Yoshua 8 - MUKANDA USANDU WA ZAMBI 1975

¹ Yehova yamba kuli Yoshua ngwenyi, Kanda wivwa woma hanji mwongo. Twala tujita eswe, katuka uye ku Ayi. Hinakunjika mwanangana wa Ayi, ni atu jenyi, ni chihunda chenyi, ni chifuchi chenyi mu kwoko lie.

² Munukalinga ku Ayi ni mwanangana wacho chizechene ngwe nuna-kalinga ku Yeriku ni mwanangana wacho, alioze upite wamo ni yimuna jamo munutambula yikapwe upite wenu. Sako akwa kujikinyina kwe kunyima lia chihunda.

³ Chocho Yoshua yakatuka ni tujita eswe akaye ku Ayi. Yoshua yasakula makumi atatu a tununu twa yitakame, akwa hamu, yaatuma ha ufuku.

⁴ Yaatuma ngwenyi, Enu munujikinyina kunyima lia chihunda. Kanda nuya kusuku nacho alioze lawokenu.

⁵ Mba yami ni waze eswe nguli no mutukundama ku chihunda. Muze o matuhuka hali yetu ngwe alingile kunyima, etu mutuchina kumeso jo.

⁶ O matuhuka kunyima yetu ndo hitwaakoka kusuku ni chihunda, mumu mamba ngwo, Kanatuchina ngwe achinyine kunyima. Mba etu mutuchina kumeso jo.

⁷ Henaho yenu munukatuka kuze nunajikinyina, nukatambule che chihunda, mumu Yehova Zambi yenu makanwahacho mu kwoko lienu.

⁸ Muze hinwatambula chihunda munuchocha ni kahia chizechene ngwe Yehova hanwamba. Hinanutuma.

⁹ Chocho Yoshua yaatuma. O ayile kuma kuze kwa kujikinyina, hakachi ka Mbetele ni Ayi, sali lia Chitokelo lia Ayi. Alioze Yoshua yapomba ufuku uze hakachi ka e atu.

¹⁰ Yoshua yalimeneka chimenemene, yakungulula atu, yakanduka hamuwika ni makulwana a Izalele kulutwe lia atu ku Ayi.

¹¹ Tujita eswe apwile hamwe nenyi ayile, o akundamine ku chihunda, yatwama sali lia Ayi ku Norte. Kwapwile mbongo hakachi ka ayo ni Ayi.

¹² Yasakula ngwe tununu atano a malunga, yaatuma kujikinyina hakachi ka Mbetele ni Ayi, sali lia chihunda ku Chitokelo.

¹³ Chocho asele tujita; che chihuji chinene sali lia chihunda ku Norte, mba akwa kujikinyina sali lia chihunda ku Chitokelo. Ahoze Yoshua ufuku uze yatwama mu chikulo.

¹⁴ Muze mwanangana wa Ayi wachimwene, iye ni atu jenyi, malunga eswe a mu chihunda alipupwishile, yatuhuka akase jita ni A-Izalele kuma kuze kwa kutongola ku Arapa. Kanyingikine ngwenyi, Anangujikinyina kunyima ha chihunda.

¹⁵ Yoshua ni A-Izalele eswe yalionga ngwe haakumba. Yachina kwa kuya ku puya.

¹⁶ Mba yasanyika atu eswe a mu chihunda akaahange, mba cheswe mahanga Yoshua, chihunda anachihichika kunyima.

¹⁷ Kukwasalile chipwe lunga umuwika mu Ayi, chipwe mu Mbetele yoze kakawile A-Izalele. Ahichikile chihunda cha washi nikukaula A-Izalele.

¹⁸ Henaho Yehova yamba kuli Yoshua ngwenyi, Inyika kunga lize uli nalio mu kwoko ku Ayi, mumu munguchikunjika mu kwoko lie. Chocho Yoshua yenyika kunga mu kwoko lienyi ku chihunda.

¹⁹ Mba akwa kujikinyina yakatuka fuji kuze atwamine. Muze iye yolola kwoko lienyi, haze hene azombokele nikunjila mu chihunda nikuchitambula. Fujifuji achochekele kahia che chihunda.

²⁰ Muze akwa Ayi atalile kunyima, kumanyi mwishi wa chihunda unafwinji ndo mwilu. Mba kapwile ni tachi ja kuchina hanji kuku hanji kuku, mumu waze achinyine ku puya yahilukila nawa hali akwa kwahanga.

²¹ Muze Yoshua ni A-Izalele eswe amwene ngwo, Akwa kujikinyina hanatambula chihunda ni chikwo nawa mwishi wa chihunda te unafwinji kulu, mba o ahilukile kunyima nikulamba akwa Ayi.

²² Akwo nawa atuhukile mu chihunda a kulimika no. Chocho apwile mukachi ka A-Izalele, amwe sali lino, amwe sali lize. Mba A-Izalele yaalamba ndo kukwasalile umuwika hanji wa kwomboka hanji wa kuchina.

²³ Alioze mwanangana wa Ayi yamukwata wa mwono, yamutwala kuli Yoshua.

²⁴ Muze A-Izalele hamana kushiha akwa Ayi ku puya kuze aakawile ndo mwe wasula hafwa ni katana, mba A-Izalele yahilukila chihunda cha Ayi nikuchipupa ni katana.

²⁵ Waze afwile tangwa lize, malunga ni mapwo apwile kumi lia tununu ni tununu aali, akwa Ayi eswe.

²⁶ Mumu Yoshua kachijile kwoko lienyi lize enyikine kunga ndo hanongesa liakulu akwa Ayi eswe.

²⁷ Yimuna wika ni upite wa chihunda A-Izalele azukile nikulita ni liji lize Yehova ambile kuli Yoshua.

²⁸ Chocho Yoshua yocha Ayi. Yachipwisa mulumba wa yiswaswa wa mutolo, chize chapwa ndo musono.

²⁹ Yasukika mwanangana wa Ayi ha mutondo ndo chingoloshi. Ha kutoka cha tangwa Yoshua yatuma, yachiza mujimba wenyi ku mutondo, yaumbila mu chikolo cha chihunda nikulumbikilaho mulumba wa mawe. Kokwene kuuli ndo musono.

³⁰ Henaho Yoshua yatunga chilumbilo kuli Yehova Zambi ya Izalele ha mulundu wa Epale,

³¹ chizechene ngwe Mose kavumbi ka Yehova watumine A-Izalele, chasonewa mu mukanda wa shimbi ja Mose ngwo, Chilumbilo cha mawe kaapulile ni martelo kaalambile ni chikungo cha utale. Henaho alambwilile milambu ya kulumba kuli Yehova, ni yitapo ya milambu ya sambukila.

³² Kwenako, kumeso ja A-Izalele yasoneka ha mawe shimbi ja Mose jize asonekene.

³³ A-Izalele eswe, njize ni mukwa chisemuko, hamwe ni makulwana, ni yilolo, ni akwa kuyula, amanyine sali ni sali lia mushete kumeso ja asasendote A-Levi akwa kumbata mushete wa usendo wa Yehova. Chihanda cha ha muchima amanyine kulutwe lia mulundu wa Ngerizime, ni chihanda cha ha muchima amanyine kulutwe lia mulundu wa Epale, chizechene ngwe Mose kavumbi ka Yehova watumine hatangu, hanga akawahise e atu a Izalele.

³⁴ Mba yatanga maliji eswe a shimbi, ni chiwape ni shingo nikulita ni chize cheswe chasonewa mu mukanda wa shimbi.

³⁵ Nilimwe liji kuliasalile lia kutuma kuli Mose, Yoshua yaatanga eswe kumeso ja chikungulwila cha Izalele, ni mapwo, ni ana, ni njize waze atwamine hakachi ko.