Zakaria 10 - MUKANDA USANDU WA ZAMBI 1975

¹ Etenu vula kuli Yehova ha kakweji wa vula musazu. Etenu kuli Yehova mukwa kutanga njaji mukwa kuhana vula wa samakwasa, mukwa kuhana mwambu mu chifuchi.

² Mumu terafimi hanahanjika chize kuchalumbunukine; tahi hanamono mahuza; akwa yilota kanaula yilota ya kwonga, nikulembejeka chamokomoko. Kashika atu anendangana ngwe mapanga; kanapinji mumu ha kuhona kafunga.

³ Utenu wami unasasaminyina hali tufunga; mungulamba kastigu tusongo. Mumu Yehova-wa-Tujita kakusa mbunge yenyi hali mapanga jenyi, munyachi wa Yunda; kumakaapwisa ngwe kavwalu wa uhenya mu jita.

⁴ Kuli ayo mukukakatuka liwe lia mbango; kuli ayo mukukakatuka lumbambo wa mbalaka; kuli ayo mukukakatuka uta wa jita; kuli ayo mukukakatuka mukwa kuyula mweswe.

⁵ Hamuwika makapwa ngwe yitakame mu jita, nikuliachila akwa kulinwa no mu malowa a ha matapalo. Makasa jita mumu Yehova hwali hamwe no, mba makakomwesa akwa kwenda hali tuvwalu.

⁶ Kumungukutakamisa munyachi wa Yunda; kumungukalamwina munyachi wa José. Mungukaahilwisa mumu ngunaavwila keke, mba makapwa ngwe chalitunyino, mumu yami nguli Yehova Zambi yo kashika mungukaakumbulula.

⁷ Henaho Eframe malumuka ngwe kajita wa ndundo, ni mbunge jo mujikapwa ni chiseke ngwe cha vinyu. Ana jo makachimona; makawahilila, ni mbunge jo mujikalikwiza muli Yehova.

⁸ Mungukaasanyika nikwakonga mumu hinaakula, mba kumoka ngwe ha shakulu.

⁹ Chipwe naamwangine hakachi ka mavungu, hindu ku yifuchi ya kusuku makangwiwuluka; mba makatwama ni mwono, makahiluka hamwe ni ana jo.

¹⁰ Ku chifuchi cha Engitu mungukaachiza nikwaneha ku mahio; chipwe ku Asuria mungukaakonga, mba mungukaaneha ku chifuchi cha Ngiliate ni Lebano ndo kukwasalile nawa chihela.

¹¹ Makapalika ndusu mu kalunga-lwiji wa luyinda. Mikanya ya kalunga-lwiji muyikalambiwa, ni majinga eswe a Nilo makoma. Ulemu wa Asuria makaununguna, ni lukanda wa Engitu makachina.

¹² Mungukaatakamisa muli Yehova mba kumakenda mu jina lienyi. Chocho kanambe Yehova.