Yuda 1 - MUKANDA USANDU WA ZAMBI 1975

¹ Yami Yundase, ndungo ya Yesu Kristu, kanda mwanakwo wa Tiangu, Kuli waze hanaatambika, kanaazange muli Zambi mwe Tata, kanaafungu hali Yesu Kristu:

² Keke ni sambukila ni zango yikalumbame kanji kuli yenu.

³ Akwetu a zango, shimbu nalipupwishile kusoneka kuli yenu ha kutwala ku ulamwino wa eswe aali, niwenu kanda niwetu, te changutamba kusoneka kuli yenu, ni kunushinjila kulitachika chikolo ha ufulielo uze aukunjikile kuli asandu kamuwika kunahu.

⁴ Mumu amwe atu aliombele nikunjila ku tenga, waze ku shakulu aavulukile Shimbu-kanda ha uhiso uno, yitanganyanyi, waze akwalumuna vumbi lia Zambi ujila, kakulikata Mwata wetu umuwika, kanda Mwene wetu Yesu Kristu.

⁵ Achi, ngunazange kunwiwulula, chipwe nunanyingika yuma yeswe kamuwika kunahu, Mwene se walamwinyine amwe atu ku Engitu, kulutwe lia chize wonwene waze kafulielele.

⁶ Ni angelo waze kafungile chiyulo cho ene chitangu, aiioze ehukile chihela cho ene, hanaafungu mu makana ja mutolo kushi lia milima pwi ndo ku upatwilo wa lie tangwa linene.

⁷ Chizechene ngwe Sondome ni Ngomora, ni membo a kwajingilika, se chizechene ngwe wano alitumbikilile ku utanji, nikukaula musunya weka, hanaasela ngwe chilweza, ha kwivwa upatwilo wa kahia ka mutolo.

⁸ Hindu chizechene ni wano nawa, ha kulota cho kakuchisa musunya, kakulelesa yiyulo, kakutuka e alemu.

⁹ Alioze Mikele mungelo mukwa lutwe, muze ahangulwile ni Ndiapu, wahamikine ha kutwala ku mujimba wa Mose, kahamukine kumukumika ni maliji a kutuka, aiioze wambile ngwenyi, Mwene akwámbile.

¹⁰ Alioze wano kakutuka yuma yeswayo kayinyingikine: ni chize ananyingika ku chisemewa, ngwe tushitu yipama, mu yino yuma kakulilumbula.

¹¹ Lamba lio! mumu kanayi mu jila ya Kene, hanatoko mu kupianguka cha Mbalau ha fweto, hanakuwu mu kuhamika cha Kora.

¹² Wano anapu yipeka mu yiteleka yenu ya zango, muze maliangana hamwe ni yenu, tufunga waze keshi woma, kakulilisa ene; malelwa aze keshi meya, a kuhungumioka kweka ni kweka ku fuji; mitondo ya lushiho kuyakakaminya, kuyinafu kaali, ya kutangumuka;

¹³ mikanya ya kupupula ya ku kukalunga-lwiji, kanatutumuna sonyi jo ene; matongonoshi a kupianguka, hali ayo hanafungu kulá cha milima pwi ndo ku miaka ya mutolo.

¹⁴ Enoke, wamuchishimbiali kuli Alama, waprofetezele hali wano, ngwenyi, Mwene kumeza hamwe ni yizavu yinji ya asandu jenyi,

¹⁵ mukulinga upatwilo hali eswe, mukukumika yitanganyanyi eswe ha yitanga yo yeswe ya utanganyanyi, yize alingile ni utanganyanyi, ni ha yuma yeswe yikalu yize yivulumunyi a utanganyanyi hanahanjika ya kulimika nenyi.

¹⁶ Wano akwa kulinyenyeta, akwa kulinyengetela, akwenda nikulita ni usolo wo ene; (ni makanwa jo kakuhanjika maliji anene a kulivwimba), kakulinga ni katonde, akafumbuke ene.

¹⁷ Alioze yenu, akwetu a zango, iwulukenu maliji aze ahanjikile kushi ku makanwa ja apostolo ja Mwene wetu Yesu Kristu;

¹⁸ ngwe ambile kuli yenu ngwo, Ha mwaka wa kusula kumukukapwa akwa kukekuna, waze akwenda nikulita ni usolo wo ene wa utanganyanyi.

¹⁹ Wano kakuhandunwona, akwa musunya, keshi Spiritu.

²⁰ Alioze yenu, akwetu a zango, lijikijilenu ha Ufulielo wenu usandu wahiana, nikulemba muli Spiritu Musandu.

²¹ Lifungenu mu zango lia Zambi, nikutalatala keke ya Mwene wetu Yesu Kristu ndo ku mwono wa mutolo.

²² Mba amwe avwilenu keke, shimbu anayambashana;

²³ ni akwo alamwinenu nikwachangumuna ku kahia; ni akwo avwilenu keke ni woma; mazalo a luchisa wa musunya nukaavwile kupiha.

²⁴ Haliapwila kuli yoze mahasa kunufunga hanga kunuchi kutalinga, ni kunumanyisa kulutwe lia uhenya wenyi ni kulikwiza kunushi kapalia.

²⁵ Kuli Zambi umuwika, Chilamwina chetu, mu jina lia Yesu Kristu Mwene wetu, uhenya, ni ulamba, ni ndundo, ni yiyulo, yikapwe kushi ku miaka ya mutolo, ni haliapwila, ni ndo ku miaka ya mutolo. Amene.