Zakaria 3 - MUKANDA USANDU WA ZAMBI 1975

¹ Mba yangulweza Yoshua, sasendote mukwa lutwe, kanamana kumeso ja mungelo wa Yehova, ni Satana kanamana ku chindume chenyi amusume.

² Yehova yamba kuli Satana ngwenyi, Satana, Yehova akukanjise! Yehova mukwa kutongola Yerusaleme akukanjise! Yono hi mutondo ko wa kuchangumuna ku kahia?

³ Achi Yoshua te kanamana kumeso ja mungelo ni mazalo a luchisa.

⁴ Mungelo yamba kuli waze anamana kumeso jenyi ngwenyi, Muzulenu mazalo wano a luchisa. Mba yamba kuli iye ngwenyi, Tala hinakuchiza uhenge we; mungukujika ni mazalo a ndando yinene.

⁵ Yingwamba ngwami, Ase chipangula chipema ha mutwe wenyi. O yasa chipangula chipema ha mutwe wenyi, ni kumujika mazalo apema, shimbu mungelo wa Yehova unachimanako.

⁶ Mungelo wa Yehova yalongesa Yoshua ngwenyi,

⁷ Yehova-wa-Tujita kanambe ngwenyi, Nyi muwenda mu majila jami, nikufunga shimbi jami, mukayilia zuwo liami, nikufunga maze jami, ni yami mungukwaha poko ya kunjila hakachi ka wano anamana kuno.

⁸ Yena Yoshua sasendote mukwa lutwe, panjika hamwe ni akwenu waze akutwama kumeso je, mumu o kapwa chilayi. Tala, mungukaneha kavumbi kami mwe Mutango.

⁹ Ha liwe lino hinasa kumeso ja Yoshua, liwe limuwika lia yihanda shimbiali mungwolaho sona jalio, munguchiza uhie wa chifuchi ha tangwa limuwika. Chocho kanambe Yehova-wa-Tujita.

¹⁰ Yehova-wa-Tujita kanambe ngwenyi, Ha tangwa lize yenu eswe, mutu ni mutu, makalakenya mwenyembo kutwama mushi lia mutondo wenyi wa uva ni wa mukuyu.