Zakaria 4 - MUKANDA USANDU WA ZAMBI 1975

¹ Mungelo yoze wahanjikile ni yami yeza nawa yangukasumuna, ngwe umwé yoze mamukasumuna ku tulo.

² Yamba kuli yami ngwenyi, Yika unamono? Yingwamba ngwami, Ngunamono chikwachilo cha ndeya cheswe cha oru. Chili ni musenge helu liacho, ni ndeya shimbiali jiliho. Ndeho jize jiliho yimwe ha yimwe yili ni tumihembo shimbiali.

³ Mitondo yiali ya olevwe yiliko, umwe ha chindume cha musenge ni ukwo ha chimeso.

⁴ Yingwamba kuli mungelo yoze wahanjikile ni yami ngwami, Mwene wami, ajo jika?

⁵ Mungelo yoze wahanjikile ni yami yamba ngwenyi, Kwajinyingikine? Yingwamba ngwami, Ka mwene wami.

⁶ Aye yamba kuli yami ngwenyi, Lie liji lino lia Yehova kuli Zorobabele ngwenyi, Yehova-wa-Tujita kanambe ngwenyi, Hi ku ndundo ko hanji ku ngolo alioze kuli Spiritu yami.

⁷ Ena mulundu unene, kuchi wapwa? Kumeso ja Zorobabele kumuupwa chana, mba kumakakundamisa luliwe lwa helu hakachi ka maliji a kukololoka ngwo, Vumbi, lukapwe ni vumbi!

⁸ Chikwo nawa liji lia Yehova liejile kuli yami ngwenyi,

⁹ Moko ja Zorobabele hasa fundamentu ja zuwo lino, ni moko jenyi mwene malimanuna. Henaho mununyingika Yehova-wa-Tujita wangutumine kuli yenu.

¹⁰ Mumu iya halelesa tangwa lia yuma yikepe? Kumakawahilila; kumakamona prumo mu kwoko lia Zorobabele. Wano shimbiali o meso ja Yehova kakwendangana hashi heswe.

¹¹ Yingwamba kuli iye ngwami, Mitondo yino yiali ya olevwe yili ha chindume cha ndeya ni ha chimeso, ayo kuchi yapwa?

¹² Kamuchiali yingumuhula ngwami, Yino mitango yiali ya olevwe yili ku mihembo yiali ya oru kuze kunatuhukila maji a oru kuchi yapwa?

¹³ Yamba kuli yami ngwenyi, Kwayinyingikine? Ngwami, Ka, mwene wami.

¹⁴ Aye yamba ngwenyi, Wano e aali a kuwayisa ni maji akumana kumeso ja mwe Mwene wa hashi heswe.