Zakaria 11 - MUKANDA USANDU WA ZAMBI 1975

¹ Ena Lebano, azulula mapito je hanga kahia kakalalise misedru ye!

² Ena mutondo wa kupresu, lila mbimbi mumu musedru halimbuka; mitondo ya uhenya hiyalumbuka! Carvalho ja ku Mbashanu, lilenu mbimbi, mumu usaki uze wajika haupakula!

³ Halakanenu mbimbi ya tufunga; mumu uhenya wo haupupa! Halakanenu kuhiohia cha ndumba, mumu mushitu ya Yordau hayiteta!

⁴ Yehova Zambi yami wambile ngwenyi, Fungenu mapanga aze hanaafunjikila kufwa.

⁵ Waze akwalanda kakwashiha ni kastigu yakuhi, ni waze akwalanjisa kakwamba ngwo, Yehova afumane, hinapwa pichi. Chipwe tufunga two ene kaavwilile keke.

⁶ Mumu Yehova kanambe ngwenyi, Chichi kapwa nawa ni keke hali akwa chifuchi chino. Nyingikenu, mungukalimbwisa mutu mweswe mu kwoko lia kafunga kenyi. Mutu mweswe mungukamukunjika mu kwoko lia mwanangana wenyi mba makafwenya hashi. Chichi kapulula niumwe ku moko jo.

⁷ Chocho nalumukine kafunga ka mapaagu aze hanaafunjikila kufwa mumu hali akwa kusepa ni mapanga. Yingwanda milumbu yiali. Umwe naulukile ngwami, Vumbi; ukwo naulukile ngwami, Kununga. Yingufunga mapanga.

⁸ Ha kakweji umuwika nonwene tufunga atatu, mumu janguhwa no; no te kananguvwila kupiha.

⁹ Chocho yingwaamba ngwami, Chichi kapwa kafunga kenu. Yoze hamufunjikila kufwa, akafwe; yoze hamufunjikila kwonwona, amwonwone; waze malisalaho akalie musunya wo, umwe kuli mukwo ni mukwo.

¹⁰ Yingwanda mulumbu wami Vumbi, yinguumakuna, nikushiha usendo uze nalingile ni e mavungu eswe.

¹¹ Chocho usendo wafwile tangwa lize, mba akwa kusepa ni mapanga waze apwile nikungupanjika anyingikine ngwo, Liji lia Yehova.

¹² Yingwamba ngwami, Nyi chanupemena-ngwehenu fweto yami. Nyi ka litwaminenu. Chocho yangupezalishila ha fweto yami makumi atatu a mbongo ja prata.

¹³ Mba Yehova yamba kuli yami ngwenyi, Ujimbile mu milambu, ndando yipema yize anguselele. Kashika yingwanda je mbongo ja prata makumi atatu yingujimbila mu milambu mu zuwo lia Yehova.

¹⁴ Henaho namakwine mulumbu wami wamuchiali Kununga, nikushiha usoko hakachi ka Yunda ni Izalele.

¹⁵ Mba Yehova yamba kuli yami ngwenyi, Anda cheka nawa ye yikwata ya kafunga wamokomoko.

¹⁶ Mumu mungusolola mu chifuchi kafunga umwe kechi kusa mbunge waze anafu, kechi kufupa akwa kujimbata, kechi kuwuka yilema, hanji kulela angunu, alioze kakulia musunya wa akwa maji, nikuzununa chipwe sende jo.

¹⁷ Lamba kuli kafunga wamokomoko, yoze wakwehuka mapanga! Katana amulambe mu kwoko lienyi ni mu liso lienyi lia chindume! Kwoko lienyi likasosewe liakulu ni liso lienyi lia chindume Ukafwe liakulu.