Zakaria 13 - MUKANDA USANDU WA ZAMBI 1975

¹ Ha tangwa lize makajikula fuji lia meya ha munyachi wa David ni hali akwa Yerusaleme lia kwapemesa ku shili ni luchisa.

² Yehova-wa-Tujita kanambe ngwenyi, Ha tangwa lize munguteta majina ja mahamba mu chifuchi; chipwe kwewuluka kechi kaewuluka nawa. Mungukachiza nawa ku chifuchi aprofeta, ni Spiritu wa luchisa.

³ Mba nyi umwe masoloka nawa ngwenyi, Yami profeta, tato ni naye waze amusemene, makamba kuli iye ngwo, Kuchi kutwama ni mwono, mumu unahanjika mahuza mu jina lia Yehova. Mba tato ni naye waze amusemene makamutuwa ndusu muze maprofeteza.

⁴ Ha tangwa lize profeta mweswe mavwila sonyi usolwelo wenyi ha kuprofeteza. Kechi kazala uzalo wa wona akonge atu,

⁵ alioze makamba ngwenyi, Hi nguli profeta ko; nguli njimi, mumu e mavu hapwa upite wami chize ku ukweze wami.

⁶ Nyi mamuhula ngwo, Yilonda yino ha moko je kuchi yapwa? Aye makumbulula ngwenyi, Ye yilonda ayi anguhele mu zuwo lia masepa jami.

⁷ Yehova-wa-Tujita kanambe ngwenyi, Yena katana, laula kulimika ni kafunga kami, kulimika ni yoze walikunda ni yami. Lamba kafunga, mapanga amwangane; mungutalikisa kwoko liami kulimika ni ana akepe.

⁸ Yehova kanambe ngwenyi, Mu chifuchi cheswe, yihanda yiali mayitetaho, manonga. Chihanda chamuchitatu muchikasala ni mwono.

⁹ Mba chino chihanda chamuchitatu mungukachisa mu kahia nikwapemesa chize atu kakupemesa prata. Mungukaeseka ngwe akweseka oru. Kumakatambika ha jina liami, mba mungukaakumbulula. Mungukamba ngwami, O atu jami. O makamba ngwo, Yehova iye Zambi yami.