Zakaria 2 - MUKANDA USANDU WA ZAMBI 1975

¹ Yinguhetula meso jami, yingumona umwe lunga ni muhipu wa kweseka nawo mu kwoko lienyi.

² Yingwamba ngwami, Kuli unayi? Aye yangukumbulula ngwenyi, Ngunayi mukweseka Yerusaleme, ngunyingike utohe wayo ni usuhe wayo.

³ Mwe mungelo yoze te unahanjika ni yami yakundama, ni mungelo mukwo yakundama akatakane nenyi.

⁴ Yamba kuli iye ngwenyi, Zomboka uambe kuli yono mukweze ngwe, Yerusaleme muyipwa ni atu a kutwamamo ngwe yihunda yize kuyishi yipanga-ya-mawe, mumu ha kwokelamo cha atu ni yimuna.

⁵ Mumu Yehova kanambe ngwenyi, Yami mungupwa chipanga chayo cha kahia ka kujingilika; mungupwa nawa we uhenya muchima liayo.

⁶ Ivwenu! Ivwenu! Yehova kanambe ngwenyi, Chinenu chifuchi cha ku Norte. Mumu nanumwangine mwamwa ngwe fuji jiwana ja malilu. Chocho kanambe Yehova.

⁷ Ivwenu yenu nwakutwama mu mwana-pwo Babilonia, chinyinenu ku Zaione.

⁸ Mumu Yehova-wa-Tujita wambile muze te uhenya wenyi wangutumine ku mavungu aze anupupile, (mumu yoze manusunga chapwa ngwe kunguchoka mu katumba ka liso),

⁹ wambile ngwenyi, Mungukapula kwoko liami hali ayo mba malumuka upite wa kupupa kuli waze aavumbikile. Henaho mununyingika Yehova-wa-Tujita wangutumine.

¹⁰ Mwana-pwo Zaione, imba! Wahilila! Mumu Yehova kanambe ngwenyi, Mungwiza ngutwame hakachi kenu.

¹¹ Mavungu anji malifutula ni Yehova ha tangwa lize nikwalumuka akapwe atu jami. Mba mungutwama hakachi kenu. Ni yenu mununyingika Yehova-wa-Tujita wangutumine kuli yenu.

¹² Mba Yehova mahinga Yunda ngwe chihinga chenyi mu chifuchi chisandu, matongola Yerusaleme nawa.

¹³ Enu akwa musunya weswe, holenu kúlú kumeso ja Yehova, mumu hakasumuka ku zuwo lienyi lisandu.