Yoshua 9 - MUKANDA USANDU WA ZAMBI 1975

¹ Mba mianangana aze eswe atwama mu sali lia Yordau mu milundu ni mu yana yeswe ya ku mbaka ya Kalunga-lwiji Munene, kwa kuya ku Lebano, ni A-Hete, ni A-Amore, ni A-Kanana, ni A-Perize, ni A-Hevwe, ni A-Yepushe; o muze evwile chuma chino

² alikungulwile ni mbunge yimuwika akase jita ni Yoshua ni A-Izalele.

³ Alioze akwa Ngibeone muze evwile chize Yoshua halinga kuli A-Yeriku ni A-Ayi,

⁴ o alingile ni ukanyame. Yaya, yalulika yakulia, yasa ha yimbulu jo njeke jimwe hijapapujoka, ni tuku ja malambu jimwe hijapapujoka, japwa ja yitanutanu, ja kusa yando.

⁵ Ha yiliato yo anazala haku japapujoka, ja kusa yando, ni mazalo apapujoka. Yakulia yo yeswe yinomu chau, hiyakwata mbundu.

⁶ Chocho ayile kuli Yoshua mu chilombo ku Ngilingali, yamba kuli iye ni malunga a Izalele ngwo, Etu twakatuka ku chifuchi chisuku, kashika kolesenu usendo ni yetu.

⁷ Alioze malunga a Izalele yamba kuli A-Hevwe ngwo, Hanji nwatunga he hakachi ketu, nyi chocho kuchi mutukolesa usendo ni yenu?

⁸ O yamba kuli Yoshua ngwo, Tuli ngamba jenu. Yoshua yamba kuli ayo ngwenyi, Yenu aya? Kulihi nunakatuka?

⁹ O yamukumbulula ngwo, Etu ngamba jenu ku chifuchi chisuku chikolo tunakatuka, mumu ha jina lia Yehova Zambi yenu. Mumu hitwevwa lufuma wenyi ni yuma yize yeswe alingile mu Engitu.

¹⁰ Ni yuma yize yeswe alingile kuli mianangana aali a A-Amore, Sahone mwanangana wa Heshebone ni Oge mwanangana wa Mbashane mu sali lia Yordau, atwama mu chifuchi cha Asatarote.

¹¹ Mba makulwana jetu ni akwa chifuchi chetu eswe atwambile ngwo, Tambulenu ngaso mu moko jenu ha wenyi wenu, yénu nukaapatwize, ngwenu, Tuli ngamba jenu, kolesenu usendo ni yetu.

¹² Mbolo jetu, ngwetu, jino. Muze twajichijile mu mazuwo jetu jikapwe ngaso ya mu jila te jinavumu mu tangwa lize twakatukile twize kuli yenu. Haliapwila jinomu chau, hijakwata mbundu.

¹³ Tuku jino ja vinyu japwile jaha muze twajizalishile, haliapwila hijalokoka. Mazalo jetu ni haku jetu hijapapujoka mumu ha wenyi usuku.

¹⁴ Chocho malunga atambwile yakulia yo, alioze kechile chiyulo kuli Yehova.

¹⁵ Yoshua wawanyine no. Yakolesa no usendo akatwame ni mwono. Akwa lutwe a chikungulwila alalikenyene no ni shingo.

¹⁶ Muze hakolesa no usendo, mba hapomba jitatu mba hevwa ngwo, Wano te enyembo, anatwama hakachi kenu.

¹⁷ A-Izalele yakatuka, yaheta ku yihunda yo ha tangwa liamuchitatu. Majina ja yihunda yo Ngibeone, ni Chefira, ni Mberote, ni Kiriate-Yerimi.

¹⁸ Alioze A-Izalele kaashihile mumu akwa lutwe a chikungulwila halilakenya no ni shingo kuli Yehova Zambi ya Izalele. Mba akwa chikungulwila eswe alinyenyetene hali akwa lutwe.

¹⁹ Alioze akwa lutwe eswe ambile kuli akwa chikungulwila eswe ngwo, Hitwalilakenya kuli ayo ni shingo mu jina lia Yehova Zambi ya Izalele, kashika kutwahashile kwalinga nichimwe.

²⁰ Mutulinga no chino. Akatwame ni mwono kuchina ufwatulo muwiza hali yetu mumu ha shingo lize twalishingile nalio kuli ayo.

²¹ Akwa lutwe ambile kuli ayo ngwo, Akatwame ni mwono. Alioze aapwishile akwa kuchá kunyi ni akwa kutaha meya hali akwa chikungulwila eswe, chizechene ngwe akwa lutwe ambile.

²² Yoshua yaasanyika, yamba kuli ayo ngwenyi, Kuchi te nunakatwonga ngwenu, Kusuku chikolo twatwama ni yenu, muze nwatwama he hakachi ketu?

²³ Kashika nwashingiwa, mba amwe hakachi kenu munupwa ndungo ja mutolo ja kuchá kunyi ni kutaha meya ha zuwo lia Zambi yami.

²⁴ O yakumbulula kuli Yoshua ngwo, Mumu atwambulwilile yetu ngamba jenu ni umwenemwene ngwo, Yehova Zambi yo hatuma kavumbi kenyi Mose akaahe chifuchi cheswe, akanongese akwa chifuchi eswe kumeso jo. Kashika mumu hali yenu tunakalinga chuma chino mumu ha woma wunji twevwile ha mwono wetu.

²⁵ Haliapwila talenu tuli mu moko jenu. Cheswacho unamono ngwe chipema ni cha ululi hilingenu.

²⁶ Chocho alingile kuli ayo. Yaapulula ku moko ja A-Izalele, kaashihile.

²⁷ Alioze tangwa lienalio Yoshua waapwishile akwa kuchá kunyi ni akwa kutaha meya ha chikungulwila ni ha chilumbilo cha Yehova, akachilinge ndo musono kuma kuze maatongwela.