Zakaria 1 - MUKANDA USANDU WA ZAMBI 1975

¹ Ha kakweji wamuchinake mu mwaka wamuchiali wa Dariu, liji lia Yehova yiliza kuli profeta Zekaria mwana Mberekia, mwana Ido ngwenyi,

² Yehova watenukine chikolo ni tulamba twenu

³ kashika amba kuli ayo ngwe, Yehova-wa-Tujita kanambe ngwenyi, Hilukenu kuli yami ni yami munguhiluka kuli yenu. Chocho kanambe Yehova-wa-Tujita.

⁴ Kanda nupwa ngwe tulamba twenu, kuli ayo aprofeta a kushi akololokele ngwo, Yehova-wa-Tujita kanambe ngwenyi, Katukenu ku majila jenu api ni yitanga yenu yipi. Alioze kevwile; kangupanjikile; chocho kanambe Yehova.

⁵ Tulamba twenu kuli ali? Aprofeta? Te kali ni mwono miaka yeswe?

⁶ Maliji jami ni yiyulo yami yize natumine kuli tuvumbi twami aprofeta te kuyawanyine tulamba twenu? Kashika yalikonyeka ngwo, Chizechene ngwe Yehova-wa-Tujita wanyongene kulinga ni yetu mumu ha majila jetu ni yitanga yetu, chochene hatulinga.

⁷ Ha tangwa makumi aali ni liamuchiwana lia kakweji kumi ni kashi (ngwami kakweji Shebate) mu mwaka wamuchiali wa Dariu, liji lia Yehova yiliza kuli profeta Zekaria mwana Mberekia, mwana Ido, mba Zekaria yamba ngwenyi,

⁸ Namona ha ufuku kumanyi umwe lunga kanende hali kavwalu muchila. Kanamana hakachi ka mitondo ya miluta mu mungulunga; kunyima yenyi te kunamana tuvwalu achila, ni a yipeka, ni atoma.

⁹ Ami yingwamba ngwami, Aka aze, mwene wami? Mba mungelo yoze unahanjika ni yami yamba ngwenyi, Mungukulweza chize apwa.

¹⁰ Kashika lunga yoze te unamana hakachi ka mitondo ya miluta yamba ngwenyi, Wano Yehova haatuma kwendeleza hashi.

¹¹ Yakumbulula nawa kuli mungelo wa Yehova yoze unamana hakachi ka mitondo ya miluta ngwo, Hitwendeleza hashi heswe. Hashi heswe kuhanahwimi.

¹² Henaho mungelo wa Yehova yamba ngwenyi, Yehova-wa-Tujita, ndo mwiji muka kuchi kapwa ni keke ha Yerusaleme ni ha yihunda ya Yunda hiwapwa ni ufwatulo wa kulimika nayo miaka yino makumi shimbiali?

¹³ Yehova aye yakumbulula ni maliji a vumbi ni kulembejeka kuli mungelo yoze te unahanjika ni yami.

¹⁴ Chocho mungelo yoze wahanjikile ni yami yamba kuli yami ngwenyi, Kololoka ngwe, Yehova-wa-Tujita kanambe ngwenyi, Ukwa wunji ngunevu wa Yerusaleme ni wa Zaione.

¹⁵ Ngunatenuka ni mavungu aze anatwama nikuhwima mumu natenukine hakehe wika alioze o awezele ku luyinda.

¹⁶ Kashika Yehova kanambe ngwenyi, Hinahiluka ku Yerusaleme ni keke. Yehova-wa-Tujita kanambe ngwenyi, Zuwo liami malitungamo; muhipu wa kweseka mautachika ha Yerusaleme.

¹⁷ Kololoka cheka nawa ngwe, Yehova-wa-Tujita kanambe ngwenyi, Mu yihunda yami kuwaha muchikalumbamamo, ni Yehova cheka nawa makalembejeka Zaione, cheka nawa makatongola Yerusaleme.

¹⁸ Yinguhetula meso jami, yingumona mbinga jiwana.

¹⁹ Yingwamba kuli mungelo yoze unahanjika ni yami ngwami, Ajo jika? Aye yangukumbulula ngwenyi, Ajo je mbinga jamwangine Yunda, ni Izalele, ni Yerusaleme.

²⁰ Mba Yehova yangulweza fuli awana.

²¹ Yingwamba ngwami, Wano aneza ni kulinga yika? Aye yakumbulula ngwenyi, Jize je mbinga jamwangine Yunda chocho niumwe kahashile kuhetuka; ni wano haneza kujikolesa mwongo, akanungune mbinga jize ja mavungu azundwile mbinga jo kulimika ni chifuchi cha Yunda nikuchimwanga.