Yoshua 7 - MUKANDA USANDU WA ZAMBI 1975

¹ Alioze A-Izalele avulumwine ha kutwala ku yuma yajila. Mumu Akane mwana wa Kame, mwana wa Zapati, mwana wa Zera wa ku munyachi wa Yunda wanjile yimwe ya yuma yajila. Kashika utenu wa Yehova walekwokele kuli A-Izalele.

² Yoshua wakatwishile malunga ku Yeriku akaye ku Ayi, chihunda cha kusulangana ni Mbete-Avene ku sali lia Chivumbuko lia Mbetele. Yamba kuli ayo ngwenyi, Yénu nukendese chifuchi. E malunga ayile nikwendesa Ayi.

³ Yeza kuli Yoshua nawa ngwo, Kanda aya atu eswe, alioze hanji tununu aali hanji atatu a malunga akanduke akase jita ni Ayi. Kanda ukatalisa atu eswe nikwakaadwisako mumu atu akepe aliko.

⁴ Kashika ngwe tununu atatu akandukile a hakachi ka atu alioze achinyine kumeso ja akwa Ayi.

⁵ Akwa Ayi ashihile ngwe makumi atatu a malunga ni malunga asambano hakachi ko. Yaahanga ku chikolo ndo ku Shebarimi nikwashiha ha kupalumuka. Kashika mbunge ja atu jasangunukine, jalumukine ngwe meya.

⁶ Mba Yoshua yasonya mazalo jenyi, yafulamana hashi kumeso ja mushete wa Yehova ndo chingoloshi, ni iye ni makulwana a Izalele. Yasa nawa mavu ha mitwe yo.

⁷ Yoshua yamba ngwenyi, Lwangu! Mwene Yehova. Kuchi te unakazawisa wano atu Yordau? Ukatuhane ku moko ja A-Amore akatwonwone nyi? Kachi tunakahwima mbunge nikutwama mu sali lia Yordau!

⁸ Mwene! Kuchi mungwamba muze A-Izalele hachina kumeso ja akwa kole jo?

⁹ Mumu A-Kanana ni akwa chifuchi eswe machivwa mba matuseleka nikujimuna jina lietu hashi. Mba yena, kuchi mulinga mumu ha jina lie linene?

¹⁰ Yehova yamba kuli Yoshua ngwenyi, Katuka! Kuchi te hiwafulamana?

¹¹ A-Izalele hanavulumuna. Hanatangula usendo wami uze naatumine. Hanande yimwe ya yuma yajila. Haneyi, hahanjika mahuza, hayisweka hakachi ka yuma yo.

¹² Kashika A-Izalele kahashile kumana kumeso ja akwa kole jo. Anachina kumeso ja akwa kole jo mumu halipwisa atu a kukunjika ku kwonwona. Chichi kupwa ni yenu nawa shina munwonwona yuma yajila hakachi kenu.

¹³ Katuka! Selenu e atu ku usandu. Amba ngwe, Liselenu ku usandu ha tangwa lia hamene. Mumu chocho kanambe Yehova Zambi ya Izalele ngwenyi, Yuma yajila kuyili hakachi kenu A-Izalele. Kunuchi kuhasa kumana kumeso ja akwa kole jenu ndo munuchiza yino yuma yajila hakachi kenu.

¹⁴ Kashika, ha kucha munukundama munyachi ni munyachi. Mba munyachi uze Yehova matongola, o makundama ku majimo jo, jimo ni jimo. Mba jimo lize Yehova matongola o makundama zuwo ni zuwo. Mba zuwo lize Yehova matongola o makundama mutu ni mutu.

¹⁵ Mba yoze mamuwana ni ye yuma yajila akamwoche ni kahia, ni mwene ni yuma yenyi yeswe, mumu hanatangula usendo wa Yehova. Chikwo nawa hanalingi chuma cha kukolesa sonyi mu Izalele.

¹⁶ Chocho Yoshua walimenekene chimenemene, yakundamisa A-Izalele munyachi ha munyachi; yatongola munyachi wa Yunda.

¹⁷ Yakundamisa A-Yunda ku majimo jo; yatongola jimo lia A-Zera. Yakundamisa A-Zera mutu ni mutu; yatongola Zapati.

¹⁸ Yakundamisa zuwo lienyi, mutu ni mutu; mba yatongola Akane, mwana wa Kame, mwana wa Zapati, mwana wa Zera, wa ku munyachi wa Yunda.

¹⁹ Henaho Yoshua yamba kuli Akane ngwenyi, Mwanami lemesa Yehova Zambi ya Izalele, ukashikise kuli iye. Ngwambulwile chize walinga. Kanda unguswekelacho.

²⁰ Akane yakumbulula kuli Yoshua ngwenyi, Chamwenemwene hinavulumuna Yehova Zambi ya Izalele mumu nalingile ngwami,

²¹ Muze namwene hakachi ka yuma ya kupupa chikuto chimwe chipema cha ku Babilonia, ni kulakaji aali a shekele ja prata, ni chipinji cha oru cha makumi atano a shekele nayivwilile kuzo, yinguyitambula. Kuyili ya kusweka mu mavu muchima lia mbalaka yami. Prata kushi yili.

²² Mba Yoshua yatuma tunganda, o yazomboka ku mbalaka, yayiwana ya kusweka mu mbalaka yenyi, ni ye prata kushi.

²³ Yayichiza mu mbalaka yayineha kuli Yoshua ni atu eswe a Izalele, yayitumbika kumeso ja Yehova.

²⁴ Mba Yoshua ni A-Izalele eswe yanda Akane mwana Zera, ni prata, ni chikuto, ni chipinji cha oru, ni anenyi a malunga ni a mapwo, ni ngombe jenyi, ni yimbulu jenyi, ni mapanga jenyi, ni mbalaka yenyi, ni upite wenyi weswe, yayitwala ku chikulo cha Akore.

²⁵ Yoshua yamba ngwenyi, Kuchi te hiwatukokela lamba? Kashika Yehova makulamba musono. A-Izalele eswe yamwasa mawe. Yaocha ni kahia nikwaasa mawe.

²⁶ Yalumbika hali iye mulumba unene wa mawe. Wasala ndo musono. Mba Yehova watewulukile ku kusasaminya cha utenu wenyi. Kashika jina liako ndo musono ngwo, Chikulo cha Akore.