitokola, mba yazundula ye *efa hakachi mu tetela.

¹⁰ Yingwamba kuli mungelo yoze wahanjikile ni yami ngwami, Kulihi anatwala ye *efa?

¹¹ Aye yamba kuli yami ngwenyi, Ku chifuchi cha Shinare akayitungile zuwo, mba muze halifunga matumbikilako ye efa ha umanyino wayo.