Yoshua 6 - MUKANDA USANDU WA ZAMBI 1975

¹ Acho chihunda cha Yeriku hachiyika muchima ni haze mumu hali A-Izalele. Niumwe watuhukile, niumwe wanjilile.

² Kashika Yehova yamba kuli Yoshua ngwenyi, Kwamwene! Hinakwaha Yeriku mu kwoko lie hamuwika ni mwanangana wo ni yitakame, akwa hamu.

³ Munujinguluka chihunda; tujita eswe majinguluka chihunda kamuwika. Chocho munulinga ha matangwa asambano.

⁴ Asasendote shimbiali mambata yitavwi shimbiali ya mbinga ja kuji a mapanga kulutwe lia mushete. Ha tangwa liamuchishimbiali munujinguluka chihunda yisuho shimbiali shimbu asasendote mahumuna yitavwi.

⁵ Muze o mahumuna liji lisuku ha mbinga ja kuji a mapanga, enu munwivwa liji lia yitavwi mba atu eswe makololoka ni liji linene. Mba chipanga-cha-mawe cha chihunda muchinungukina hashi, hanga e atu akanduke pundu mutu mweswe kumeso jenyi.

⁶ Chocho Yoshua mwana wa Nune yasanyika asasendote, yamba kuli ayo ngwenyi, Zundulenu mushete wa usendo, mba asasendote shimbiali akambate yitavwi shimbiali ya mbinga ja kuji a mapanga kumeso ja mushete wa Yehova.

⁷ Yamba kuli atu ngwenyi, Senyenu, nukajinguluke chihunda. Akwa kumbata yitwa ya jita akatetekele kulutwe lia mushete wa Yehova.

⁸ E asasendote shimbiali atetekelele ni yitavwi shimbiali ya mbinga ja kuji a mapanga kumeso ja Yehova, nikuhumuna yitavwi. Mushete wa usendo wa Yehova wakawile chizechene ngwe Yoshua hanatumu atu.

⁹ Akwa yitwa ya jita ayile kulutwe lia asasendote akwa kuhumuna yitavwi. Akwa kunyima akawile kunyima lia mushete, mba yitavwi yinahanjika shimbu lieswe.

¹⁰ Alioze Yoshua yámbila atu ngwenyi, Kanda nukololoka, chipwe kuvwisa liji lienu, chipwe liji limuwika kanda lituhuka mu makanwa jenu ndo tangwa lize mungunutuma ngwami, Kololokenu, mba munukololoka.

¹¹ Chocho watumine mushete wa Yehova ukajinguluke chihunda, nikujinga kamuwika. Mba yahilukila ku chilombo nikupombako.

¹² Mba Yoshua yalimeneka, asasendote yazundula mushete wa Yehova.

¹³ Asasendote shimbiali akwa kumbata yitavwi shimbiali ya mbinga ja kuji a mapanga ayile kulutwe lia mushete wa Yehova nikuhumwona yitavwi. Mba akwa yitwa ya jita aatetekelele, ni akwa kufunga kunyima akawile mushete wa Yehova, shimbu yitavwi kuyaholele kuhanjika.

¹⁴ Tangwa liamuchiali ajingulukile chihunda kamuwika mba yahilukila ku chilombo. Chocho alingile matangwa asambano.

¹⁵ Tangwa liamuchishimbiali yalimeneka he ha kucha. Yajinguluka chihunda chizechene yisuho shimbiali. Tangwa lioliene wika ajingulukile chihunda yisuho shimbiali.

¹⁶ Ha chisuho chamuchishimbiali, muze asasendote hahumuna yitavwi, Yoshua yamba kuli atu ngwenyi, Kololokenu mumu Yehova hanwaha che chihunda.

¹⁷ Ni che chihunda ni yize yeswe yilimo munuyijilila kuli Yehova ha kwonwona. Rahape mwe chikoi wika matwama ni mwono hamwe ni waze eswe mapwa no mu zuwo lienyi, mumu iye waswekele tunganda waze twatumine.

¹⁸ Alioze yenu, lifungenu ku yuma yize hanayijilila ha kwonwona, kuchina muze hinwayijilila munwanda yize hinwajilila, chocho munwalumuna chilombo cha Izalele chuma cha kwonwona, nikunehenako lamba.

¹⁹ Alioze yuma yeswe ya prata ni ya oru, ni yikwachilo ya unengu ni ya utale, yapwa yisandu kuli Yehova. Munuyisa mu milambu ya Yehova.

²⁰ Chocho atu akololokele, ni yitavwi yahanjikile. Muze atu evwile liji lia yitavwi o akololokele ni liji linene, mba chipanga-cha-mawe chanungukine. Chocho atu anjilile mu chihunda, fwapu lume, mutu mweswe kwe kumeso jenyi, nikutambula che chihunda.

²¹ Aho onwene liakulu waze eswe apwile mu chihunda, ni malunga ni mapwo, twanuke ni makulwana, ni ngombe, ni mapanga, ni yimbulu, eswe ni katana.

²² Yoshua yamba kuli malunga aali aze ayile mukwendesa chifuchi ngwenyi, Njilenu mu zuwo lia mwe chikoi ukachizemo mwe pwo ni atu jenyi eswe ngwe nwalitesele nenyi ni shingo.

²³ Chocho akweze aze apwile ngendeshi yanjila, yachizamo Rahape, ni tato ni naye, ni mandumbu jenyi ni atu jenyi eswe. Achijile usoko wenyi eswe nikwatwamisa haze lia chilombo cha Izalele.

²⁴ Ochele chihunda ni kahia ni yuma yeswe yapwilemo. Prata wika ni oru, ni yikwachilo ya unengu ni ya utale asele mu milambu ya zuwo lia Yehova.

²⁵ Alioze mwe chikoi Rahape, ni akwa zuwo lia tato, e atu jenyi eswe, Yoshua waalamwinyine ni mwono. Mba iye kanatwama mu Izalele ndo musono mumu waswekele tunganda aze Yoshua watumine akendese Yeriku.

²⁶ Yoshua waasele shingo tangwa lize ngwenyi, Mweswe makatuka kutunga chihunda chino cha Yeriku akashingiwe kuli Yehova. Masela fundamentu mu kufwa cha mwanenyi mutangu, Masaho mapito mu kufwa cha mwanenyi wasula.

²⁷ Chocho Yehova wapwile hamwe ni Yoshua, mba lufuma wenyi wayile chifuchi cheswe.